കേരളത്തിലെ ആദ്യത്തെ കൃഷ്ണശിലാധ്വജം പനയന്നൂർക്കാവിൽ ; പ്രതിഷ്ഠാച്ചടങ്ങുകൾ ഏപ്രിൽ 3ന് തലവടിയിൽ

കുട്ടനാട്: കേരളത്തിലെ ആദ്യത്തെ കൃഷ്ണശിലാധ്വജത്തിന്റെ നിർമ്മാണം തലവടി പനയന്നൂർക്കാവ് ഭഗവതിക്ഷേത്രത്തിൽ പൂർത്തിയായി. പൂർണ്ണമായും ശിലയിൽ നിർമ്മിച്ച കൊടിമരത്തിന്റെ പ്രതിഷ്ഠാകർമ്മം ഏപ്രിൽ 3ന് നടക്കുമെന്ന് ക്ഷേത്രം
ഭാരവാഹികൾ അറിയിച്ചു. 44 അടി ഉയരമുള്ള കൊടിമരത്തിന്റെ ആധാരശിലയുടെ ഭാരം 6 ടൺ ആണ്. നിറയെ കൊത്തുപണികളുള്ള കൊടിമരത്തിന്റെ ഏറ്റവും താഴെ ചതുരാകൃതിയിലും അതിന് മുകളിൽ എട്ടു കോണുകളും അതിനു മുകളിൽ 16 കോണുകളും മുകളിൽ വൃത്താകൃതിയിലുമായാണ് നിർമ്മാണം. തിരുവൻവണ്ടൂർ തുളസീതീർത്ഥത്തിൽ ബാലകൃഷ്ണൻ ആചാരി (ബാലു) യാണ് മുഖ്യശില്പി.

88 ദിവസം കൊണ്ടാണ് നിർമ്മാണം പൂർത്തിയായത്. ശിലയെത്തിച്ചത് എഴുമറ്റൂരിൽ നിന്നുമാണ്. ക്ഷേത്രം തന്ത്രി പട്ടമന നീലകണ്ഠരര് പരമേശ്വരര് ആനന്ദിന്റെ മുഖ്യകാർമ്മികത്വത്തിൽ തിങ്കളാഴ്ച രാവിലെ 6:28നും 6:55നും മധ്യേയുള്ള ശുഭമുഹൂർത്തിൽ പതിനഞ്ചിൽപ്പരം താന്ത്രികശ്രേഷ്ഠർ പങ്കെടുക്കുന്ന ചടങ്ങിൽ ധ്വജപ്രതിഷ്ഠ നടക്കും. കുളനട തുണ്ടിൽ കിഴക്കേതിൽ ഇടപ്പുരയിൽ സന്തോഷും ഭാര്യ ഓമല്ലൂർ വടക്കേവീട്ടിൽ ശ്രീമോൾ സന്തോഷും കുടുംബവുമാണ് ക്ഷേത്രത്തിലേയ്ക്ക് കൊടിമരം വഴിപാടായി നിർമ്മിച്ചു നൽകിയത്.