ഫയലുകൾ ഇനി എളുപ്പത്തിൽ ഷെയർ ചെയ്യാം, പുതിയ ഡ്രോപ്പ് ഷിപ്പ് ആപ്ലിക്കേഷനുമായി സാംസംഗ്

ഉപയോക്താക്കൾക്ക് സന്തോഷ വാർത്തയുമായി എത്തിയിരിക്കുകയാണ് പ്രമുഖ സ്മാർട്ട്ഫോൺ നിർമ്മാതാക്കളായ സാംസംഗ്. ഇത്തവണ ഫയലുകൾ എളുപ്പത്തിൽ ഷെയർ ചെയ്യാൻ സഹായിക്കുന്ന ആപ്ലിക്കേഷനാണ് സാംസംഗ് അവതരിപ്പിച്ചിരിക്കുന്നത്.

‘ഡ്രോപ്പ് ഷിപ്പ്’ എന്ന പേര് നൽകിയിരിക്കുന്ന ഈ ആപ്ലിക്കേഷനിലൂടെ ഫയലുകൾ വേഗത്തിൽ ഷെയർ ചെയ്യാൻ സാധിക്കും. ഗാലക്സി സ്റ്റോറിൽ നിന്ന് ഡൗൺലോഡ് ചെയ്യാൻ സാധിക്കുമെങ്കിലും, ആദ്യ ഘട്ടത്തിൽ ദക്ഷിണ കൊറിയൻ ഉപയോക്താക്കൾക്ക് മാത്രമാണ് ഈ സേവനം ലഭിക്കുകയുള്ളൂ.

ഡ്രോപ്പ് ഷിപ്പ് ആപ്ലിക്കേഷനിലൂടെ പരമാവധി 5 ജിബി വരെയുള്ള ഫയലുകൾ ഷെയർ ചെയ്യാൻ സാധിക്കും. ഒരു ഉപകരണത്തിൽ നിന്ന് ഫയൽ അപ്‌ലോഡ് ചെയ്തതിനുശേഷം ക്യുആർ കോഡ് നിർമ്മിക്കുകയും, ഈ ക്യുആർ കോഡ് സ്കാൻ ചെയ്ത് മറ്റുള്ളവർക്കും ഫയൽ ഡൗൺലോഡ് ചെയ്യാൻ സാധിക്കും.

ഫയലുകൾ ഷെയർ ചെയ്യാൻ സാംസംഗ് സ്മാർട്ട്ഫോണുകൾ നിർബന്ധമാണ്. എന്നാൽ, ഫയലുകൾ ഡൗൺലോഡ് ചെയ്യാൻ സാംസംഗ് ഫോണിന്റെയോ, ഡ്രോപ്പ് ഷിപ്പ് ആപ്ലിക്കേഷന്റെയോ സഹായം ആവശ്യമില്ല.