ഹീറോ മോട്ടോകോർപ്പും ഹാർലി-ഡേവിഡ്‌സണും സംയുക്തമായി വികസിപ്പിച്ച പ്രീമിയം മോട്ടോർസൈക്കിൾ അടുത്ത രണ്ട് വർഷത്തിനുള്ളിൽ ഇന്ത്യയിലെ ഷോറൂമുകളിൽ എത്തും; വിപണിയിൽ സ്ഥാനം ശക്തിപ്പെടുത്താനുള്ള ഹീറോ മോട്ടോകോർപ്പിന്റെ പുതിയ ലോഞ്ചിങ് വിശേഷങ്ങളിലേക്ക്..

ഇന്ത്യൻ ഇരുചക്ര വാഹന ഭീമനായ  ഹീറോ മോട്ടോകോർപ്പും ഐക്കണിക്ക് അമേരിക്കൻ ഇരുചക്ര വാഹന ബ്രാൻഡായ ഹാർലി-ഡേവിഡ്‌സണും സംയുക്തമായി വികസിപ്പിച്ച പ്രീമിയം മോട്ടോർസൈക്കിൾ അടുത്ത രണ്ട് വർഷത്തിനുള്ളിൽ ഇന്ത്യയിലെ ഷോറൂമുകളിൽ എത്തുമെന്ന് റിപ്പോര്‍ട്ട്. ഇന്ത്യൻ പ്രീമിയം മോട്ടോർസൈക്കിൾ വിപണിയിൽ സ്ഥാനം ശക്തിപ്പെടുത്താനുള്ള ഹീറോ മോട്ടോകോർപ്പിന്റെ തന്ത്രത്തിന്‍റെ ഭാഗമായിരിക്കും ഈ ലോഞ്ച് എന്ന് പിടിഐയെ ഉദ്ദരിച്ച് എച്ച്ടി ഓട്ടോ റിപ്പോർട്ട് ചെയ്യുന്നു.

ഹീറോ മോട്ടോകോർപ്പ് നിലവിൽ 100 ​​സിസി-110 സിസി ഉൽപ്പന്നങ്ങളുടെ ശ്രേണിയിൽ ഇന്ത്യൻ ഇരുചക്രവാഹന വിപണിയിൽ മുന്നിലാണ്. എന്നിരുന്നാലും, പ്രീമിയം സെഗ്‌മെന്റിനെക്കുറിച്ച് കമ്പനിക്ക് കൂടുതല്‍ പ്രതീക്ഷകള്‍ ഉണ്ട്. 160 സിസിക്ക് മുകളിലുള്ള വിഭാഗങ്ങളിൽ കൂടുതൽ വോളിയങ്ങൾ കൊണ്ടുവരുന്നതിനും ലാഭം വർദ്ധിപ്പിക്കുന്നതിനും ഈ വിഭാഗത്തിലേക്ക് കൂടുതല്‍ മോഡലുകൾ എത്തിക്കാൻ കമ്പനി പദ്ധതിയിടുന്നതായാണ് റിപ്പോര്‍ട്ട്.

ഹീറോ - ഹാര്‍ലി സംയുക്ത സംരംഭം വികസിപ്പിച്ച വരാനിരിക്കുന്ന പ്രീമിയം മോട്ടോർസൈക്കിൾ ആ തന്ത്രത്തിൽ നിർണായക പങ്ക് വഹിക്കും. വരാനിരിക്കുന്ന സഹ-വികസിപ്പിച്ച മോട്ടോർസൈക്കിളിനെക്കുറിച്ച്, കമ്പനി പ്രീമിയം മോട്ടോർസൈക്കിളുകളുടെ ശക്തമായ ശ്രേണി നിർമ്മിക്കുകയാണെന്നും വർഷം തോറും ഈ സെഗ്മെന്റിൽ മോഡലുകൾ പുറത്തിറക്കുമെന്നും  സിഎഫ്ഒ നിരഞ്ജൻ ഗുപ്‍തപറഞ്ഞതായി എച്ച്ടി ഓട്ടോ റിപ്പോർട്ട് ചെയ്യുന്നു . അടുത്ത രണ്ട് വർഷത്തെ സമയപരിധിക്കുള്ളിൽ, വോളിയം, പ്രീമിയം വിഭാഗങ്ങളിൽ ഒന്നിലധികം മോഡലുകൾ ഉണ്ടാകുമെന്നും അദ്ദേഹം പറഞ്ഞു.

"അടുത്ത രണ്ട് വർഷത്തിനുള്ളിൽ, ഹാർലിയുമായി ഞങ്ങൾ സംയുക്തമായി വികസിപ്പിക്കുന്ന പ്ലാറ്റ്ഫോം ഉൾപ്പെടെ, വോളിയം വിഭാഗത്തിലും ലാഭകരമായ പ്രീമിയം വിഭാഗത്തിലും ഉള്ള മോഡലുകൾ നിങ്ങൾ കാണും.. " ഗുപ്‍ത പറഞ്ഞു. ഈ ഉൽപ്പന്ന തന്ത്രം പ്രീമിയം സെഗ്‌മെന്റിൽ വിപണി വിഹിതം കെട്ടിപ്പടുക്കുന്നതിനും ഇടത്തരം കാലയളവിൽ ലാഭം വർദ്ധിപ്പിക്കുന്നതിനും കമ്പനിയെ സഹായിക്കുമെന്ന് ഹീറോ മോട്ടോകോർപ്പ് സിഎഫ്ഒ പറഞ്ഞു.