വരണ്ട ചർമ്മം അകറ്റാൻ വീട്ടിൽത്തന്നെയുള്ള ചില പ്രതിവിധികൾ അറിയാം

വരണ്ട ചർമ്മമാണോ നിങ്ങളുടേത്? വരണ്ട ചർമ്മമുള്ളവർക്ക് ചർമ്മ സംരക്ഷണം കുറച്ച് ബുദ്ധിമുട്ടുള്ള കാര്യമാണ്. പല കാരണങ്ങൾ കൊണ്ടും ചർമ്മം വരണ്ടതാകാൻ സാധ്യതയുണ്ട്. അതിൽ ഏറ്റവും പ്രധാനം ശരീരത്തിന് ആവശ്യമായ വെള്ളം ലഭിക്കാത്തത് കൊണ്ടാണെന്നാണ് വിദഗ്ധർ പറയുന്നു. വെള്ളം ധാരാളമായി കുടിക്കുന്നത് ശരീരത്തിന് മാത്രമല്ല ചർമ്മത്തിൻറെ ആരോഗ്യത്തിനും നല്ലതാണ്.

ഒന്ന്

ഒരു പഴത്തിൻറെ പൾപ്പും നന്നായി വിളഞ്ഞ അവോക്കാഡോയും അൽപം തേനും ചേർത്ത് പേസ്റ്റ് രൂപത്തിൽ ആക്കുക. ശേഷം ഈ മിശ്രിതം മുഖത്ത് പുരട്ടാം. ഒരു മണിക്കൂറിന് ശേഷം ചെറുചൂടുവെള്ളത്തിൽ കഴുകാം. വരണ്ട ചർമ്മമുള്ളവർക്ക് പരീക്ഷിക്കാവുന്ന ഒരു പാക്കാണിത്. അവോക്കാഡോ ചർമ്മത്തിന് തിളക്കം നൽകാൻ സഹായിക്കുന്നു.

രണ്ട്

വെളിച്ചെണ്ണ നല്ലൊരു മോയ്സ്ച്യുറൈസറാണ്. ഇളം ചൂടുള്ള വെളിച്ചെണ്ണ മുഖത്ത് പതിയെ മസാജ് ചെയ്യുക. എണ്ണ രാത്രി മുഴുവൻ നേരം ഇട്ടേക്കുക. എല്ലാ ദിവസവും ഉറങ്ങുന്നതിനു മുൻപ് ഇങ്ങനെ ചെയ്യുക. വെളിച്ചെണ്ണയിൽ പ്രകൃതിദത്ത വിറ്റാമിനുകളും അമിനോ ആസിഡുകളും അടങ്ങിയിരിക്കുന്നതിനാൽ ടാൻ നീക്കം ചെയ്യാൻ സഹായിക്കും. ചർമ്മത്തിൽ നിന്ന് ടാനിംഗ് നീക്കം ചെയ്യുന്നതിനു പുറമേ അണുബാധകളും ഫംഗസ് വളർച്ചയും തടയുന്നതിനും സഹായകമാണ്.

മൂന്ന്

കറ്റാർവാഴ വരണ്ട ചർമ്മമുള്ളവർക്ക് കറ്റാർവാഴ മികച്ചതാണ്. വരണ്ട കൈകളിലോ കാലുകളിലോ കറ്റാർവാഴ ജെൽ പുരട്ടുക. കറ്റാർവാഴ ഒരു വൈറ്റമിൻ സമ്പുഷ്ടമായ ഒരു സസ്യമാണ്. കറ്റാർവാഴ ഒരു മികച്ച പ്രകൃതിദത്ത മോയ്സ്ചറൈസറാണ്. വരണ്ട ചർമ്മത്തെ ശമിപ്പിക്കാൻ സഹായിക്കും. ഇതിന് ആൻറി-ഇൻഫ്ലമേറ്ററി ഗുണങ്ങളും ഉണ്ട്.