സൂര്യപ്രകാശം ഏറ്റുള്ള ചർമരോഗങ്ങൾ തിരിച്ചറിയുന്നത് എങ്ങനെയാണെന്ന് നോക്കാം..

സൂര്യ രശ്മികൾ എങ്ങനെയാണ് ചർമത്തിന് ഹാനികരമാകുന്നത് എന്ന് നോക്കാം.തരംഗദൈർഘ്യമനുസരിച്ച് പ്രധാനമായും അഞ്ചുതരം സൂര്യരശ്മികൾ ആണുള്ളത്.

1. അൾട്രാ വയലറ്റ് - സി (UVC) >290nm
2. അൾട്രാ വയലറ്റ് - ബി (UVB) 290-320nm
3. അൾട്രാ വയലറ്റ് - എ (UVA) 320-400nm. ഇവ മൂന്നും നഗ്ന നേത്രങ്ങൾ കൊണ്ട് കാണാവുന്നതല്ല.
4. പ്രത്യക്ഷ രശ്മികൾ: 400-700 nm തരംഗ ദൈർഘ്യത്തിലുള്ളതാണ്.
5. ചൂട് നൽകുന്ന ഇൻഫ്രാറെഡ് രശ്മികൾ: > 700 nm തരംഗ ദൈർഘ്യം ഉള്ളവയാണ്. കാലാവസ്ഥ മാറ്റം, ഭൂപ്രകൃതി, സൂര്യോദയവും അസ്തമയവും എന്നിങ്ങനെ പല കാരണങ്ങൾ കൊണ്ട് സൂര്യരശ്മി ചർമത്തിൽ മാറ്റമുണ്ടാക്കുന്നു. ഫലത്തിൽ അൾട്രാവയലറ്റ് എയും അൾട്രാവയലറ്റ് ബിയും ആണ് തൊലിപ്പുറത്ത് രോഗങ്ങൾ ഉണ്ടാക്കുന്ന രശ്മികൾ. അൾട്രാവയലറ്റ് എ, ചർമത്തിനകത്തേക്ക് ആഴ്ന്നിറങ്ങി, ചർമ്മത്തിന് നിറഭേദം ഉണ്ടാക്കുന്നു. പ്രതിരോധ പ്രവർത്തനങ്ങളെ അത് സ്വാധീനിക്കുകയും അകാല ജരയ്ക്ക് കാരണമാവുകയും ചെയ്യുന്നു.എന്നാൽ അൾട്രാവയലറ്റ് ബി ആകട്ടെ, ചർമത്തിനകത്തേക്ക് പ്രവേശിക്കാൻ കഴിവുള്ളതല്ല. അത് ഉപരിതലത്തിൽ പ്രവർത്തിക്കുകയും ചർമ്മത്തിന് ദോഷകരമായ പൊള്ളലുകൾ ഉണ്ടാക്കുകയും ചെയ്യുന്നു. ചർമത്തിലുണ്ടാകുന്ന കാൻസറിന് കാരണമാവുകയും, തൊലിയിൽ ചുളിവുകൾ ഉണ്ടാക്കുകയും ചെയ്യും.

സൂര്യപ്രകാശം മൂലം ചർമത്തിലുണ്ടാകുന്ന രോഗങ്ങൾ

1. പോളി മോർഫസ് ലൈറ്റ് ഇറപ്ഷൻ (Polymorphous Light Eruption- PMLE)

ഏതു പ്രായക്കാരെയും ഇത് ബാധിക്കാം. പ്രധാനമായും 30-40 വയസ്സിനിടയിലുള്ളവരിലാണ് ഇത് കൂടുതലായി കാണപ്പെടുന്നത്. ഇത് ശരീരത്തിലെ പ്രതിരോധ പ്രവർത്തനവുമായി ബന്ധപ്പെട്ടുള്ള ഒരു പ്രതിഭാസമാണ്. സൂര്യരശ്മി ഒരു ആന്റിജനെ തൊലിയിൽ സൃഷ്ടിക്കുകയും അതിനെതിരായി ചർമം പ്രവർത്തിക്കുകയും ചെയ്യുന്നതായി കരുതപ്പെടുന്നു.

