മഴ പെയ്തതോടെ കുണ്ടും കുഴിയുമായി മലമ്പുഴ റോഡ് ! അപകടങ്ങള്‍ തുടര്‍ക്കഥയാകുന്നതിനാല്‍ എത്രയും വേഗം റോഡ് നന്നാക്കണമെന്ന ആവശ്യവുമായി നാട്ടുകാര്‍

മലമ്പുഴ:മഴ പെയ്തതോടെ മലമ്പുഴ റോഡ് കുണ്ടും കുഴിയുമായി. ചെളിവെള്ളം ചാലും നിറഞ്ഞ് കവിഞ്ഞൊഴുകുകയാണ്. മലമ്പുഴ വാട്ടർ അതോറട്ടി ഫിൽറ്റർ പ്ലാൻ്റിനു മുന്നിലാണ് ഈ കാഴ്ച്ച.

കുഴിയിൽപെട്ട് ഇരുചക്രവാഹന യാത്രികർ വീഴാറുമുണ്ട്. കോൺവെൻ്റ് ആശുപത്രി റോഡിലേക്ക് തിരിയുന്ന ജങ്ങ്ഷൻ കൂടിയാണ് ഇത്. വലിയ വാഹനങ്ങൾ റോഡ് സൈഡിലേക്ക് കൂടുതൽ ഒതുക്കിയാൽ പൈപ്പിടാൻ കുഴിച്ച കുഴിയിൽ ചക്രം താഴും.

ഒട്ടേറെ വിനോദ സഞ്ചാരികളും വാട്ടർ അതോറട്ടി, ഇറിഗേഷൻ, ഫിഷറീസ്, ഫോറസ്റ്റ് ഓഫീസ് തുടങ്ങിയവയടക്കം ഒട്ടേറെ സ്ഥാപനങ്ങൾ ഇവിടെ പ്രവർത്തിക്കുന്നതിനാൽ ഒട്ടേറെ പേർ സഞ്ചരിക്കുന്ന റോഡാണ് ഇങ്ങനെ നശിച്ചു കിടക്കുന്നതെന്നും എത്രയും വേഗം റോഡ് നന്നാക്കണമെന്നും നാട്ടുകാർ ആവശ്യപ്പെട്ടു.