കൊല്ലം പാരിപ്പള്ളിയിൽ പോക്സോ കേസിൽ മദ്ധ്യവയസ്കൻ അറസ്റ്റില്‍

ചാത്തന്നൂർ: പാരിപ്പള്ളിയിൽ 13കാരനോട് ലൈംഗികാതിക്രമം നടത്തിയ മദ്ധ്യവയസ്കനെ പോക്സോ പ്രകാരം പാരിപ്പളളി പോലീസ് പിടികൂടി. കല്ലുവാതുക്കൽ സെറ്റിൽമെന്റ് കോളനി മനോജ് വില്ലാസത്തിൽ സഹദേവൻ മകൻ മനോഹരൻ (55) ആണ് പോലീസ് പിടിയിലായത്.

2020 ജൂൺ മാസത്തിൽ മാതാപിതാക്കൾ വീട്ടിൽ ഇല്ലാത്ത സമയം നോക്കി ഇയാൾ വീട്ടിൽ കയറി പ്രായ പൂർത്തിയാകാത്ത കുട്ടിയോട് ലൈംഗികാതിക്രമം നടത്തുകയും പുറത്തു പറഞ്ഞാൽ കൊന്നുകളയുമെന്ന് ഭീഷണിപ്പെടുത്തുകയും ചെയ്തുവെന്നാണ് പരാതി. തുടർന്ന് പഠനത്തിൽ നിന്ന് ഏറെ പിന്നിലോട്ട് പോയ വിദ്യാർത്ഥിക്ക് കൗൺസിലിംങ്ങ് നൽകിയത് വഴിയാണ് സംഭവം പുറത്തറിഞ്ഞത്.

പാരിപ്പള്ളി പോലീസ് ഇൻസ്പെക്ടർ അൽജബ്ബാറിന്റെ നേതൃത്വത്തിൽ സബ്ബ് ഇൻസ്പെക്ടർമാരായ സുരേഷ്കുമാർ, സാബുലാൽ, ജി,എ.എസ്.ഐ പ്രകാശ് എസ്.സി.പി.ഒ സുഭാഷ് എന്നിവരടങ്ങിയ സംഘമാണ് ഇയാളെ പിടികൂടിയത്.