ആലുവയില്‍ അഞ്ചു വയസുകാരിയുടെ കുടുംബത്തില്‍നിന്ന് പണംതട്ടിയ മഹിളാ കോണ്‍ഗ്രസ് നേതാവിന് സസ്പെന്‍ഷന്‍

കൊച്ചി: ആലുവയില്‍ അഞ്ചു വയസുകാരിയുടെ കുടുംബത്തില്‍ നിന്നും പണം തട്ടിയ സംഭവത്തില്‍ നടപടിയെടുത്ത് മഹിളാ കോണ്‍ഗ്രസ് ജില്ലാ കമ്മിറ്റി. സംഭവത്തില്‍ മഹിളാ കോണ്‍ഗ്രസ് ജില്ലാ ജനറല്‍ സെക്രട്ടറി ഹസീന മുനീറിനെ സസ്പെന്‍ഡ് ചെയ്തു.

സംഭവത്തില്‍ ഹസീനയുടെ വിശദീകരണം തൃപ്തികരമല്ലെന്ന് ജില്ലാ കമ്മിറ്റി വിലയിരുത്തി. ആലുവയില്‍ കൊല്ലപ്പെട്ട പെണ്‍കുട്ടിയുടെ കുടുംബത്തിന് ലഭിച്ച സഹായധനത്തില്‍ നിന്നും 1.20 ലക്ഷം രൂപ പലപ്പോഴായി ഹസീനയുടെ ഭര്‍ത്താവ് മുനീര്‍ തട്ടിയെടുത്തെന്നായിരുന്നു ആരോപണം.

പെണ്‍കുട്ടിയുടെ പിതാവ് പഞ്ചായത്ത് പ്രസിഡന്റിനോടും മറ്റ് ജനപ്രതിനിധികള്‍ക്കും പരാതി നല്‍കുകയായിരുന്നു. ഇതിനു പിന്നാലെ 70,000 രൂപ തിരികെ നല്‍കി. പണം തട്ടിയത് വിവാദമായതോടെ, മുനീര്‍ 50,000 രൂപയും പെണ്‍കുട്ടിയുടെ പിതാവിന് തിരികെ ഏല്‍പ്പിച്ചു. പണം ലഭിച്ചതിനാല്‍ പരാതി നല്‍കാനില്ലെന്ന് പെണ്‍കുട്ടിയുടെ പിതാവ് വ്യക്തമാക്കി.