ഇന്‍ഡീ എസ്‌യുവി സ്‌കൂട്ടര്‍ പുറത്തിറക്കി റിവര്‍; പ്രീഓര്‍ഡര്‍ ആരംഭിച്ചു

കൊച്ചി: സ്‌കൂട്ടറുകളുടെ എസ്‌യുവിയായ ഇന്‍ഡീ പുറത്തിറക്കി ബെംഗളൂരു ആസ്ഥാനമായ ഇലക്ട്രിക് വെഹിക്കിള്‍ സ്റ്റാര്‍ട്ടപ്പായ റിവര്‍. ഒരുസ്‌കൂട്ടര്‍ എങ്ങനെയൊക്കെ ഉപയോഗിക്കാം എന്നതിന് പുത്തന്‍ വഴികളുമായി, ഇതുവരെ കണ്ടിട്ടില്ലാത്ത നിരവധി ഫീച്ചറുകള്‍ വാഗ്ദാനം ചെയ്യുന്ന ഡിസൈനാണ് ഇന്‍ഡീയുടെത്. ബെംഗളൂരുവിലെ റിവര്‍ ആര്‍ ആന്‍ഡ് ഡി കേന്ദ്രത്തിലാണ് ഇന്‍ഡീ രൂപകല്‍പ്പനയും നിര്‍മാണവും.

രാജ്യത്ത് വില്‍ക്കപ്പെടുന്ന മറ്റൊരു ഇലക്ട്രിക് സ്‌കൂട്ടറിലും ഇല്ലാത്തവിധം 14 ഇഞ്ചിന്റെ വീലുകളാണ് ഇന്‍ഡീയില്‍ ഉള്ളത്. ഈ വലിയ വീലുകള്‍ മികച്ച നിയന്ത്രണം അനുവദിക്കുന്ന റൈഡിംഗ് പൊസിഷനും ഏതുതരം റാഡുകളിലും മികച്ച യാത്രാക്ഷമതയും വാഗ്ദാനം ചെയ്യുന്നു.

സീറ്റിനടിയില്‍ വിപുലമായ 43 ലിറ്റര്‍ സ്റ്റോറേജും 12 ലിറ്റര്‍ ഫ്രണ്ട്‌ഗ്ലോവ് ബോക്‌സും ഉള്ള ഇന്‍ഡീയിലാണ് മറ്റ് സ്‌കൂട്ടറുകളെ അപേക്ഷിച്ച് ഏറ്റവും വലിയ സ്റ്റോറേജ് ഉള്ളത്. ഇന്‍ഡീയുടെ വശങ്ങളിലുള്ള എക്‌സ്‌ക്ലൂസീവ് ലോക്ക്& ലോഡ്പാനിയര്‍ സ്റ്റേകള്‍ വ്യത്യസ്ത ആവശ്യങ്ങള്‍ക്കായി പലവിധ കസ്റ്റമൈസേഷനുകളും സാധ്യമാക്കുന്നു. ഇത്തരത്തിലുള്ളത് സ്‌ക്കൂട്ടറുകളില്‍ ആദ്യമാണ്.

6.7 കെഡബ്ല്യു പീക്ക്പവര്‍ ഉള്ള ശക്തമായ മോട്ടോറിന് ഇന്‍ഡീയെ 90 കിലോമീറ്റര്‍ വേഗതയില്‍ എത്തിക്കാന്‍ കഴിയും. ഇക്കോ, റൈഡ്, റഷ് എന്നീ മൂന്ന് റൈഡ് മോഡുകള്‍ക്കിടയില്‍ തടസ്സമില്ലാതെ മാറ്റി ഡ്രൈവ് ചെയ്യാം. 4 കെഡബ്ല്യുഎച്ച് ബാറ്ററി 120 കിലോമീറ്റര്‍ റേഞ്ച്‌നല്‍കും. ഒരു സാധാരണ ചാര്‍ജര്‍ ഉപയോഗിച്ച് 5 മണിക്കൂറിനുള്ളില്‍ 80% വരെ സ്‌ക്കൂട്ടര്‍ ചാര്‍ജ് ചെയ്യാന്‍ സാധിക്കും. ഇന്‍ഡീയുടെ വില 1,25,000/ രൂപയാണ് (ബെംഗളൂരു എക്‌സ്‌ഷോറൂം). 2023 ആഗസ്ത് മുതല്‍ ആരംഭിക്കുന്ന ഡെലിവറികള്‍ക്കായുള്ള പ്രീഓര്‍ഡറുകള്‍ ഇപ്പോള്‍ റിവര്‍ വെബ്‌സൈറ്റില്‍ലഭ്യമാണ്.

