പാലക്കാട് ട്രെയിനിൽ കടത്തിക്കൊണ്ടുവന്ന 20 കിലോ 500 ഗ്രാം കഞ്ചാവുമായി 2 യുവാക്കൾ അറസ്റ്റിൽ

പാലക്കാട്: ഷാലിമാർ തിരുവനന്തപുരം ഗുരുദേവ് എക്സ്പ്രസിൽ വിശാഖപട്ടണത്തു നിന്ന് എറണാകുളത്തേക്ക് കടത്തിക്കൊണ്ടുവന്ന 20.5 കിലോ കഞ്ചാവുമായി രണ്ട് യുവാക്കളെ പരിശോധനാ സംഘം അറസ്റ്റ് ചെയ്തു.

തിരുവനന്തപുരം കള്ളിക്കാട് ആണ്ടി വിളാകം ഡാനിയൽ ഭവനിൽ രാജന്‍റെ മകൻ സുബിൻ രാജ് (24), തിരുവനന്തപുരം വെള്ളറട കുടപ്പനമൂട് കതിരടിചാൻ പാറയിൽ ബിനുവിന്‍റെ മകൻ അനു ബി.എസ് എന്നിവരെ പാലക്കാട് എക്സൈസ് സർക്കിൾ ഇൻസ്പെക്ടറും പാർട്ടിയും പാലക്കാട് ആർപിഎഫ് ക്രൈം ഇന്റലിജൻസ് ബ്രാഞ്ചും സംയുക്തമായി നടത്തിയ പരിശോധനയിൽ ഒലവക്കോട് ജംഗ്ഷൻ റെയിൽവേ സ്റ്റേഷനിൽ വെച്ച് അറസ്റ്റ് ചെയ്യുകയായിരുന്നു.

സുബിൻ രാജ് ഇതിനുമുൻപ് സമാനമായ കേസുകളിൽ ആന്ധ്രാപ്രദേശിലും തിരുവനന്തപുരത്തും പ്രതിയാണ്. പതിവ് പരിശോധന കണ്ടു പ്ലാറ്റ്ഫോമിൽ ഇറങ്ങി രക്ഷപെടാൻ ശ്രമിക്കുന്നതിനിടെ ആണ് പിടിയിലായത്.

പ്രതികളില്‍ നിന്ന് പിടിച്ചെടുത്ത കഞ്ചാവ് 

ഉദ്യോഗസ്ഥരെ വെട്ടിച്ചു ഓടി രക്ഷപ്പെടാൻ ശ്രമിച്ച ഇവരെ മൽപ്പിടുത്തത്തിലൂടെയാണ് കീഴ്പ്പെടുത്തിയത്. പരിശോധന വരുംദിവസങ്ങളിലും കർശനമായി തുടരുമെന്ന് ആർപിഎഫ് കമാൻഡന്റ് ജെതിൻ ബി. രാജ് അറിയിച്ചു.

എക്സൈസ് സർക്കിൾ ഇൻസ്പെക്ടർ പി.കെ സതീഷ്, ആര്‍പിഎഫ് സിഐ എന്‍ കേശവദാസ്, എസ്ഐമാരായ എ.പി ദീപക്, അജിത്, അശോക്, എഎസ്ഐമാരായ കെ. സജു, സജി അഗസ്റ്റിൻ, എഇഐ ലോതർ, എല്‍ പെരേര, സിഇഒമാരായ മഹേഷ്‌, ദിലീപ്, ഡ്രൈവർ സെൽവകുമാർ, ആര്‍പിഎഫ് കോൺസ്റ്റബിൾ ഒ.കെ അജീഷ് എന്നിവരാണ് പരിശോധനാ സംഘത്തിൽ ഉണ്ടായിരുന്നത്.