കാര്‍ നടപ്പാതയിലേക്ക് പാഞ്ഞുകയറി രണ്ട്  കാല്‍നടയാത്രക്കാര്‍ മരിച്ചു; ആറുപേര്‍ക്ക് പരിക്ക്

ചെന്നൈ: കാര്‍ നടപ്പാതയിലേക്ക് പാഞ്ഞുകയറി രണ്ട് കാല്‍നടയാത്രക്കാര്‍ മരിച്ചു. വിദ്യാര്‍ത്ഥിയായ വിജയ് യാദവ് (21), സെക്യൂരിറ്റി ജീവനക്കാരന്‍ നാഗസുന്ദരം (74) എന്നിവരാണ് മരിച്ചത്. ആറുപേര്‍ക്ക് പരിക്കേറ്റു. ഇതില്‍ രണ്ടുപേരുടെ പരിക്ക് ഗുരുതരമാണ്.

ചെന്നൈ അണ്ണാനഗറിലായിരുന്നു സംഭവം. അമിതവേഗതയില്‍ കുതിച്ചെത്തിയ കാര്‍ നിയന്ത്രണംവിട്ട് നടപ്പാതയിലുണ്ടായിരുന്നവരെ ഇടിച്ചു തെറിപ്പിക്കുകയായിരുന്നു. ഡ്രൈവര്‍ മദ്യലഹരിയിലായിരുന്നുവെന്നാണ് റിപ്പോര്‍ട്ട്. 

കാറിലുണ്ടായിരുന്ന യുവാക്കള്‍ രക്ഷപ്പെടാന്‍ ശ്രമിച്ചെങ്കിലും നാട്ടുകാര്‍ പിടികൂടി പോലീസില്‍ ഏല്‍പ്പിച്ചു. അപകടത്തിന്റെ സി.സി.ടിവി ദൃശ്യങ്ങള്‍ പുറത്തു വന്നിരുന്നു.  ദീപാവലി ആഘോഷങ്ങള്‍ക്ക് ശേഷം വരുമ്പോഴായിരുന്നു അപകടം.