വസ്ത്രം കൊണ്ട് മറയാത്ത ഭാഗങ്ങളിൽ ചൊറിച്ചിലും പാടുകളും ഉണ്ടാകുന്നു. കൈകളുടെ പുറം ഭാഗങ്ങളിൽ, കഴുത്തിന് പുറകുവശത്ത്, പാദങ്ങളിൽ ഒക്കെയാണ് സാധാരണ കാണപ്പെടുക. മുഖത്ത് വരുന്നത് കുറവാണ്. അതിന് കാരണം, നിരന്തരം സൂര്യരശ്മിയേൽക്കുമ്പോൾ അതിനോട് പൊരുത്തപ്പെടാൻ മുഖത്തെ ചർമത്തിനാവുന്നു എന്നതാണ്.

പുറമെ പുരട്ടാൻ സൺസ്‌ക്രീനുകളും ‌സ്റ്റിറോയ്ഡ് അടങ്ങിയ ലേപനങ്ങളും നൽകാം. അസുഖം രൂക്ഷമാണെങ്കിൽ ഉള്ളിലേക്ക് സൊറാലൻ ഗ്രൂപ്പിൽ പെട്ട ഔഷധങ്ങൾ കൊടുക്കാറുണ്ട്.

2. ക്രോണിക്, ആക്റ്റിനിക് ഡെർമറ്റൈറ്റിസ് (Chronic Actinic dermatitis)

വസ്ത്രങ്ങൾ കൊണ്ട് മറയാത്ത ഭാഗങ്ങളിൽ ചർമത്തിൽ ചൊറിച്ചിലും കുരുക്കളും ഉണ്ടാകുന്നു. 50 വയസ്സു കഴിഞ്ഞവരിലാണ് കൂടുതലും കാണുന്നത്. തടിപ്പും ചുവപ്പും രൂക്ഷമായ അവസ്ഥയിൽ, അകത്തേക്ക് സ്റ്റിറോയ്ഡ് കൊടുക്കേണ്ടി വന്നേക്കാം. ശരീരത്തിന്റെ പ്രതിരോധ പ്രവർത്തനങ്ങളെ തടയുന്ന ശക്തമായ ചില മരുന്നുകൾ സൈക്ലോസ്പോറിൻ, അസാൻതയോപ്രിൻ പോലെയുള്ളവ ചിലപ്പോൾ കൊടുക്കാറുണ്ട്. പുറകെ സ്റ്റീറോയ്ഡ് അടങ്ങിയ ലേപനങ്ങളും, ടാക്രോലിമസ് അടങ്ങിയ ലോഷനുകളും കൊടുക്കാറുണ്ട്.

3. സോളാർ അർട്ടിക്കേരിയ (Solar urticaria)

സൂര്യരശ്മി പതിച്ചാൽ ഉടനെ ശരീരത്തിൽ തടിപ്പും ചുവപ്പും ചൊറിച്ചിലും ചിലരിൽ കണ്ടുവരുന്നു. അൾട്രാവയലറ്റ് എ, ബി രശ്മികൾ കൂടുതലുള്ള കാലാവസ്ഥയിൽ ഇത് സാധാരണയായി കണ്ടുവരുന്നു. മിക്കവാറും എല്ലാവരിലും കാണും. പക്ഷേ ചിലർക്ക് പ്രശ്നം കഠിനമാവുകയും തൊലി ചെതുമ്പൽ പോലെ ഇളകി പോവുകയും വെള്ളമൊലിക്കുകയും ചെയ്യും. കുറേ നാൾ ഈ പ്രക്രിയ തുടർന്ന് കൊണ്ടിരുന്നാൽ തൊലി വല്ലാതെ വരണ്ട്, തടിച്ച്, കറുത്ത നിറമാകുന്നതും സാധാരണമാണ്. ചൂട് സമയത്ത് ഈ അസുഖം സ്ഥിരമായി വരുന്നവരിൽ വസ്ത്രംകൊണ്ട് മറയുന്ന ഭാഗത്തും ഈ രോഗലക്ഷണങ്ങൾ കാണപ്പെടുന്നു. ചിലർക്ക് ഇത് ശരീരമാസകലം വരുന്നതായും കണ്ടുവരുന്നു.

