നഖം പൊട്ടുന്നത് തടയാൻ ഭക്ഷണത്തിൽ ഉൾപ്പെടുത്താവുന്ന പോഷകങ്ങൾ നോക്കാം..

ശരീരത്തിന്‍റെ വിവിധ പ്രവര്‍ത്തനങ്ങള്‍ക്ക് അവശ്യം വേണ്ടുന്ന ഘടകങ്ങള്‍ പ്രധാനമായും ഭക്ഷണത്തിലൂടെയാണ് നാം നേടുന്നത്. ഭക്ഷണത്തിലൂടെ ഇവ ലഭിക്കുന്നത് കുറയുന്നത് സ്വാഭാവികമായും പല രീതിയിലും ശരീരത്തില്‍ പ്രതിഫലിച്ചുകാണും. ഇത്തരത്തില്‍ അവശ്യഘടകങ്ങളുടെ കുറവ് മൂലം കണ്ടേക്കാവുന്നൊരു പ്രശ്നമാണ് നഖങ്ങള്‍ ഇടയ്ക്കിടെ പൊട്ടിപ്പോകുന്ന അവസ്ഥ. ഭക്ഷണത്തിലെ പ്രശ്നങ്ങള്‍ മാത്രമല്ല നഖത്തിന്‍റെ ആരോഗ്യത്തെ ബാധിക്കുക. എന്നാല്‍ ഭക്ഷണം വലിയൊരു ഘടകമാണെന്ന് മാത്രം.

മുട്ട...

എല്ലുകളുടെയും നഖത്തിന്‍റെയുമെല്ലാം ആരോഗ്യത്തിന് പ്രോട്ടീൻ നിര്‍ബന്ധമായും വേണം. പ്രോട്ടീന്‍റെ നല്ലൊരു സ്രോതസാണ് മുട്ട. അതിനാലാണ് നഖം പൊട്ടുന്നത് തടയാൻ മുട്ട കഴിക്കുന്നത്. നഖങ്ങളെ ബലപ്പെടുത്തുന്ന കെരാട്ടിൻ, കൊളാജെൻ എന്നിവയുടെ ഉത്പാദനത്തിന് പ്രോട്ടീൻ സഹായിക്കുന്നു.

മത്സ്യം...

ഒമേഗ- 3 ഫാറ്റി ആസിഡിന്‍റെ ഏറ്റവും മികച്ച ഉറവിടമാണ് മത്സ്യം. ഇത് നഖത്തിനെ ജലാംശമുള്ളതാക്കി നിര്‍ത്താനും പൊട്ടുന്നത് തടയാനുമെല്ലാം സഹായിക്കുന്നു.

പാല്‍...

എല്ലുകളുടെയും പല്ലുകളുടെയുമെല്ലാം വളര്‍ച്ചയ്ക്കും ആരോഗ്യത്തിനും അവശ്യം വേണ്ടുന്നൊരു ഘടകമാണ് കാത്സ്യം. പാല്‍ ആണ് കാത്സ്യത്തിന്‍റെ ഏറ്റവും നല്ല സ്രോതസ്. അതിനാല്‍ നഖങ്ങളുടെ ആരോഗ്യം മെച്ചപ്പെടുത്തുന്നതിനും പതിവായി പാല്‍ കഴിക്കാവുന്നതാണ്. പാല്‍ അലര്‍ജിയുള്ളവര്‍ ഇക്കാര്യം മനസിലാക്കി പാല്‍ ഒഴിവാക്കി പകരം കാത്സ്യത്തിന്‍റെ മറ്റ് സ്രോതസുകളെ ആശ്രയിക്കുക.

ചെറുനാരങ്ങ...

ചെറുനാരങ്ങയില്‍ അടങ്ങിയിരിക്കുന്ന ഫോളിക് ആസിഡ്, വൈറ്റമിൻ ബി9 എന്നിവ നഖങ്ങളുടെ ആരോഗ്യത്തെ സ്വാധീനിക്കുന്ന ഘടകങ്ങളാണ്. നഖം ബലമുള്ളതായി തീരാനും പൊട്ടുന്നത് തടയാനുമെല്ലാം ഇവ സഹായിക്കുന്നു.