തൃക്കാരിയൂരിൽ ഭിക്ഷ സ്വീകരിക്കാൻ നരസിംഹാനന്ദ ബ്രഹ്മാനന്ദഭൂതി സ്വാമിയാരെത്തി.

തൃക്കാരിയൂർ: ശ്രീശങ്കരാചാര്യ സംന്യാസപരമ്പരയിലെ പത്മപാദാചാര്യരുടെ ശിഷ്യകുലത്തിൽപ്പെട്ട തൃശ്ശൂർ തെക്കേമഠം തിരുവാർപ്പ് പുഷ്പാഞ്ജലി സ്വാമിയാർ ശ്രീനരസിംഹാനന്ദ ബ്രഹ്മാനന്ദഭൂതി ഞായറാഴ്ച രാവിലെ 8.30-യോടെ കോതമംഗലം തൃക്കാരിയൂർ ശ്രീമഹാദേവക്ഷേത്രത്തിൽ ഭിക്ഷ സ്വീകരിക്കാനെത്തി. തിരുവിതാംകൂർ ദേവസ്വം ബോർഡ് തൃക്കാരിയൂർ ഗ്രൂപ്പിലെ പ്രതിനിധികളും ക്ഷേത്രോപദേശകസമിതി അംഗങ്ങളും നിരവധി ഭക്തജനങ്ങളും സ്വാമിയാരെ സ്വീകരിക്കാൻ ക്ഷേത്രത്തിൽ എത്തിയിരുന്നു.

ഇവിടത്തെ അഷ്ടമംഗല ദേവപ്രശ്നപരിഹാരക്രിയകളുടെ ഭാഗമായാണ് സ്വാമിയാരെ ക്ഷണിച്ചു വരുത്തി സ്വീകരിച്ച്, ഭിക്ഷയും വച്ചു നമസ്കാരവും നല്കിയത്. ഉണക്കലരി, നെയ്യ്, തേൻ, നാളികേരം, കദളിപ്പഴം, ശർക്കര, കരയില്ലാത്ത 4 മീറ്റർ മൽമൽമുണ്ട്, ദ്രവ്യം ദക്ഷിണ എന്നിവയാണ് സ്വാമിയാർക്കു നൽകിയത്. ക്ഷേത്രത്തിലെത്തിയ ഭക്തജനങ്ങൾ സ്വാമിയാരെ നമസ്കരിച്ച് അനുഗ്രഹവും വാങ്ങിയാണ്
മടങ്ങിയത്.