മീനച്ചിൽ ഹിന്ദുമഹാസംഗമം 20 മുതൽ; പാലാ വെള്ളാപ്പാട് രാമകൃഷ്ണാനന്ദ സ്വാമി നഗറിൽ

പാലാ: 29-ാമത് മീനച്ചിൽ നദീതട ഹിന്ദു മഹാസംഗമം ഏപ്രിൽ 20 മുതൽ 24 വരെ വെള്ളാപ്പാട് ഭഗവതി ക്ഷേത്രത്തിലെ രാമകൃഷ്ണാനന്ദ സ്വാമി നഗറിൽ നടക്കും. കോവിഡ് നിയന്ത്രണങ്ങളുടെ സാഹചര്യത്തിൽ കഴിഞ്ഞ വർഷം ഓൺലൈൻ ആയാണ് ഹിന്ദുസംഗമം നടന്നത്.

ഏഴാച്ചേരിയിൽ ഒരു കുടുംബത്തിന് സേവാഭാരതി വീട് നിർമ്മിച്ച് നൽകുന്നതാണ് ഈ വർഷത്തെ ഹിന്ദംസംഗമത്തിന്റെ പ്രത്യേകത പദ്ധതി. വീടിന്റെ താക്കോൽ കൈമാറുന്ന ചടങ്ങ് ഉദ്ഘാടന സമ്മേളനത്തിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു.

20-ന് വൈകിട്ട് 4.30ന് ളാലം മഹാദേവ ക്ഷേത്രസന്നിധിയിൽ നിന്നാരംഭിക്കുന്ന ശോഭായാത്രയോടെ ഹിന്ദുസംഗമത്തിന് തുടക്കമാകും. 5.30ന് സ്വാഗത സംഘം രക്ഷാധികാരി സ്വാമി സ്വപ്രഭാനന്ദ മഹാരാജ് സംഗമ പതാക ഉയർത്തും.തുടർന്ന് സ്വാമി ചിദാനന്ദപുരി ഹിന്ദുസംഗമം ഉദ്ഘാടനം ചെയ്യും.

സേവാഭാരതി നിർമ്മിച്ച് നൽകുന്ന വീടിന്റെ താക്കോൽ ദാനവും സ്വാമി നിർവ്വഹിക്കും. സ്വാഗത സംഘം പ്രസിഡന്റ് അഡ്വ.രാജേഷ് പല്ലാട്ട് അദ്ധ്യക്ഷത വഹിക്കും. സ്വാമി സ്വപ്രഭാനന്ദ മഹാരാജ് അനുഗ്രഹ പ്രഭാഷണവും കുമ്മനം രാജശേഖരൻ മുഖ്യ പ്രഭാഷണവും നടത്തും.

സ്വാഗത സംഘം രക്ഷാധികാരി ഡോ.എൻ.കെ. മഹാദേവൻ സ്വാഗതവും ജനറൽ കൺവീനർ അഡ്വ.ജി. അനീഷ് നന്ദിയും പറയും. 21ന് വൈകിട്ട് 5.30ന് ഭജന, 6.30 ന് നടക്കുന്ന സത്സംഗ സമ്മേളനത്തിൽ സ്വാഗത സംഘം രക്ഷാധികാരി സ്വാമി അഭയാനന്ദ തീത്ഥപാദർ അനുഗ്രഹ പ്രഭാഷണം നടത്തും.

വിഖ്യാത ലോക സഞ്ചാരി സന്തോഷ് ജോർജ്ജ് കുളങ്ങര മുഖ്യപ്രഭാഷണം നടത്തും. 2019-20 ലെ മികച്ച സ്പോർട്സ് കൗൺസിൽ വിദ്യാർത്ഥിക്കുള്ള പുരസ്കാര ജേതാവ് പി.എസ്.അനിരുദ്ധൻ, വേൾഡ് ഹെറിറ്റേജ് ആർട് ഫെസ്റ്റിവൽ സുവർണ ജേതാവ് പി.ബി. സന്തോഷ്കുമാർ എന്നിവരെ
ആർഎസ്എസ് മീനച്ചിൽ സംഘചാലക് കെ.കെ.ഗോപകുമാർ ആദരിക്കും.

ടി.എൻ. രാജൻ, മനോജ് സോമൻ എന്നിവർ സംസാരിക്കും. 22ന് വൈകിട്ട് 5.30ന് ഭജന, 6.30ന് സത്സംഗ സമ്മേളനത്തിൽ ശ്രീരാമകൃഷ്ണ മഠാധിപതി സ്വാമി വീതസംഗാനന്ദ മഹാരാജ് അനുഗ്രഹ പ്രഭാഷണം നടത്തും. പ്രജ്ഞ പ്രവാഹ് ദേശീയ സംയോജകൻ ജെ.നന്ദകുമാർ മുഖ്യപ്രഭാഷണം നടത്തും.

