പണ്ടുകാലത്ത് പ്രായമായവരില്‍ മാത്രം കണ്ടുവന്നിരുന്ന എല്ലുവേദന, തേയ്മാനം പോലുള്ള പ്രശ്‌നങ്ങള്‍ ഇന്നത്തെ കാലത്ത് നാല്‍പതുകളില്‍ പോലും പ്രത്യക്ഷപ്പെടുന്നു; എല്ല് തേയ്മാനം ഒഴിവാക്കാന്‍ സ്ത്രീകളും പുരുഷന്മാരും ചെയ്യേണ്ട ചില കാര്യങ്ങളെക്കുറിച്ചറിയാം..

എല്ലിന്റെ ആരോഗ്യത്തിന് പ്രധാനപ്പെട്ടതാണ് കാല്‍സ്യം. കാല്‍സ്യം ശരീരം വലിച്ചെടുക്കാന്‍ വൈറ്റമിന്‍ ഡി വേണം എന്നതിനാല്‍ ഇതും പ്രധാനം. എല്ലുകളുടെ ആരോഗ്യത്തിന് വാസ്തവത്തില്‍ കുട്ടിക്കാലം മുതല്‍ ശ്രദ്ധിയ്ക്കണം. ഭക്ഷണവും വ്യായാമവുമെല്ലാം പ്രധാനം. സ്ത്രീ പുരുഷന്മാരുടെ കാര്യമെടുത്താല്‍ പൊതുവേ എല്ല് സംബന്ധമായ പ്രശ്‌നങ്ങള്‍ കൂടുതല്‍ സ്ത്രീകള്‍ക്കാണ്. ഇതിന് കാരണം ജീവിത ശൈലി കാരണം കൂടിയാണ്.

​നമ്മുടെ ശരീരം..

നമ്മുടെ ശരീരം അനങ്ങാത്ത വിധത്തിലാണെങ്കില്‍, അതായത് വ്യായാമില്ലെങ്കില്‍ എല്ലിന്റെ ആരോഗ്യം കുറയുന്നു. എല്ലുകളിലേയ്ക്ക് ലഭിയ്ക്കുന്ന കാല്‍സ്യം കുറയും. ഇതിന് പുറമേ വെയില്‍ കൊള്ളാത്ത ലൈഫ് സ്റ്റൈല്‍ ഇതിന് പ്രധാന കാരണമാണ്. മദ്യപാന, പുകവലി ശീലങ്ങള്‍ ഏറെ ദോഷം ചെയ്യും. കോള പോലുള്ള പാനീയങ്ങള്‍ ദോഷം വരുത്തുന്നവയാണ്. ഇതു പോലെ പ്രോട്ടീന്‍ കൂടുതലുള്ള, അതായത് ആവശ്യത്തില്‍ ഏറെ കൂടുതല്‍ പ്രോട്ടീന്‍ കഴിച്ചാല്‍ ഇതും എല്ലിന്റെ ആരോഗ്യത്തിന് നല്ലതല്ല.

അമിതമായ പ്രോട്ടീന്‍ കഴിച്ചാല്‍ ശരീരം കാല്‍സ്യം പുറന്തള്ളും. ഇതു പോലെ ഉപ്പ് കൂടുതല്‍ കഴിച്ചാല്‍ കാല്‍സ്യം പ്രശ്‌നമുണ്ടാകും. സോഡിയം പുറന്തള്ളുന്നതിനോടൊപ്പം കാല്‍സ്യം കൂടി കിഡ്‌നി പുറന്തള്ളും. ഇതു കാരണം മൂത്രത്തില്‍ കല്ല് പോലുളള പ്രശ്‌നങ്ങളുമുണ്ടാകും. കാല്‍സ്യത്തിന്റെ ഇത്തരം പ്രശ്‌നങ്ങള്‍ വരുമ്പോള്‍ സ്വാഭാവികമായും എല്ല് തേയ്മാനവും വേദനയുമെല്ലാം ഉണ്ടാകും.

