മഹാത്മാഗാന്ധി കൾചറൽ ഫോറത്തിന്‍റെ ആഭിമുഖ്യത്തിൽ സംഘടിപ്പിക്കുന്ന ഗാന്ധിദർശൻ 'മാനവ മൈത്രി സംഗമം’ ഒക്ടോബർ 14 ന് മനാമ സെഗായയില്‍

മനാമ: മഹാത്മാഗാന്ധി കൾചറൽ ഫോറത്തിന്‍റെ ആഭിമുഖ്യത്തിൽ സംഘടിപ്പിക്കുന്ന ഗാന്ധിദർശൻ 'മാനവ മൈത്രി സംഗമം’ ഒക്ടോബർ 14 വെള്ളിയാഴ്ച വൈകിട്ട് ഏഴിന് കെസിഎ ഓഡിറ്റോറിയത്തിൽ നടക്കുമെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു. കേരള ഗാന്ധിസ്മാരക നിധി, ഇന്ത്യൻ കൗൺസിൽ ഓഫ് ഗാന്ധിയൻ സ്റ്റഡീസ് എന്നിവയുടെ ചെയർമാനായ ഡോ. എൻ. രാധാകൃഷ്ണൻ സംഗമം ഉദ്ഘാടനം നിര്‍വ്വഹിക്കും.

ഗാന്ധിയൻ ചിന്തകൻ, സമാധാന പ്രവർത്തകൻ, അധ്യാപകൻ, എഴുത്തുകാരൻ എന്നീ നിലകളിൽ പ്രശസ്തനായ ഡോ. എൻ. രാധാകൃഷ്ണൻ ചടങ്ങിൽ മുഖ്യ പ്രഭാഷ ണം നടത്തും. ഗാന്ധി, സമാധാനം, വിദ്യാഭ്യാസം, ഐക്യം എന്നീ വിഷയങ്ങളിൽ ഇംഗ്ലീഷ്, ഹിന്ദി, മലയാളം, തമിഴ് ഭാഷകളിലായി 75ലധികം പുസ്തകങ്ങളുടെ രചയിതാവ് കൂടിയാണ് ഡോ. എൻ. രാധാകൃഷ്ണൻ.

പ്രവാസലോകത്ത് ഗാന്ധിയൻ ആദർശങ്ങൾ പ്രചരിപ്പിക്കുക എന്ന ലക്ഷ്യവുമായി ബഹ്റൈനിൽ പ്രവർത്തിക്കുന്ന മഹാത്മാഗാന്ധി കൾചറൽ ഫോറം ഈ വർഷത്തെ ഗാന്ധിജയന്തി ആഘോഷത്തിന്റെ ഭാഗമായാണ് മാനവമൈത്രി സംഗമം സംഘടിപ്പിക്കുന്നത്. പരിപാടിയുടെ മുന്നോടിയായി വൈകീട്ട് ആറിന് ദേശഭക്തിഗാന മത്സരവും വിവിധ കലാപരിപാടികളും അരങ്ങേറും.

പരിപാടിയിൽ വെച്ച് ബി.കെ.ജി ഹോൾഡിങ് ചെയർമാൻ കെ.ജി. ബാബുരാജൻ, അമാദ് ഗ്രൂപ് മാനേജിങ് ഡയറക്ടർ പമ്പാവാസൻ നായർ, ഡോ. പി.വി. ചെറിയാൻ, ഐ.സി.ആർ.എഫ് ചെയർമാൻ ഡോ. ബാബു രാമചന്ദ്രൻ എന്നിവരെ വിശിഷ്ടാംഗത്വം നൽകി ആദരിക്കും.

ഗാന്ധിജിയുടെ ആദർശങ്ങൾക്ക് ആധുനിക ലോകത്ത് പ്രസക്തി വർധിച്ചുവരുകയാണെന്നും പുതിയ തലമുറയിലേക്ക് ഗാന്ധിജിയുടെ സന്ദേശം എത്തിക്കുകയാണ് സംഘടനയുടെ ലക്ഷ്യമെന്നും ഭാരവാഹികൾ പറഞ്ഞു. വാർത്തസമ്മേളനത്തിൽ പ്രസിഡന്റ് എബി തോമസ്, പ്രോഗ്രാം കമ്മിറ്റി ചെയർമാൻ അഡ്വ. പോൾ സെബാസ്റ്റ്യൻ, ജനറൽ കൺവീനർ അനിൽ തിരുവല്ല, രക്ഷാധികാരി ബാബു കുഞ്ഞിരാമൻ, ഡോ. പി.വി. ചെറിയാൻ, ജോ. സെക്രട്ടറി തോമസ് ഫിലിപ്പ്, വൈസ് പ്രസിഡന്റ് പവിത്രൻ പൂക്കോട്ടിയിൽ, കമ്മിറ്റി അംഗങ്ങളായ കൃഷ്ണകുമാർ, അജിത് കുമാർ, സജീവൻ എന്നിവർ പങ്കെടുത്തു.