ഫ്ളോറിഡ: തന്റെ മുന് അധ്യാപകന് തന്നെ ലൈംഗികമായി ദുരുപയോഗം ചെയ്തതിനെക്കുറിച്ച് വെളിപ്പെടുത്തലുമായി 28കാരി രംഗത്ത്. തന്റെ ഇന്സ്റ്റഗ്രാം പോസ്റ്റിലൂടെയാണ് യുവതി തന്റെ മുന് പരിശീലകനും ലോംഗ് ഐലന്ഡ് ഹൈസ്കൂളിലെ ടീച്ചറുമായ വ്യക്തിയെക്കുറിച്ച് വെളിപ്പെടുത്തല് നടത്തിയത്. ഇപ്പോള് ഫ്ളോറിഡയില് താമസിക്കുന്ന ബ്രിട്ടാനി റോള് എന്ന യുവതിയുടെ ഇന്സ്റ്റഗ്രാം പോസ്റ്റ് ഇതിനകം വൈറലായിക്കഴിഞ്ഞു.
തന്റെ ഇന്സ്റ്റഗ്രാം പോസ്റ്റ് ബാബിലോണ് ബോര്ഡ് ഓഫ് എഡ്യൂക്കേഷനുള്ള തുറന്ന കത്ത് എന്ന രീതിയിലാണ് ബ്രിട്ടാനി പോസ്റ്റ് ചെയ്തിരിക്കുന്നത്. കുട്ടികളുമായി ഇടപെടുന്ന അധ്യാപകര് അവരെ ദുരുപയോഗം ചെയ്യുന്നതിനെക്കുറിച്ചും നോ പറയേണ്ടിടത്ത് നോ പറയാന് കുട്ടികളെ പ്രാപ്തരാക്കേണ്ടതിനെക്കുറിച്ചും ബ്രിട്ടാനി തന്റെ പോസ്റ്റില് കുറിച്ചു.
തനിക്ക് പതിനെട്ട് വയസ്സാകുന്നതു വരെ കാത്തിരുന്നതിന് ശേഷം ബര്ത്ഡേയുടെ ആ ആഴ്ത തന്നെ താനുമായി ലൈംഗിക ബന്ധത്തിലേര്പ്പെട്ട അധ്യാപകനെക്കുറിച്ചും യുവതി വെളിപ്പെടുത്തി. മോശം പെരുമാറ്റത്തെത്തുടര്ന്ന് ഒരു ബാബിലോണ് അധ്യാപകനെ സ്കൂളില് നിന്ന് പുറത്താക്കിയിരുന്നു. അതിനു ശേഷമാണ് തനിക്ക് കാര്യങ്ങള് തുറന്നു പറയാനുള്ള ധൈര്യമുണ്ടായതെന്ന് ബ്രിട്ടാനി പറഞ്ഞു.
അധ്യാപകരില് നിന്നും മറ്റ് മുതിര്ന്നവരില് നിന്നും മോശം പെരുമാറ്റം നേരിടേണ്ടി വന്നവര് അക്കാര്യം സമൂഹത്തിന് മുന്നില് തുറന്നു പറയാന് മടി കാണിക്കുകയാണ്. താന് എല്ലാ കാര്യങ്ങളും തുറന്നു പറയുന്നതിലൂടെ ഇരയാക്കപ്പെട്ട കുറച്ചു പേരെങ്കിലും അത് മാതൃകയാക്കുമെന്ന് കരുതുന്നതായും ബ്രിട്ടാനി പറഞ്ഞു. 2011-ല് ബിരുദ പഠനത്തിന്റെ സമയത്ത് തന്റെ വിശ്വാസം നേടിയെടുക്കാന് പ്രയത്നിച്ചിരുന്ന ഒരു അധ്യാപകനെക്കുറിച്ചും ബ്രിട്ടാനി തുറന്നെഴുതി.
അക്കാലത്ത് മുപ്പതുകളുടെ മധ്യത്തില് പ്രായമുള്ള ടീച്ചര് തന്റെ വിശ്വാസം നേടുന്നതിന് പ്രത്യേക ശ്രദ്ധ കാണിച്ചിരുന്നുവെന്ന് ബ്രിട്ടാനി പറഞ്ഞു. ഞാന് പലയിടത്തും ഒറ്റപ്പെടുന്നതായി എന്നെ തോന്നിപ്പിക്കാന് അയാള്ക്ക് സാധിച്ചു. എന്നാല് അയാള് എപ്പോഴും എന്റെ കൂടെയുണ്ടെന്ന് വിശ്വസിപ്പിക്കുന്നതിലും അയാള് വിജയിച്ചു. ട്രാക്കിലും അക്കാദമിക് മികവിലും എപ്പോഴും അയാള് അഭിനന്ദിച്ചു.
എന്നാല് അയാളുടെ സ്നേഹവും വിശ്വാസവുമെല്ലാം കൂടുതല് വെളിപ്പെടുത്തത് തൊട്ടടുത്ത വര്ഷമാണ്. താനുമായി ഡേറ്റിംഗ് നടത്തണമെന്ന് അയാള് ആവശ്യപ്പെട്ടു. തനിക്ക് പതിനെട്ട് വയസ്സ് തികയുന്ന ദിവസം വരെ അയാള് കാത്തിരുന്നുവെന്നും ആ ആഴ്ചയില്തന്നെ അയാളുടെ വീട്ടില് കൊണ്ടുപോയി ലൈംഗിക ബന്ധത്തിലേര്പ്പെട്ടു എന്നും യുവതി വെളിപ്പെടുത്തി.
എന്നാല് നോ എന്നു പറയാന് കഴിയാത്ത വിധമാണ് താന് ട്രെയിന് ചെയ്യപ്പെട്ടത്. ഇഷ്ടമില്ലാതിരുന്ന കാര്യമായിരുന്നിട്ടും അത് വേണ്ടെന്ന് വെക്കാനും ഒഴിഞ്ഞുമാറാനും തടയാനും തനിക്ക് സാധിച്ചില്ല. ഫോര്ഡാം യൂണിവേഴ്സിറ്റിയില് ചേര്ന്നതിന് ശേഷവും അധ്യാപകനുമായുള്ള ഇടപെടലുകള് തുടര്ന്നു. എന്നാല് താനുമായുള്ള ബന്ധം ഭാര്യയും കുടുംബവും അറിയാതിരിക്കാന് അയാള് പ്രത്യേകം ശ്രദ്ധിച്ചിരുന്നുവെന്നും ബ്രിട്ടാനി എഴുതി.
ഒടുവില് എങ്ങനെയോ ആ ബന്ധം അവസാനിച്ചു. അയാള് ഇപ്പോഴും അധ്യാപകനായി തുടരുന്നുണ്ട്. പ്രായപൂര്ത്തിയാകാത്ത കുട്ടികളെ പ്രണയത്തില്പ്പെടുത്തി വഞ്ചിക്കാന് അയാള് ഇനിയും ശ്രമിച്ചേക്കുമെന്നും ബ്രിട്ടാനി ബാബിലോണ യൂണിവേഴ്സിറ്റിക്ക് എന്ന് കാണിച്ചുകൊണ്ടുള്ള കത്തില് എഴുതി.