ക്ഷയരോഗ ദിനം ; അറിയാം പ്രാരംഭ ലക്ഷണങ്ങള്‍ എന്തൊക്കെയാണെന്ന് നോക്കാം...

ക്ഷയരോഗം ശ്വാസകോശത്തെ മാത്രമേ ബാധിക്കുകയുള്ളൂവെന്ന് മിക്ക ആളുകളും വിശ്വസിക്കുന്നുണ്ടെങ്കിലും, രോഗം മറ്റ് അവയവങ്ങളെയും തകരാറിലാക്കും. എക്സ്ട്രാ പൾമോണറി ട്യൂബർകുലോസിസ് എന്നറിയപ്പെടുന്ന ഈ അവസ്ഥയെ ബാധിക്കാനിടയുള്ള അധിക അവയവങ്ങളിൽ ശ്വാസകോശത്തിന്റെ ആവരണം (പ്ലൂറൽ ടിബി) ഉൾപ്പെടുന്നു. ചികിത്സയേക്കാൾ പ്രതിരോധം കൊണ്ട് തുടച്ചുനീക്കാനാവുന്ന ക്ഷയരോഗം ഇന്നും ലോകരാജ്യങ്ങളിൽ മാരകപകർച്ചവ്യാധിയായി ഭീഷണി ഉയർത്തുന്നുണ്ട്. ഈ രോ​ഗത്തെ കുറിച്ച് സമൂഹത്തിൽ അവബോധം സൃഷ്ടിക്കാനും പൂർണമായി തുടച്ചുനീക്കാനുള്ള പ്രവർത്തനങ്ങൾക്ക് പ്രചോദനം നൽകുന്നതിനുമാണ് മാർച്ച് 24ന് ക്ഷയരോഗ ദിനമായി ആചരിക്കുന്നത്. 'അതെ! നമുക്ക് ടിബി അവസാനിപ്പിക്കാം!' എന്നതാണ് ഈ വർഷത്തെ ലോക ക്ഷയരോഗ ദിനത്തിന്റെ പ്രമേയം.

ക്ഷയം (ടിബി) ശ്വാസകോശത്തെ ഏറ്റവും കൂടുതൽ ബാധിക്കുന്ന ഒരു ബാക്ടീരിയ രോഗമാണ്. വൃക്കകൾ, നട്ടെല്ല് അല്ലെങ്കിൽ മസ്തിഷ്കം പോലുള്ള മറ്റ് അവയവങ്ങളെയും ബാധിച്ചേക്കാം. രോഗബാധിതനായ ഒരാൾ ചുമയ്ക്കുമ്പോഴോ തുമ്മുമ്പോഴോ പോലെയുള്ള വായുവിലൂടെയാണ് ക്ഷയരോഗം കൂടുതലായി പകരുന്നത്.

മൂന്ന് ആഴ്ചയെങ്കിലും നീണ്ടുനിൽക്കുന്ന തുടർച്ചയായ ചുമ, രക്തം കലർന്ന കഫം, വിറയൽ, പനി, വിശപ്പില്ലായ്മ, ശരീരഭാരക്കുറവ്, ക്ഷീണം/ തളർച്ച, രാത്രിയിൽ വിയർക്കുന്നു എന്നിവയാണ് പ്രധാന ലക്ഷണങ്ങൾ. ചിലരിൽ വയറുവേദന, സന്ധി വേദന, അപസ്മാരം, നിരന്തരമായ തലവേദന എന്നിവയും കാണപ്പെടുന്നു. രോഗം ബാധിക്കുന്ന അവയവവുമായി ബന്ധപ്പെട്ടാണ് ലക്ഷണങ്ങൾ പ്രകടമാകുന്നത്. ലക്ഷണങ്ങൾ കണ്ടാൽ കഫ പരിശോധനയാണ് ആദ്യം നടത്തുക. സ്മിയർ മൈക്രോസ്‌കോപ്പിയോ ജീൻ എക്‌സ്‌പെർട്ട് പോലുള്ള പുതിയ മോളിക്യുലാർ രീതികളോ ഉപയോഗിച്ച് കഫം പരിശോധിക്കും. നെഞ്ചിന്റെ എക്സ്-റേ എടുത്തും രോഗനിർണയം നടത്താം.