സ്തനാർബുദ സാധ്യത തടയാൻ സ്ത്രീകൾ ശ്രദ്ധിക്കേണ്ട ചില ജീവിതശൈലി മാറ്റങ്ങൾ ഇതാ...

സ്തനാർബുദത്തിന്റെ ലക്ഷണങ്ങളെക്കുറിച്ചും രോഗം കണ്ടുപിടിക്കേണ്ട വിധങ്ങളെക്കുറിച്ചും ചികിത്സാരീതികളെക്കുറിച്ചുമെല്ലാം സ്ത്രീകൾക്ക് ബോധവൽക്കരണം നൽകുക എന്ന ലക്ഷ്യത്തോടെയാണ് ലോകാരോ​ഗ്യ സംഘടന ഒക്ടോബർ മാസം സ്തനാർബുദമാസമായി ആചരിക്കുന്നത്. സ്തനാർബുദത്തെ കുറിച്ച് കൂടുതൽ അവബോധം ഉണ്ടാക്കാനും ആരംഭത്തിൽ തന്നെ രോഗ നിർണ്ണയം നടത്താനും സ്തനാർബുദബാധിതരെ പിന്തുണയ്ക്കാനും വിവിധ സന്നദ്ധസംഘടനകളും ആശുപത്രികളും മറ്റ് ആരോഗ്യ കേന്ദ്രങ്ങളും ഈ കാലയളവിൽ വിവിധ പ്രചാരണ പരിപാടികൾ നടത്തി വരികയാണ്.സ്തനാർബുദ കേസുകൾ വർദ്ധിച്ചുവരുന്നത് പലരിലും ആശങ്കയുണ്ടാക്കുന്നു. രോഗലക്ഷണങ്ങൾ, പ്രതിരോധം, തുടങ്ങിയവയെക്കുറിച്ച് കൂടുതൽ ആളുകളിൽ അവബോധം ഉണ്ടാക്കിയെടുക്കേണ്ടത് പ്രധാനമാണ്.

ആരോഗ്യകരമായ ഭാരം : ശരീരഭാരം എല്ലായ്പ്പോഴും ബോഡി മാസ് ഇൻഡക്‌സിന് (ബിഎംഐ) അനുസൃതമായിരിക്കണം. അമിതഭാരം കാൻസറിനുള്ള സാധ്യത കൂട്ടുകയും അല്ലാത്തപക്ഷം ആരോഗ്യത്തെ ബാധിക്കുകയും ചെയ്യും.

ചിട്ടയായ വ്യായാമം : വ്യായാമം ചെയ്യുന്നത് സ്തനാർബുദ സാധ്യത കുറയ്ക്കും. പൊതുവേ, വ്യായാമം ആരോഗ്യത്തിന്റെ അപകടസാധ്യത കുറയ്ക്കുന്നു. 30 മിനിറ്റ് മിതമായ വ്യായാമം ചെയ്യുക.,എല്ലാ ദിവസവും ഇല്ലെങ്കിൽ, ആഴ്ചയിൽ 4 ദിവസം വ്യായാമം നിർബന്ധമായും ചെയ്യണം.

ആരോഗ്യകരമായ ഭക്ഷണക്രമം : ധാന്യങ്ങൾ, പച്ചക്കറികൾ, പയർവർഗ്ഗങ്ങൾ, പയർ, പഴങ്ങൾ എന്നിവയുടെ അളവ് വർദ്ധിപ്പിക്കുന്നതും സ്തനാർബുദ സാധ്യത തടയാൻ സഹായിക്കുന്നു.

പതിവ് പരിശോധന: മാമോഗ്രാം, പാപ്പ് ടെസ്റ്റുകൾ എന്നിവ പോലെയുള്ള പതിവ് സ്ക്രീനിംഗുകൾ കോ​ഗം നേരത്തെ തന്നെ കണ്ടുപിടിക്കാൻ സഹായിക്കും.

കാർബോഹൈഡ്രേറ്റുകളും പഞ്ചസാരയും പരിമിതപ്പെടുത്തുക: മധുരമുള്ള ഭക്ഷണം, പാനീയങ്ങൾ, ശുദ്ധീകരിച്ച കാർബോഹൈഡ്രേറ്റ് എന്നിവയുടെ ഉപയോഗം പരിമിതപ്പെടുത്തുക.

പുകവലി ഉപേക്ഷിക്കുക: ശ്വാസകോശ കാൻസറിനുള്ള പ്രധാന കാരണം പുകവലിയാണ്, എന്നാൽ ഇത് സെർവിക്കൽ, ബ്ലാഡർ അർബുദം ഉൾപ്പെടെയുള്ള മറ്റ് പല തരത്തിലുള്ള കാൻസറുകളുമായും ബന്ധപ്പെട്ടിരിക്കുന്നു. അർബുദ സാധ്യത കുറയ്ക്കാൻ സ്ത്രീകൾക്ക് ചെയ്യാവുന്ന ഏറ്റവും പ്രധാനപ്പെട്ട കാര്യമാണ് പുകവലി ഉപേക്ഷിക്കുന്നത്.