വായിലെ കാൻസറിന്റെ ലക്ഷണങ്ങൾ എന്തൊക്കെയാണെന്ന് നോക്കാം..

ചുണ്ടുകൾ, നാവ്, മോണ, കവിളുകളുടെ ആവരണം എന്നിവയുൾപ്പെടെ വായയുടെ ഏത് ഭാഗത്തെയും ബാധിക്കുന്ന അർബുദത്തെ ഓറൽ കാൻസർ എന്ന് പറയുന്നു. വായിലെ അർബുദം ഗുരുതരവും ജീവൻ അപകടപ്പെടുത്തുന്നതുമായ ഒരു രോഗമാണെങ്കിലും നേരത്തെയുള്ള കണ്ടെത്തൽ രോ​ഗം ​ഗുരുതരമാകാനുള്ള സാധ്യത കുറയ്ക്കുന്നു.

പുകവലിക്കാർക്ക് മാത്രമല്ല, മദ്യം കഴിക്കുന്നവർക്കും വായിൽ കാൻസർ വരാനുള്ള സാധ്യത കൂടുതലാണ്. ഇതുകൂടാതെ, ഹ്യൂമൻ പാപ്പിലോമ വൈറസും (HPV) വായിൽ കാൻസറിനുള്ള പ്രധാന കാരണങ്ങളിലൊന്നാണെന്ന് ഗവേഷണങ്ങൾ സൂചിപ്പിക്കുന്നു.

സ്ഥിരമായ ബ്രഷിംഗ്, ഫ്ലോസിംഗ്, മൗത്ത് വാഷ് ഉപയോഗം തുടങ്ങിയ ഉചിതമായ ശുചിത്വ രീതികൾ പാലിക്കുന്നത് വായിലെ കാൻസർ തടയുന്നതിന് അത്യന്താപേക്ഷിതമാണ്. ഓറൽ കാൻസർ വരാനുള്ള സാധ്യത കുറയ്ക്കുന്നതിന്, പുകയിലയുടെ ഉപയോഗം ഒഴിവാക്കുകയും മിതമായ അളവിൽ മദ്യം കഴിക്കുകയും ചെയ്യേണ്ടത് അത്യാവശ്യമാണ്.

ചികിത്സയുടെ ഫലങ്ങൾ മെച്ചപ്പെടുത്തുന്നതിനും അതിജീവന നിരക്ക് വർദ്ധിപ്പിക്കുന്നതിനും വായിലെ അർബുദം നേരത്തെ കണ്ടെത്തേണ്ടത് അത്യാവശ്യമാണ്. ഒരു ദന്ത പരിശോധനയ്ക്കിടെ വ്രണങ്ങൾ, അല്ലെങ്കിൽ ടിഷ്യുവിന്റെ നിറത്തിലോ ഘടനയിലോ ഉള്ള മാറ്റങ്ങൾ പോലുള്ള അസാധാരണത്വങ്ങളുടെയോ മാറ്റങ്ങളുടെയോ ലക്ഷണങ്ങൾ ഉണ്ടെങ്കിൽ കാൻസർ കോശങ്ങളുടെ സാന്നിധ്യം സ്ഥിരീകരിക്കാൻ ഒരു ബയോപ്സിക്ക് വിധേയമാക്കേണ്ടത് പ്രധാനമാണ്.

ലൈംഗിക സമ്പർക്കത്തിലൂടെ പകരുന്ന ഹ്യൂമൻ പാപ്പിലോമ വൈറസിന്റെ (HPV) ചില സ്‌ട്രെയിനുകൾ വായിലെ കാൻസറിന് കാരണമാകും. ഒന്നിലധികം ലൈംഗിക പങ്കാളികളുള്ളവരോ ഓറൽ സെക്‌സിൽ ഏർപ്പെടുന്നവരോ ആയ ആളുകൾക്ക് ഈ അപകടസാധ്യത കൂടുതലാണ്.

വായയിലെ കാൻസറിന്റെ ലക്ഷണങ്ങൾ...

വായിൽ സ്ഥിരമായി വ്രണങ്ങൾ വരിക.
നാക്കിലോ മോണയിലോ ചുവപ്പോ വെള്ളയോ പാടുകൾ
വിഴുങ്ങാനോ സംസാരിക്കാനോ ബുദ്ധിമുട്ട്.
പരുക്കൻ ശബ്ദം അല്ലെങ്കിൽ ശബ്ദത്തിലെ മാറ്റങ്ങൾ.
ചെവി വേദന അല്ലെങ്കിൽ നിരന്തരമായ തൊണ്ടവേദന.
വായിലോ ചുണ്ടിലോ മരവിപ്പ് അല്ലെങ്കിൽ വേദന.