മര്‍ക്കാര്‍ അറബിക്കടലിന്റെ സിംഹം ഒടിടി റിലീസിന് ഒരുങ്ങുന്നു; ആമസോണുമായി ചര്‍ച്ച നടന്നുവെന്ന് ആന്റണി പെരുമ്പാവൂര്‍, ക്രിസ്മസ് റിലീസായി പ്രേക്ഷകരിലേക്ക് എത്തും.

തിരുവനന്തപുരം: മലയാളി പ്രേക്ഷര്‍ പ്രതീക്ഷയോടെ കാത്തിരിക്കുന്ന ബിഗ് ബജറ്റ് ചിത്രം മര്‍ക്കാര്‍ അറബിക്കടലിന്റെ സിംഹം ഒടിടി റിലീസിന് ഒരുങ്ങുന്നു. ചിത്രത്തിന്റെ റിലീസുമായി ബന്ധപ്പെട്ട് ആമസോണുമായി ചര്‍ച്ച നടന്നുവെന്ന് നിര്‍മ്മാതാവ് ആന്റണി പെരുമ്പാവൂര്‍ വ്യക്തമാക്കി. മുംബൈയില്‍ ആമസോണ്‍ പ്രതിനിധികള്‍ മരക്കാര്‍ സിനിമ കണ്ടുവെന്നാണ് സൂചന. ചിത്രം ക്രിസ്മസ് റിലീസായി പ്രേക്ഷകരിലേക്ക് എത്തും.

ആദ്യ ലോക്ക്ഡൗണിനു ശേഷം തിയേറ്ററുകള്‍ തുറന്നപ്പോള്‍ മോഹന്‍ലാലിന്റെ ദൃശ്യം രണ്ടാം ഭാഗം ഒടിടിയില്‍ റിലീസ് ചെയ്തിരുന്നു. ഇതിനെതിരെ തിയേറ്റര്‍ ഉടമകള്‍ രംഗത്തു വന്നിരുന്നു. ബിഗ് ബജറ്റ് ചിത്രങ്ങള്‍ തിയേറ്ററില്‍ റിലീസ് ചെയ്താല്‍ മാത്രമേ ആള്‍ക്കാര്‍ കാണാനെത്തൂവെന്ന് തിയേറ്റര്‍ ഉടമകള്‍ പറഞ്ഞിരുന്നു. എന്നാല്‍ ശക്തമായ എതിര്‍പ്പുകള്‍ മറികടന്ന് ദൃശ്യം രണ്ടാം ഭാഗം ഒടിടിയില്‍ റിലീസ് ചെയ്യുകയായിരുന്നു. അതേസമയം മരയ്ക്കാര്‍ അറബിക്കടലിന്റെ സിംഹം എന്ന ചിത്രം തിയേറ്ററിലേ റിലീസ് ചെയ്യൂവെന്ന് നിര്‍മാതാവ് ആന്റണി പെരുമ്പാവൂര്‍ തിയേറ്റര്‍ ഉടമകള്‍ക്ക് ഉറപ്പു നല്‍കുകയും ചെയ്തിരുന്നു. 2019ല്‍ ഷൂട്ടിംഗ് പൂര്‍ത്തിയാക്കി 2020ല്‍ ചിത്രം റിലീസ് ചെയ്യാനായിരുന്നു ആദ്യം തീരുമാനിച്ചത്. എന്നാല്‍ കോവിഡ് മഹാമാരി കാരണം പലതവണ റിലീസ് തിയതി മാറ്റിവയ്ക്കുകയായിരുന്നു. അതിനിടയില്‍ നിരവധി ചിത്രങ്ങള്‍ ഒടിടിയിലേക്ക് റിലീസ് ചെയ്തു. തിയേറ്ററുകളിലേക്ക് ആളുകള്‍ എത്തണമെങ്കില്‍ മോഹന്‍ലാല്‍, മമ്മൂട്ടി തുടങ്ങിയ താരങ്ങളുടെ ചിത്രങ്ങള്‍ റിലീസ് ചെയ്യണമെന്ന് ഉടമകള്‍ ആവശ്യപ്പെട്ടിരുന്നു. അതിനിടെ വീണ്ടും കോവിഡ് രൂക്ഷമാവുകയും രണ്ടാംഘട്ട ലോക്ക്ഡൗണ്‍ പ്രഖ്യാപിക്കുകയും ചെയ്തിരുന്നു.