സിഗ്‌നേച്ചര്‍ ട്വിന്‍ബീം ഹെഡ്‌ലാമ്പുകളും സവിശേഷമായ ടെയില്‍ ലാമ്പ് ഡിസൈനും സ്‌കൂട്ടറിന് തകച്ചും വ്യത്യസ്തമായൊരു കാഴ്ച നല്‍കുകയും റോഡില്‍ പരമാവധി ദൃശ്യത ഉറപ്പാക്കുകയും ചെയ്യുന്നു. എളുപ്പത്തില്‍ കൈകാര്യം ചെയ്യാനും സ്റ്റബിലിറ്റിക്കുമായി മോട്ടോര്‍സൈക്കിള്‍ പ്രചോദിത ക്ലിപ്പ് ഓണ്‍ ഹാന്‍ഡില്‍ ബാര്‍ അവസരം നല്‍കുന്നു. വീഴ്ചകളില്‍ ബോഡിപാനലുകളെ സംരക്ഷിക്കുന്ന സേഫ്ഗാര്‍ഡുകള്‍ എന്ന ഫീച്ചറും ഇന്‍ഡീയില്‍ ഉണ്ട്.

വ്യത്യസ്ത ഉയരങ്ങളുള്ള വ്യക്തികള്‍ക്കും സുഖകരമായി ഡ്രൈവ്‌ചെയ്യാന്‍ സാധിക്കുംവിധമാണ് ഇന്‍ഡീയുടെ രൂപകല്‍പ്പന. വിട്ടുവീഴ്ചയില്ലാത്ത സുഖം ഉറപ്പാക്കുന്നതിനായി ഈ മേഖലയിലെതന്നെ ഏറ്റവും നീളമേറിയതും വീതിയുള്ളതുമായ സീറ്റാണ് ഇന്‍ഡീക്കുള്ളത്.

ഫ്‌ലോര്‍ ബോര്‍ഡിലെ സ്റ്റോറേജ് പരമാവധി വര്‍ധിപ്പിച്ച്, അതേസമയം സുരക്ഷിതവും സുഖപ്രദവുമായ യാത്ര ഉറപ്പുനല്‍കുന്ന ഫ്രണ്ട്ഫൂട്ട്‌പെഗ്‌സ് മറ്റൊരു സ്‌കൂട്ടറിലും ഇല്ലാത്ത സവിശേഷതയാണ്. ട്വിന്‍ റിയര്‍ ഹൈഡ്രോളിക് സസ്‌പെന്‍ഷനും ടെലിസ്‌കോപിക് ഫ്രണ്ട് സസ്‌പെന്‍ഷനും മികച്ച സുഖം പ്രദാനംചെയ്യുന്നു.

ഉപയോഗം, ജീവിതശൈലി എന്നീ രണ്ട് വ്യത്യസ്ത ഘടകങ്ങള്‍ സംയോജിപ്പിച്ചുള്ള ധീരമായ ചുവടുവെപ്പാണ് തങ്ങളുടെ ആദ്യ ഉല്‍പ്പന്നമായ ഇന്‍ഡീയെന്ന് റിവറിന്റെ സഹസ്ഥാപകനും ചീഫ് എക്‌സിക്യൂട്ടീവ് ഓഫിസറുമായ അരവിന്ദ് മണി പറഞ്ഞു.

ഒരോ ദിവസവും പരമാവധി പ്രയോജനപ്പെടുത്താന്‍ ആഗ്രഹിക്കുന്ന, ഒരിക്കലും നിശ്ചലരായി ഇരിക്കാത്ത ആധുനിക ഇന്ത്യക്കാരില്‍ നിന്നാണ് ഇന്‍ഡീ പ്രചോദനം ഉള്‍ക്കൊണ്ടതെന്ന് സഹസ്ഥാപകനും ചീഫ് പ്രൊഡക്റ്റ് ഓഫിസറുമായ വിപിന്‍ ജോര്‍ജ് പറഞ്ഞു.