ഒലവക്കോട് റെയിൽവേ സ്റ്റേഷനിൽ നിന്നും 12 കിലോ കഞ്ചാവുമായി തൃശൂർ ചാവക്കാട് സ്വദേശി പിടിയില്‍

പാലക്കാട്: പാലക്കാട് ആർപിഎഫ് ക്രൈം ഇന്റലിജൻസ് ബ്രാഞ്ച് & പാലക്കാട് എക്സൈസ് സർക്കിൾ ഇൻസ്പെക്ടറും പാർട്ടിയും ചേർന്ന് പാലക്കാട് ജംഗ്ഷൻ റെയിൽവേ സ്റ്റേഷനിൽ നടത്തിയ പരിശോധനയിൽ ധൻബാദ് എക്സ്പ്രസിൽ കടത്തിക്കൊണ്ടുവന്ന 12 കിലോ കഞ്ചാവുമായി തൃശ്ശൂർ ചാവക്കാട് സ്വദേശി ഖലീലുൽ റഹ്മാൻ (42) എന്നയാളെ പിടികൂടി.

വിശാഖപട്ടണത്തിൽ നിന്ന് കടത്തിക്കൊണ്ടുവന്ന കഞ്ചാവ് തൃശ്ശൂർ, ചാവക്കാട് പരിസരപ്രദേശങ്ങളിൽ ചില്ലറ വിൽപനയ്ക്കായി കൊണ്ടുവന്നത് ആണെന്നാണ് പ്രതി പറഞ്ഞത്. പ്രതി ഇതിനുമുൻപ് പലവട്ടം ട്രെയിനിൽ കഞ്ചാവ് കടത്തിയിട്ടുണ്ട്. പാലക്കാട് ജംഗ്ഷൻ റെയിൽവേ സ്റ്റേഷനിലെ ആർപിഎഫ് ന്റെയും എക്സൈസിന്‍റെയും പരിശോധന കണ്ടു ഭയന്ന് പ്ലാറ്റ്ഫോമിൽ ഇറങ്ങി പുറത്തേക്ക് നടക്കുന്ന സമയത്താണ് പിടിയിലായത്.

ആന്ധ്ര ആന്ധ്രപ്രദേശ് ഒറീസ സംസ്ഥാനങ്ങളിൽ കഞ്ചാവ് വിളവെടുക്കുന്ന സമയം ആയതിനാൽ ട്രെയിൻ മാർഗം കേരളത്തിലേക്കുള്ള കഞ്ചാവ് കടത്ത് വളരെയധികം കൂടിയിട്ടുണ്ട്. പിടിച്ചെടുത്ത കഞ്ചാവിന് പൊതുവിപണിയിൽ ആറ് ലക്ഷത്തോളം രൂപ വില വരും.

കേസ് തുടരന്വേഷണത്തിനായി പാലക്കാട് എക്സൈസ് സർക്കിൾ ഇൻസ്പെക്ടർക്ക് കൈമാറി. വരും ദിവസങ്ങളിലും പരിശോധന കർശനമായി തുടരുമെന്ന് പാലക്കാട് ആർപിഎഫ് കമണ്ഡന്റ് ജെതിൻ ബി.രാജ് അറിയിച്ചു.

ആർപിഎഫ് സിഐ. എന്‍. കേശവദാസ്, എക്സൈസ് സിഐ പി.കെ സതീഷ്, ആര്‍പിഎഫ് എഎസ്ഐമാരായ കെ. സജു, സജി അഗസ്റ്റിൻ, അസിസ്റ്റന്റ് എക്സൈസ് ഇൻസ്പെക്ടർ പി. സന്തോഷ് കുമാർ, ആർപിഎഫ് ഹെഡ് കോൺസ്റ്റബിൾ എന്‍. അശോക്, സിഇഒമാരായ ഷിജു, ജി
ജഗജിത് എന്നിവരാണ് പരിശോധനാ സംഘത്തിലുണ്ടായിരുന്നത്.