വാതരോഗങ്ങൾ പിടിമുറുക്കുമ്പോൾ വേദനയും കൂടെയെത്തുന്നു; വാതരോഗത്തിനെതിരെയുള്ള പ്രതിരോധ മാർഗങ്ങൾ..

പ്രായമായവരിലാണ് വാതസംബന്ധമായ അസുഖങ്ങൾ കൂടുതലായി കാണാറുള്ളത്. വാതരോഗങ്ങൾക്ക് ഫലപ്രദമായ ചികിത്സ ആയുർവേദത്തിലുണ്ട്. കൈകാൽ വേദന, ഇടുപ്പുവേദന, സന്ധി തേയ്മാനം കൊണ്ടുള്ള വേദന, കഴുത്തു വേദന തുടങ്ങിയവയാണ് വാതദോഷാധിക്യം കൊണ്ടുണ്ടാകുന്നുത്. ഇത്തരം രോഗങ്ങൾ മഴക്കാലത്തും ശീതകാലത്തും വർധിച്ചു കാണാറുണ്ട്.

പ്രായം കൂടുന്തോറും ശരീരബലം കുറയുന്നു, ഉപയോഗം കൊണ്ട് സന്ധികൾക്ക് തേയ്മാനം സംഭവിക്കുന്നു. ഇങ്ങനെ വാതരോഗങ്ങളെത്തുന്നു. വാതരോഗികളിൽ മാനസിക സമ്മർദം കൂടുന്നതും ഉറക്കമില്ലായ്മ ഉണ്ടാവുന്നതും കണ്ടുവരുന്നു.

∙ ദിവസവും എണ്ണ തേച്ച് ശരീരം ചൂടുവെള്ളത്തിൽ കഴുകി കുളിക്കാം.

∙ മിതമായി വ്യായാമം ചെയ്യുക. ഹിതമായ യോഗാസന മുറകൾ ശീലിക്കുന്നതു നല്ലതാണ്.

∙ മാനസിക സമ്മർദമുണ്ടാക്കുന്ന കാര്യങ്ങൾ ഒഴിവാക്കുക.

∙ വിശ്രമജീവിതം ആസ്വാദ്യകരമായി നയിക്കുക. ഇഷ്ടമുള്ള കാര്യങ്ങൾ– യാത്ര, വായന, എഴുത്ത് തുടങ്ങിയവയിൽ ഏർപ്പെടാം.

വാതത്തിനെതിരെ ആയുർവേദ ചികിത്സ

∙ വാതരോഗത്തിനെതിരെ കർക്കടകമാസ ചികിത്സകൾ സ്വീകരിക്കാവുന്നതാണ്.

∙ വാതഹരമായ ഔഷധങ്ങൾ സേവിക്കുകയും എണ്ണതേച്ചുകുളി (അഭ്യംഗം) പതിവാക്കുകയും ചെയ്യുക.

∙ പത്തിലകൾ കൊണ്ട് തോരൻ വച്ചു കഴിക്കുക.