4. ഫോട്ടോ ടോക്സിസിറ്റി (Photo toxicity)

ചില ഔഷധങ്ങൾ, അവ കഴിക്കുന്നവരിൽ സൂര്യപ്രകാശം ഏൽക്കുമ്പോൾ ശരീരം പ്രതിപ്രവർത്തനം നടത്തുകയും ചർമത്തിൽ ചുവപ്പ്, തടിപ്പ്, ചൊറിച്ചിൽ, കുരുക്കൾ, എരിച്ചിലോട് കൂടിയ തടിപ്പുകൾ എന്നിവ കാണുകയും ചെയ്യും. ചിലരിൽ ചെറിയ കുമിളകളും പൊള്ളലുകൾ ഉണ്ടാകും. വെയിലേൽക്കുന്ന ഭാഗങ്ങളിലാണ് ഇത് പ്രത്യക്ഷപ്പെടുന്നത്. വേദനസംഹാരികൾ, ആന്റിബയോട്ടിക്സ്, ഹെയർ ഡൈകൾ, ചിലതരം പെർഫ്യൂമുകൾ, നാരങ്ങ പോലെ പുളി കൂടുതലുള്ള പച്ചക്കറികൾ ഇവയാണ് പൊതുവെ ഈ ചർമരോഗം ഉണ്ടാക്കുന്നത്. ഇതിന് സ്റ്റിറോയ്ഡ് അടങ്ങിയ ഗുളികകൾ നൽകേണ്ടിവരും. പുറമെ പുരട്ടാൻ സൺസ്‌ക്രീനുകളും ആവശ്യമാണ്.

5. ഫോട്ടോ അലർജി (Photo allergy)

വളരെ താമസിച്ച് പ്രത്യക്ഷപ്പെടുന്ന ഒരു പ്രതിഭാസമാണ് ഫോട്ടോ അലർജി (Photo allergy). ചിലതരം സുഗന്ധ ലേപനങ്ങൾ, ആന്റിബയോട്ടിക് ഓയിൻമെന്റുകൾ, ചിലതരം സോപ്പുകൾ ഇവ ഉപയോഗിക്കുമ്പോൾ ശരീരത്തിൽ ഇവയ്ക്കെതിരായ പ്രവർത്തനം നടക്കുകയും സൂര്യപ്രകാശം അതിനെ ത്വരിതപ്പെടുത്തുകയും ചെയ്യും. ഇവ ഉപയോഗിച്ച് കുറച്ച് ദിവസങ്ങൾ കഴിഞ്ഞിട്ടായിരിക്കും ഈ ചർമരോഗം ഉണ്ടാകുന്നത് അതുകൊണ്ട് രോഗലക്ഷണങ്ങൾ മാത്രം കണ്ട് ചികിത്സിക്കാതെ രോഗിയോട് ഉപയോഗിച്ച വസ്തുക്കളുടെ ഒക്കെ വിവരങ്ങൾ നന്നായി ചോദിച്ചറിയേണ്ടത് അത്യാവശ്യമാണ്. ഫോട്ടോ പാച്ച് ടെസ്റ്റ് (Photo patch test) എന്ന ഒരു ടെസ്റ്റ് നടത്തിയാൽ ഈ രോഗം കണ്ടുപിടിക്കാനാവും. സ്റ്റിറോയ്ഡ് ലേപനങ്ങൾ പുറമേ പുരട്ടുകയും ഉള്ളിൽ കൊടുക്കുകയും വേണ്ടിവരും.

സൂര്യപ്രകാശം കൊണ്ടുള്ള ചർമരോഗങ്ങൾ തിരിച്ചറിയുന്നത് എങ്ങനെ?

1. വിവരശേഖരണം

രോഗിയുടെ അസുഖത്തിന്റെ കാലയളവ്, എന്ന് തുടങ്ങി, എത്ര നാൾ നീണ്ടുനിന്നു തുടങ്ങി വിശദമായിത്തന്നെ വിവരങ്ങൾ ചോദിച്ചറിയേണ്ടതുണ്ട്. കുടുംബത്തിൽ ആർക്കെങ്കിലും ഇതുപോലെ ഉണ്ടോ എന്നും അന്വേഷിക്കണം. കാരണം ചില ജനിതക രോഗങ്ങൾ, (eg: SLE, Porphyria) ഉള്ളവരിൽ ഈ രോഗലക്ഷണങ്ങൾ കാണാറുണ്ട്. രോഗിയുടെ ജോലി അത്യാവശ്യമായി ചോദിച്ചറിയേണ്ടതാണ്. കൂടുതൽ വെയിലേൽക്കുന്ന പ്രദേശങ്ങളിൽ ജോലി എടുക്കുന്നവർക്ക് അസുഖം വരാനുള്ള സാധ്യത കൂടുതലാണ്. ഏതെങ്കിലും രാസപദാർഥങ്ങളോ ഔഷധങ്ങളോ ഉപയോഗിച്ചതിന് ശേഷമാണോ ഈ ചർമ്മരോഗം വന്നത് എന്നതും തീർച്ചയായും അന്വേഷിക്കേണ്ടതാണ്.