ആർഎസ്എസ് പൊൻകുന്നം സംഘ ജില്ലാ സംഘചാലക് കെ.എൻ. രാമൻ നമ്പൂതിരി അദ്ധ്യക്ഷത വഹിക്കും. ഡോ പി.സി. ഹരികൃഷ്ണൻ, ബിനീഷ് ചൂണ്ടച്ചേരി എന്നിവർ സംസാരിക്കും. 23ന് വൈകിട്ട് 5.30ന് ഭജന. 6.30ന് സത്സംഗ സമ്മേളനത്തിൽ സ്വാഗത സംഘം രക്ഷാധികാരി സ്വാമി യതീശ്വരാമൃത ചൈതന്യ അനുഗ്രഹ പ്രഭാഷണം നടത്തും.

ആർഎസ്എസ് പ്രാന്തീയ കാര്യകാരി സദസ്യൻ കാ.ഭാ.സുരേന്ദ്രൻ മുഖ്യപ്രഭാഷണം നടത്തും. സോമൻ തച്ചേട്ട് അദ്ധ്യക്ഷത വഹിക്കും. ഡോ.പി.ചിദംബരനാഥ് സ്മാരക 'വീരമാരുതി' പുരസ്കാരം
രാമസിംഹൻ അബൂബക്കറിന് സരസമ്മാൾ ചിദംബരനാഥ് സമ്മാനിക്കും.

കാ.ഭാ.സുരേന്ദ്രൻ രചിച്ച 'സ്വാതന്ത്ര്യ സമരത്തിലെ വ്യത്യസ്ത ധാരകൾ' എന്ന പുസ്തകത്തിന്റെ പ്രകാശനം രാമസിംഹൻ അബൂബക്കറിന് ആദ്യ പുസ്തകം നൽകിക്കൊണ്ട് എം.ജി. സർവ്വകലാശാല മുൻ വി.സി. ഡോ.സിറിയക് തോമസ് നിർവഹിക്കും.

പി.എൻ.ആദിത്യൻ, പി.എൻ. സുരേന്ദ്രൻ എന്നിവർ സംസാരിക്കും. 24ന് വൈകിട്ട് 4ന് മാതൃസമ്മേളനത്തിൽ വിശ്വ ആയുർവേദ പരിഷത്ത് സംസ്ഥാന ജന.സെക്രട്ടറി ഡോ.ജയലക്ഷ്മി അമ്മാൾ മുഖ്യപ്രഭാഷണം നടത്തും.

ഷൈലജ ജി.നായർ അദ്ധ്യക്ഷത വഹിക്കും. മായ ജയരാജ്, വത്സല ഹരിദാസ് എന്നിവർ സംസാരിക്കും. 7ന് നടക്കുന്ന സമാപന സമ്മേളനം കേന്ദ്ര മന്ത്രി വി.മുരളീധരൻ ഉദ്ഘാടനം ചെയ്യും. വിശ്വഹിന്ദു പരിഷത്ത് സംസ്ഥാന പ്രസിഡന്റ് വിജി തമ്പി അദ്ധ്യക്ഷത വഹിക്കും. ഹിന്ദു ഐക്യവേദി സംസ്ഥാന പ്രസിഡന്റ് കെ.പി.ശശികല ടീച്ചർ മുഖ്യപ്രഭാഷണം നടത്തും.

സർക്കാർ മെഡിക്കൽ കോളേജിൽ ആദ്യമായി കരൾ മാറ്റ ശസ്ത്രക്രിയ വിജയകരമായി നടത്തിയ കോട്ടയം മെഡിക്കൽ കോളേജ് സൂപ്രണ്ട് ഡോ.ടി.കെ.ജയകുമാറിനെ വി.മുരളീധരൻ ആദരിക്കും.

നോക്കുവിദ്യ പാവകളി കലാകാരി പത്മശ്രീ പങ്കജാക്ഷിയമ്മ, ആദിവാസി മേഖലയിലെ മികച്ച സാമൂഹിക പ്രവർത്തനങ്ങൾക്കുള്ള പുരസ്കാര ജേത്രി പി.കെ. വത്സമ്മ എന്നിവരെ കെ.പി.ശശികല ടീച്ചർ ആദരിക്കും.എം.ജി.സുരേഷ്, മനീഷ് ഹരിദാസ് എന്നിവർ സംസാരിക്കും.

പത്രസമ്മേളനത്തിൽ സ്വാഗതസംഘം ഭാരവാഹികളായ, അഡ്വ. രാജേഷ് പല്ലാട്ട്, അഡ്വ. ജി. അനീഷ്, റെജി കുന്നനാംകുഴി, ടി.എൻ.രാജൻ എന്നിവർ പങ്കെടുത്തു.