നല്ലൊരു സുഹൃത്തിനെ ആവശ്യമുണ്ട്. ധാരാളം വായിക്കുന്ന ആളാകണം, യാത്രകള്‍, സിനിമ ഇഷ്ടമുള്ള ആളാകണം ; ശ്രദ്ധനേടി ഫെയ്‌സ്‌ബുക്ക്‌ പോസ്റ്റ്

സോഷ്യൽ മീഡിയയിൽ ശ്രദ്ധനേടി 'സുഹൃത്തിനെ ആവശ്യമുണ്ട്' എന്ന ഫെയ്‌സ്‌ബുക്ക്‌ പോസ്റ്റ്. ഇടയ്ക്ക് വെച്ച ഇട്ടിട്ട് പോകാത്തൊരു സൗഹൃദം വേണം എന്ന ആവശ്യവുമായി രമണി പൂപ്പറമ്പില്‍ എന്ന തൃശൂര്‍ സ്വദേശിയാണ് ഫെയ്‌സ്‌ബുക്കില്‍ പോസ്റ്റ് ഇട്ടിരിക്കുന്നത്.

"വരനെ ആവശ്യമുണ്ട് വധുവിനെ ആവശ്യമുണ്ട് എന്ന് പറയുമ്പോലെ നല്ലൊരു സുഹൃത്തിനെ ആവശ്യമുണ്ട്. ധാരാളം വായിക്കുന്ന ആളാകണം, യാത്രകള്‍ സിനിമ ഇഷ്ടമുള്ള ആളാകണം, ഉത്തരവാദിത്വങ്ങളൊഴിഞ്ഞ് ഫ്രീയായ ആളാകണം. 60 വയസ്സിന് മുകളില്‍ അല്‍പ്പം മെച്ചൂരിറ്റി ഉണ്ടായിക്കോട്ടെ, സമയമുള്ളപ്പോഴൊക്കെ സംസാരിക്കാന്‍ വരണം, ഒഴിവുള്ളപ്പോള്‍ വിളിക്കണം ഈ ലോകത്തെ ഏത് വിഷയവും സംസാരിക്കാന്‍ അറിവുണ്ടാകണം. ആരോഗ്യമുണ്ടെങ്കില്‍ കുഞ്ഞു യാത്രകള്‍ പോകണം, സിനിമ കാണാന്‍ പോകാം, ഇഷ്ടമുള്ള ആരോഗ്യം അനുവദിക്കുന്ന യാത്രകള്‍ ആകാം, ആജീവനാന്ത സൗഹൃദമാകണം ഇടയ്ക്ക് വെച്ച്‌ ഇട്ടിട്ട് പോകരുത്. "

"പുരുഷനാണ് ഫസ്റ്റ് പ്രിഫറന്‍സ് മൂഞ്ചിയ ചിന്താഗതിയില്ലാത്ത സ്ത്രീകളും ആകാം. സ്ത്രീ ആണെങ്കില്‍ താമസ സൗകര്യവും കൊടുക്കുന്നതാണ്. സൗഹൃദം മാത്രമേ ഉദ്ദേശിക്കുന്നുള്ളൂ. ഒന്ന് ഷെയര്‍ ചെയ്ത് സഹായിക്കണേ.. ജീവിതം അത്രമേല്‍ ബോറായിരിക്കുമ്ബോള്‍ ഇതല്ലാതെ വേറെ എന്ത് വഴി", എന്നാണ് ഫെയ്‌സ്‌ബുക്ക്‌ കുറിപ്പ്. "സൗഹൃദം എന്നാല്‍ രണ്ട് മനുഷ്യരില്‍ മുളപൊട്ടി വളര്‍ന്ന് വികസിച്ച്‌ ഒരു വലിയ തണല്‍ വൃക്ഷം ആകേണ്ടതാണ് എന്നറിയായ്കയല്ല" എന്നും കുറിച്ചിട്ടുണ്ട്.

നിരവധിപേരാണ് പോസ്റ്റിന് താഴെ ആശംസകളുമായി എത്തുന്നത്. 'നല്ല ആശയം. ന്യായമായ ആഗ്രഹം. എത്രയും പെട്ടെന്ന് നല്ലൊരു കൂട്ട് കിട്ടട്ടെ', 'ശരിക്കും ഇതേപോലെ ഒരുപാട് പേര്‍ ആഗ്രഹിക്കുന്നുണ്ടാകും. പ്രായം ആകുന്തോറും തനിച്ചായി പോകുന്ന ഒരുപാട് പേരുണ്ട് ഈ ലോകത്ത്. അവര്‍ക്കൊക്കെഒന്ന് മനസ് തുറന്നു മിണ്ടാനും കൂട്ടുകൂടാനും ഒരു കൂട്ട് ആവശ്യമുണ്ട്. ആരും അത് തുറന്നു പറയാറില്ല. അഡ്ജസ്റ്റ് ചെയ്തു പിന്നേം തനിച്ചു തന്നെ ജീവിക്കും. ചേച്ചിടെ ഈ പോസ്റ്റ്‌ എല്ലാവര്‍ക്കും ഒരു പ്രചോദനം ആകട്ടെ.', എന്നിങ്ങനെ പോകുന്നു കമന്റുകള്‍.