2. പരിശോധന

ശരീരം മുഴുവൻ പരിശോധനയ്ക്ക് വിധേയമാക്കേണ്ടതാണ്. വെയിൽ അധികം കൊള്ളാത്ത ഇടങ്ങളായ കൺപോളകൾ, ചെവിയുടെ പുറകുവശം, ചുണ്ടിന് കീഴ്വശം ഇവിടെയൊന്നും തടിപ്പുകൾ കാണപ്പെടാനിടയില്ല. വസ്ത്രം കൊണ്ട് മറച്ച ഭാഗങ്ങൾ പരിശോധിക്കുമ്പോൾ ഇത് സൂര്യരശ്മി ഏൽക്കുന്നത് കൊണ്ട് ഉണ്ടായതാണോ എന്ന് തിട്ടപ്പെടുത്താനാവും. രോഗലക്ഷണങ്ങൾ ശരിയായി പരിശോധിച്ചാൽ, ഇത് ഏത് വിഭാഗത്തിൽപ്പെട്ട ഫോട്ടോ ഡെർമെറ്റൈറ്റിസ് ആണെന്ന് കണ്ടുപിടിക്കാനാവും.

എന്നിട്ടും ശരിയായ ഒരു രോഗനിർണയത്തിൽ എത്താനായില്ലെങ്കിൽ സ്‌കിൻ ബയോപ്‌സി ചെയ്താൽ നമുക്ക് രോഗം കണ്ടുപിടിക്കാൻ സാധിക്കും. അതിന്റെ കൂടെ രക്തപരിശോധനകൾ, പാച്ച് ടെസ്റ്റിങ് എന്നിവയും നടത്തണം. രോഗനിർണ്ണയത്തിന് ഈ പരിശോധനകൾ വളരെ സഹായകമാണ്.

ചികിത്സ

രാവിലെ 10 മുതൽ നാല് വരെ വെയിൽ ഒഴിവാക്കാൻ രോഗിയോട് നിർദേശിക്കുക. അൾട്രാവയലറ്റ് റേഡിയേഷൻ ഏറ്റവും അധികമുള്ള സമയമാണിത്. കുട, തൊപ്പി, സൺഗ്ലാസ്, ശരീരം നന്നായി മറയുന്ന കോട്ടൺ ഉടുപ്പുകൾ, കടുത്ത നിറമുള്ള തുണികൾ ഇവ ഉപയോഗിക്കാൻ പറയുക.

സാധാരണ ഗ്ലാസിൽ കറുത്ത ഫിലിം ഒട്ടിച്ചാൽ അൾട്രാവയലറ്റ് എ, ബി രശ്മികളെ തടയാനാകും. ഓഫീസുകളിലും വാഹനങ്ങളിലും ഇത് ഉപയോഗിക്കാൻ പ്രോത്സാഹിപ്പിക്കുക. സ്ഥിരമായി സൺസ്‌ക്രീനുകൾ ഉപയോഗിക്കുക. പാര അമിനോ ബെൻസോയിക് ആസിഡ്, സിങ്ക് ഓക്‌സൈഡ് (Para Amino Benzoic Acid, Zinc oxide) എന്നിവ ഒന്നിച്ചോ വെവ്വേറെയോ ഉപയോഗിച്ചാൽ ഒരളവ് വരെ ഈ ചർമ്മരോഗങ്ങൾ തടയാനാവും. വെയിലേൽക്കുന്നതിന് 20-30 മിനിറ്റ് മുമ്പ് ഇത് പുരട്ടണം മൂന്ന് നാല് മണിക്കൂർ കഴിഞ്ഞ് വീണ്ടും പുരട്ടണം. നല്ല അളവിൽ, വെയിലേൽക്കുന്ന ഭാഗങ്ങളിൽ പുരട്ടേണ്ടിവരും.

പച്ചക്കറികൾ, പഴവർഗ്ഗങ്ങൾ എന്നിവ ധാരാളമായി കഴിക്കുന്നതും ഒരു ചികിത്സയാണ്. ബീറ്റാ കരോട്ടിൻ, ക്ലോറോക്വിൻ, ഇവയൊക്കെ ഉള്ളിൽ കഴിക്കുന്ന സൺസ്‌ക്രീനുകൾ ആണ്. ശ്രദ്ധിച്ചാൽ കടുത്ത ചൂടിൽ നിന്നും ചർമരോഗങ്ങളെ നമുക്ക് പ്രതിരോധിക്കാനാവും.