​കാല്‍സ്യം സമ്പുഷ്ടമായ ഭക്ഷണം..

കാല്‍സ്യം സമ്പുഷ്ടമായ ഭക്ഷണം കഴിയ്ക്കുകയെന്നതാണ് ഒരു കാര്യം. എള്ള് ഏറെ നല്ലതാണ്. ഇത് കഴിയ്ക്കാം. ഇത് എള്ളുണ്ട രൂപത്തില്‍ കഴിയ്ക്കാം. ചീസ് എല്ലിന്റെ ആരോഗ്യത്തിന് ഏറെ നല്ലതാണ്. ഇത് ഭക്ഷണത്തില്‍ ഉള്‍പ്പെടുത്താം. മത്സ്യം, പ്രത്യേകിച്ചും ചെറിയ മത്സ്യങ്ങള്‍ ഏറെ നല്ലതാണ്. ഇലക്കറികള്‍ കാല്‍സ്യം സമ്പുഷ്ടമാണ്. പാല്‍, തൈര് എന്നിവ നല്ലതാണ്. കാല്‍സ്യം ഗുളികകളേക്കാള്‍ ഏറ്റവും നല്ലത് പ്രകൃതിദത്തമായ ഇത്തരം കാല്‍സ്യം ഉറവിടങ്ങളാണ്. ഇതു പോലെ വൈറ്റമിന്‍ ഡി പ്രധാനമാണ്. സൂര്യ പ്രകാശം ഏല്‍ക്കുക. രാവിലെയും വൈകിട്ടുമുള്ള ഇളം വെയില്‍ ഏറെ നല്ലതാണ്. ഇതു പോലെ കൂണ്‍, മുട്ട പോലുള്ള ഭക്ഷണങ്ങള്‍ വൈറ്റമിന്‍ ഡി സമ്പുഷ്ടമാണ്.

വ്യായാമം..

എല്ലുകളുടെ ആരോഗ്യത്തിന് വ്യായാമം പ്രധാനമാണ്. റെസിസ്റ്റന്റ് വ്യായാമങ്ങള്‍, വെയ്റ്റ് വെയറിംഗ് വ്യായാമങ്ങള്‍ എന്നിവ എല്ലിന്റെ ആരോഗ്യത്തിന് പ്രധാനമാണ്. ദിവസവും അര മണിക്കൂര്‍ വച്ച് ചെയ്താല്‍ മതിയാകും. സന്ധികളുടെ ആരോഗ്യത്തിന് ചാടുക, ഓടുക, നിന്ന് ചാടുക, സിറ്റ് അപ്‌സ്, പുഷ് അപ്‌സ് എന്നിവയെല്ലാം ഇതിന് സഹായിക്കുന്ന വ്യായാമങ്ങളാണ്. സന്ധിവേദനയുണ്ടെങ്കില്‍ ജോയന്റുകളിലും മറ്റും സപ്പോര്‍ട്ടുകള്‍ ധരിച്ച് ഇത് ചെയ്യാം. ട്രെയിനിംഗ് ലഭിച്ചവരുടെ കീഴില്‍ ഇതെല്ലാം ചെയ്യുന്നത് നല്ലതാണ്. ഇതു പോലെ നമുക്ക് ചെയ്യാവുന്ന ചിലതുണ്ട്. ഉദാഹരണത്തിന് മരച്ചില്ലകള്‍ താഴേയ്ക്കു വലിയ്ക്കുക, ഭാരമുള്ള എന്തെങ്കിലും കയ്യില്‍ പിടിച്ച് മുകളിലേക്ക് ഉയര്‍ത്തുകയും താഴ്ത്തുകയും ചെയ്യുക. ഇതെല്ലാം പതിയെ വേണം, ചെയ്യുവാന്‍.