മുത്തോലി പഞ്ചായത്ത് സമ്പൂർണ്ണ ലൈഫ് ഇൻഷ്വറൻസ് പരിരക്ഷയിലേയ്ക്ക്

പാലാ: രാജ്യത്ത് ഏറ്റവും ഉയർന്ന ബോണസ്സ് ലഭിക്കുന്ന കേന്ദ്ര സർക്കാർ പദ്ധതിയായ പോസ്റ്റൽ ലൈഫ് ഇൻഷുറൻസ് പദ്ധതിയിൽ മുത്തോലി പഞ്ചായത്തിലെ ജനങ്ങളെ അംഗങ്ങളായി ചേർക്കുന്നു.

തപാൽ വകുപ്പ് കോട്ടയം ഡിവിഷന്റെ ആഭിമുഖ്യത്തിൽ മുത്തോലി പഞ്ചായത്തിന്റെ സഹകരണത്തോടെ ഇതിനുള്ള കാമ്പയിൻ ചൊവ്വാഴ്ച ആരംഭിക്കുമെന്ന് പ്രസിഡന്റ് രൺജിത്ത് ജി. മീനാഭവൻ അറിയിച്ചു.

ഉയർന്ന ബോണസ്സ് ഇൻഷ്വറൻസ് പരിരക്ഷ, ആദായ നികുതി ഇളവ് എന്നിവ ലഭിക്കും.18 വയസ്സിനും 55 വയസ്സിനും ഇടയിൽ പ്രായമുള്ളവർക്ക് പദ്ധതിയിൽ ചേരാം. സർക്കാർ അർദ്ധ സർക്കാർ ജീവനക്കാർക്കും ഡിപ്ലോമ, ബിരുദ ധാരികൾക്കും കൂടുതൽ ആനുകൂല്യം ലഭിക്കും.

തപാൽ ജീവനക്കാർ വീടുകളിലെത്തി അംഗങ്ങളാക്കും. പദ്ധതിയുടെ പഞ്ചായത്ത്തല ഉദ്ഘാടനം നാളെ(ഡിസംബർ 6) രാവിലെ 10.30 ന് പഞ്ചായത്ത് ഹാളിൽ നടക്കും. പ്രസിഡന്റ് രഞ്ജിത്ത് ജി. മീനാഭവൻ നിർവ്വഹിക്കും.