ഇടുക്കി ജില്ലയിൽ ‘യോദ്ധാവ്’ മുന്നേറുന്നു ; 285 വിദ്യാഭ്യാസ സ്ഥാപനങ്ങളിൽ ആന്റി നാർക്കോട്ടിക് ക്ലബ് രൂപീകരിച്ചു

വിദ്യാർഥികൾക്കിടയിലെ മയക്കുമരുന്ന് ഉപയോഗവും വിപണനവും തടയുക എന്ന ലക്ഷ്യത്തോടെ സംസ്ഥാന പോലീസ് നടപ്പിലാക്കുന്ന ‘യോദ്ധാവ്’ പദ്ധതി ഇടുക്കി ജില്ലയിൽ വിജയകരമായി മുന്നേറുന്നു. യുവതലമുറയുടെ ഇടയിൽ ലഹരിവസ്തുക്കളുടെ വർധിച്ച ഉപയോഗം സമീപനാളുകളിൽ സമൂഹം നേരിടുന്ന പ്രധാന വെല്ലുവിളിയാണ്. വർധിച്ചുവരുന്ന മദ്യം-മയക്കുമരുന്ന് ഉപയോഗം, വിൽപന, കടത്ത് എന്നിവക്കെതിരെ ജാഗ്രത പുലർത്തേണ്ട ആവശ്യകത മനസിലാക്കിയാണ് സംസ്ഥാന പോലീസ് വകുപ്പ് യോദ്ധാവ് പദ്ധതി ആവിഷ്കരിച്ചത്.

വിദ്യാഭ്യാസം, ആരോഗ്യം, എക്‌സൈസ്, സാമൂഹ്യ നീതി, തദ്ദേശ സ്വയംഭരണം എന്നീ വകുപ്പുകളുടെ സഹായത്തോടെ നടപ്പിലാക്കുന്ന പദ്ധതിയിൽ സന്നദ്ധ സംഘടനകളെയും സാമൂഹ്യ പ്രവര്‍ത്തകരെയും ഉൾപ്പെടുത്തി വിപുലമായാണ് നടപ്പിലാക്കുന്നത്.
സമൂഹത്തിലെ ഓരോ പൗരനെയും ലഹരിക്കെതിരെയുള്ള യോദ്ധാക്കളാക്കുക എന്ന ലക്ഷ്യത്തോടെ നടപ്പിലാക്കുന്ന പദ്ധതിയുടെ ഭാഗമായി ജില്ലയിൽ ഇതുവരെ നിരവധി പരിപാടികളാണ് സംഘടിപ്പിച്ചത്.

വിദ്യാർത്ഥികൾക്കിടയിലെ ലഹരി മരുന്നുകളുടെ ഉപയോഗത്തിനെതിരെ ആരംഭിക്കുന്ന ഉണർവ്വ് ക്യാമ്പയിന് മുന്നോടിയായി ആന്റി നാർക്കോട്ടിക് ക്ലബ് രൂപീകരിക്കുന്നതിനായി ജില്ലയിലെ എല്ലാ ഹൈസ്കൂൾ, ഹയർ സെക്കണ്ടറി, കോളേജ് കളിലും ബന്ധപ്പെട്ട വകുപ്പുകൾ മുഖേന വിവരശേഖരണം നടത്തുകയും ജില്ലയിലെ 224 സ്കൂളുകളിലും 61 കോളേജുകളിലുമായി ആകെ 285 വിദ്യാഭ്യാസ സ്ഥാപനങ്ങളിൽ ആന്റി നാർക്കോട്ടിക് ക്ലബ് രൂപീകരിക്കുകയും ചെയ്തു.
യോദ്ധാവ് പദ്ധതിയുമായി ബന്ധപ്പെട്ട് ജില്ലയിൽ ഇതുവരെ 323 ബോധവത്ക്കരണ ക്ലാസുകളും, 475 റെയ്ഡുകളും നടത്തി.

ലഹരി വിരുദ്ധ പ്രമോഷണൽ വീഡിയോകൾ തയ്യാറാക്കി വിവിധ സോഷ്യൽ മീഡിയ പ്ലാറ്റ്ഫോമുകളിൽ യോദ്ധാവ് പദ്ധതിയെക്കുറിച്ചും, ലഹരി വിരുദ്ധ പ്രവർത്തനങ്ങളെക്കുറിച്ചും ബോധവത്ക്കരണം നടത്തുന്നു. കൂടാതെ യോദ്ധാവ് പദ്ധതിയുമായി ബന്ധപ്പെട്ട് ജില്ലയിൽ പ്രദേശവാസികളെയും, വിദ്യാർത്ഥികളെയും, സ്റ്റുഡന്റ് പോലീസ് കേഡറ്റുകളെയും ഉൾപ്പെടുത്തി ലഹരി വിരുദ്ധ ബോധവത്ക്കരണ റാലികളും, വടംവലി, ഫ്ലാഷ് മോബ്, പോസ്റ്റർ പ്രചാരണം, ബ്രോഷർ വിതരണം, ഷോർട് ഫിലിം, ആന്റി നാർക്കോട്ടിക് പ്ലഡ്ജ് മുതലായവയും സംഘടിപ്പിച്ചു.

യോദ്ധാവ് പദ്ധതിയുടെ ഉദ്ദേശലക്ഷ്യങ്ങളെക്കുറിച്ചും, പ്രാധാന്യത്തെക്കുറിച്ചും വിശദീകരിക്കുന്നതിനും ജില്ലയിലെ യോദ്ധാവ് പദ്ധതിയുടെ പ്രവർത്തനങ്ങളെക്കുറിച്ച് വിലയിരുത്തുന്നതിനും ആവശ്യമായ നിർദ്ദേശങ്ങൾ നൽകുന്നതിനുമായി ഇടുക്കി നാർക്കോട്ടിക് സെൽ ഡെപ്യൂട്ടി പോലീസ് സൂപ്രണ്ട് മാത്യു ജോർജിൻെറ നേതൃത്വത്തിൽ ജില്ലയിലെ എല്ലാ പോലീസ് സ്റ്റേഷനുകളിലെയും ആന്റി നാർക്കോട്ടിക് കോ-ഓർഡിനേറ്റർമാരുടെ മീറ്റിങ് നടത്തി.

പദ്ധതിയുടെ ഭാഗമായി കുട്ടികളിൽ ലഹരി എത്തുന്നുണ്ടോ എന്ന് നിരീക്ഷിക്കുന്നതിനായി എല്ലാ സ്‌കൂളിലും കോളേജുകളിലും അധ്യാപകരെ ചുമതലപ്പെടുത്തി. തിരഞ്ഞെടുക്കപ്പെടുന്ന അദ്ധ്യാപകർക്ക് സബ് ഡിവിഷൻ തലത്തിൽ പരിശീലനം സംഘടിപ്പിച്ചു. യോദ്ധാവ് പദ്ധതിയുമായി ബന്ധപ്പെട്ട് പൊതുജനങ്ങൾക്ക് അവബോധം നൽകുന്നതിനായി ജില്ലാതലത്തിൽ ജനമൈത്രി ബീറ്റ് ഓഫീസർമാർക്കും ജില്ലയിലെ എസ്. ഐ റാങ്ക് മുതലുള്ള എല്ലാ പോലീസ് ഉദ്യോഗസ്ഥർക്കും എൻ. ഡി. പി. എസ് കേസുകൾ സംബന്ധിച്ചും പ്രത്യേകം പരിശീലനവും നൽകി.