ഈമാസം 25 മുതല്‍ തിയേറ്ററുകള്‍ എല്ലാം തുറക്കാന്‍ തീരുമാനിച്ചിരിക്കുകയാണ്. മോഹന്‍ലാലിന്റെ മരയ്ക്കാര്‍ ഉള്‍പ്പെടെയുള്ള ചിത്രങ്ങളിലാണ് തങ്ങളുടെ പ്രതീക്ഷയെന്ന് ഉടമകള്‍ പറയുകയും ചെയ്തിരുന്നു. എന്നാല്‍ ഇടിത്തീ പോലെയാണ് ആ ചിത്രം ഒടിടി റിലീസിനൊരുങ്ങുന്നതെന്ന വിവരം പുറത്തു വരുന്നത്.

ഒരിടവേളക്ക് ശേഷം തിയറ്റര്‍ തുറക്കുമ്പോള്‍ 50 ശതമാനം സീറ്റില്‍ മാത്രമാണ് പ്രവേശന അനുമതി. അതിനാല്‍ തിയറ്ററില്‍ റിലീസ് ചെയ്താല്‍ ലാഭം ഉണ്ടാകില്ല എന്ന് കണക്കാക്കിയാണ് ഒടിടി റിലീസിന് ഒരുങ്ങുന്നത്. തുടക്കം മുതല്‍ തീയേറ്റര്‍ റിലീസിന് ഒരുങ്ങിയ ചിത്രമാണ് മരക്കാര്‍. എന്നാല്‍ കൊവിഡിന്റെ പശ്ചാത്തലത്തില്‍ റിലീസ് രണ്ട് തവണയായി മാറ്റി വെക്കുകയായിരുന്നു.

മോഹന്‍ലാലിനെ കേന്ദ്ര കഥാപാത്രമാക്കി പ്രിയദര്‍ശന്‍ സംവിധാനം ചെയ്ത ചിത്രത്തിന്റെ ബജറ്റ് 100 കോടിയാണ്. തന്റെ ജീവിത്തിലെ ഏറ്റവും ചിലവേറിയ സിനിമയാണിതെന്ന് സംവിധായകന്‍ പ്രിയദര്‍ശന്‍ പറഞ്ഞിരുന്നു. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, സന്തോഷ് ടി കുരുവിള, റോയ് സി ജെ എന്നിവരാണ് ചിത്രം നിര്‍മ്മിക്കുന്നത്. മലയാളത്തിന് പുറമെ ഹിന്ദി, തമിഴ് തെലുങ്ക്, കന്നട എന്നീ ഭാഷകളിലും ചിത്രം റിലീസ് ചെയ്യും. മഞ്ജു വാര്യര്‍, സുനില്‍ ഷെട്ടി, പ്രഭു, കീര്‍ത്തി സുരേഷ് എന്നിവരാണ് ചിത്രത്തിലെ മറ്റ പ്രധാന കഥാപാത്രങ്ങള്‍. അനില്‍ ശശിയും പ്രിയദര്‍ശനും ചേര്‍ന്നാണ് ചിത്രത്തിന്റെ തിരക്കഥ നിര്‍വ്വഹിച്ചിരിക്കുന്നത്. തമിഴ് സിനിമ ഛായാഗ്രാഹകനായ തിരുനാവകാരസുവാണ് ചിത്രത്തിന്റെ ക്യാമറ ചെയ്തിരിക്കുന്നത്.