തേനില്‍ മഞ്ഞള്‍ ചേര്‍ത്ത് ദിവസേന രാവിലെ വെറും വയറ്റില്‍ കഴിച്ചാലുളള ആരോ​ഗ്യ ഗുണങ്ങൾ എന്തൊക്കെയാണെന്ന് നോക്കാം..

മഞ്ഞളിനും തേനിനും നിരവധി ആരോഗ്യ വശങ്ങളുണ്ട്. അതിനാല്‍ തന്നെ ചിലര്‍ തേന്‍ വെറുതേ കഴിക്കുന്നത് കാണാം. അതുപോലെ, ചൂടുവെള്ളത്തില്‍ മഞ്ഞള്‍ ചാലിച്ച് കുടിക്കുന്നതും കാണാറുണ്ട്.

തേനും മഞ്ഞളും

തേനും മഞ്ഞളും ചാലിച്ച് കാഴിച്ചാല്‍ നമ്മളുടെ രോഗപ്രതിരോധശേഷി വര്‍ദ്ധിപ്പിക്കാന്‍ ഇത് വളരെയധികം സഹായിക്കുന്നുണ്ട്. പ്രത്യേകിച്ച്, കഫക്കെട്ട്, തുമ്മല്‍, ഇടയ്ക്കിടയ്ക്ക് അസുഖം വരുന്നത് എന്നിങ്ങനെയുള്ള ആരോഗ്യ പ്രശ്‌നങ്ങള്‍ നിങ്ങളെ അലട്ടുന്നുണ്ടെങ്കില്‍ എന്നും രാവിലെ തേനില്‍ കുറച്ച് മഞ്ഞള്‍ ചാലിച്ച് കഴിക്കുന്നത് നല്ലതാണ്.മഞ്ഞളില്‍ അടങ്ങിയിരിക്കുന്ന കര്‍കുമിനോയ്ഡ്, പോളിഫെനോള്‍ എന്നിവയ്ക്ക് മുറിവ് വേഗത്തില്‍ ഉണക്കി എടുക്കാനുള്ള ശേഷിയുണ്ട്. ഇത് അണുബാധ വരാതിരിക്കാന്‍ സഹായിക്കുന്നു. അതുപോലെ, ഇതില്‍ അടങ്ങിയിരിക്കുന്ന ആന്റിഓക്‌സിഡന്റ്‌സ് ചര്‍മ്മ സംരക്ഷണത്തിനും സഹായിക്കുന്നുണ്ട്.

മഞ്ഞള്‍ പോലെ തന്നെ തേനും ആരോഗ്യത്തിനും ചര്‍മ്മ സംരക്ഷണത്തിനും നല്ലതാണ്. ഇത് ശരീരത്തില്‍ അണുബാധ വരാതിരിക്കാന്‍ സഹായിക്കുന്നു, അതുപോലെ, പൊള്ളല്‍ ഏറ്റ ഭാഗത്ത് വീക്കം കുറയ്ക്കാനും ചര്‍മ്മത്തെ മോയ്‌സ്ച്വര്‍ ചെയ്ത് നിലനിര്‍ത്താനും അലര്‍ജി കുറയ്ക്കാനും ഇത് സഹായിക്കുന്നുണ്ട്.

കഴിക്കേണ്ട വിധം

ഇത് കഴിക്കുന്നതിനായി ആദ്യം തന്നെ ഒരു ടീസ്പൂണ്‍ തേന്‍ എടുക്കണം. ഇതിലേയ്ക്ക് അര ടീസ്പൂണ്‍ നല്ല മഞ്ഞള്‍പ്പൊടിയും ചേര്‍ത്ത് രാവിലെ വെറും വയറ്റില്‍ കഴിക്കുന്നത് ശീലമാക്കുക. ഇത് കുട്ടികള്‍ക്കു മുതിര്‍ന്നവര്‍ക്കും പിന്തുരടാവുന്നതാണ്.ഇങ്ങനെയല്ലെങ്കില്‍ പാലിന്റെ കൂടെ മഞ്ഞളും തേനും ചേര്‍ത്ത് കഴിക്കാവുന്നതാണ്. അതുപോലെ, ചെറു ചൂടുവെള്ളത്തില്‍ തേനും മഞ്ഞള്‍പ്പൊടിയും ചേര്‍ത്ത് കഴിക്കുന്നതും നല്ലതാണ്.മുഖം തിളങ്ങാൻ മഞ്ഞളും തേനും.

കഴിച്ചാല്‍ ശരീരത്തില്‍ സംഭവിക്കുന്ന മാറ്റങ്ങള്‍

ഇത് ദിവസേന കഴിക്കുന്നത് ശീലമാക്കിയാല്‍ ആരോഗ്യം മാത്രമല്ല, നല്ല തിളക്കമുള്ള ചര്‍മ്മം ലഭിക്കുന്നതിനും ഇത് സഹായിക്കുന്നുണ്ട്. കുരുക്കള്‍ വരാതിരിക്കാനും ചര്‍മ്മത്തിന് നല്ല തിളക്കം ലഭിക്കുന്നതിനും മുഖത്തെ കറുത്തപാടുകളും കരുവാളിപ്പും മാറ്റുന്നതിനും ഇത് സഹായിക്കുന്നുണ്ട്.

കഴിക്കുന്നത് പോലെ തന്നെ ഇത് മുഖത്ത് പുരട്ടാവുന്നതും ആണ്. ഇത്തരത്തില്‍ മുഖത്ത് സ്ഥിരമായി പുരട്ടിയാല്‍ നല്ല തിളക്കമുള്ള ചര്‍മ്മം ലഭികാനും ചര്‍മ്മത്തിലെ വരള്‍ച്ച മാറ്റി കിട്ടാനും ഇത് സഹായിക്കും.