178,919 പ്രവാസികള്‍ കഴിഞ്ഞ വര്‍ഷം കുവൈറ്റ് വിട്ടതായി റിപ്പോര്‍ട്ട്‌

കുവൈറ്റ് സിറ്റി: 2022ല്‍ കുവൈറ്റ് വിട്ടത് 178,919 പ്രവാസികളെന്ന് റിപ്പോര്‍ട്ട്. സ്ഥിതിവിവരക്കണക്കുകള്‍ അടിസ്ഥാനമാക്കി പ്രാദേശികമാധ്യമമാണ് ഇക്കാര്യം റിപ്പോര്‍ട്ട് ചെയ്തത്. 800 ദിനാര്‍ ഫീസ് അടയ്ക്കാന്‍ കഴിയാത്തതിനാല്‍, 60 വയസ് മുതല്‍ പ്രായമുള്ള ബിരുദധാരികളായ 17,891 പ്രവാസികളും രാജ്യം വിട്ടതായി പബ്ലിക് അതോറിറ്റി ഫോർ സിവിൽ ഇൻഫർമേഷൻ (പിഎസിഐ) പുറത്തിറക്കിയ സ്ഥിതിവിവരക്കണക്കുകൾ വ്യക്തമാക്കുന്നു.

60 വയസും അതിൽ കൂടുതലുമുള്ള പ്രവാസി തൊഴിലാളികളുടെ എണ്ണം 2021 മധ്യത്തിൽ 122,536 ആയിരുന്നത് 2022 പകുതിയോടെ 104,645 ആയി. യൂണിവേഴ്സിറ്റി ബിരുദധാരികളിൽ 2021 മധ്യത്തിൽ 155,665 ആയിരുന്നത് 2022 പകുതിയോടെ 146,942 ആയി കുറഞ്ഞു. കൂടാതെ, ബിരുദാനന്തര ബിരുദധാരികളുടെ എണ്ണവും 2021 മധ്യത്തിൽ 7,213 ആയിരുന്നത് 2022 മധ്യത്തോടെ 6,912 ആയി കുറഞ്ഞു.

2022 വർഷത്തിന്റെ മധ്യത്തിൽ മൊത്തം പ്രവാസി തൊഴിലാളികളുടെ എണ്ണം 2718803 ആയിരുന്നു. 2021-ൽ അവരുടെ എണ്ണം ഏകദേശം 2897522 ആയിരുന്നു. അതായത് ഏകദേശം 178,919 പ്രവാസികൾ ഒരു വർഷത്തിനുള്ളിൽ സ്ഥിരമായി കുവൈറ്റ് വിട്ടു.

പബ്ലിക് അതോറിറ്റി ഫോർ സിവിൽ ഇൻഫർമേഷൻ (പിഎസിഐ)യുടെ ഏറ്റവും പുതിയ സ്ഥിതിവിവരക്കണക്കുകൾ പ്രകാരം, പൊതുമേഖലയിലെ തൊഴിലാളികളുടെ എണ്ണം ഏകദേശം 483,200 ജീവനക്കാരാണ്. അവരിൽ 372,800 പേർ കുവൈറ്റികളാണ്. ഇത് മൊത്തം 77 ശതമാനം വരും. 110,400 പേർ പ്രവാസികളാണ്.

കുവൈറ്റിലെ പൊതു-സ്വകാര്യ മേഖലകളിൽ ജോലി ചെയ്യുന്നവരുടെ ആകെ എണ്ണം ഏകദേശം 1.91 ദശലക്ഷമാണ്. ഇവരിൽ 75 ശതമാനം പേർ സ്വകാര്യ മേഖലയിലും ബാക്കി 25 ശതമാനം പേർ പൊതുമേഖലയിലുമാണ് ജോലി ചെയ്യുന്നത്.