ഇന്ത്യയിൽ രണ്ട് ലാപ്ടോപ്പ് മോഡലുകൾ അവതരിപ്പിച്ച് ജനപ്രിയ ബ്രാന്റായ ഹോണർ

ഇന്ത്യയിൽ രണ്ട് ലാപ്ടോപ്പ് മോഡലുകൾ അവതരിപ്പിച്ച് ജനപ്രിയ ബ്രാന്റായ ഹോണർ. മാജിക്ബുക്ക് ലാപ്ടോപ്പ് സീരീസിലേക്കാണ് കമ്പനി രണ്ട് എക്സ് മോഡൽ ലാപ്ടോപ്പുകൾ അവതരിപ്പിച്ചിരിക്കുന്നത്. 2023 മോഡൽ ഹോണർ മാജിക്ബുക്ക് എക്സ്14, മാജിക്ബുക്ക് എക്സ്16 എന്നീ ലാപ്ടോപ്പുകളാണ് കമ്പനി ലോഞ്ച് ചെയ്തത്. ആകർഷകമായ സവിശേഷതകളോടെയാണ് ഈ പ്രൊഡക്ടുകൾ രാജ്യത്ത് ലോഞ്ച് ചെയ്തിരിക്കുന്നത്. ഇവ വ്യത്യസ്തമായ സ്റ്റോറേജ് കോൺഫിഗറേഷനുകളിൽ ലഭ്യമാകും.

ഹോണർ മാജിക്ബുക്ക് എക്സ്14, മാജിക്ബുക്ക് എക്സ്16 മോഡലുകൾ 12th ജനറേഷൻ ഇന്റൽ പ്രോസസറുകളുടെ കരുത്തിലാണ് പ്രവർത്തിക്കുന്നത്. രണ്ട് വ്യത്യസ്ത സ്റ്റോറേജ് കോൺഫിഗറേഷനുകളിൽ ലാപ്ടോപ്പുകൾ ലഭ്യമാകും. ഇവയിൽ രണ്ടിലും ഒരേ ബാറ്ററി യൂണിറ്റുകളാണ് ഹോണർ നൽകിയിട്ടുള്ളത്. ലാപ്ടോപ്പുകൾ തമ്മിലുള്ള പ്രധാന വ്യത്യാസം ഡിസ്പ്ലേ പാനലിന്റെ വലുപ്പത്തിലാണ്. ലാപ്‌ടോപ്പുകളുടെ വിൽപ്പന ആരംഭിച്ചിട്ടുണ്ട്.

ഹോണർ മാജിക്ബുക്ക് എക്സ്14 (2023) മോഡലിന്റെ 8 ജിബി റാമും 512 ജിബി സ്റ്റോറേജുമുള്ള വേരിയന്റിന്റെ വില 48,990 രൂപയാണ്. ലാപ്ടോപ്പിന്റെ 16 ജിബി റാമും 512 ജിബി സ്റ്റോറേജുമുള്ള മോഡലിന് 51,990. ഹോണർ മാജിക്ബുക്ക് എക്സ്16 (2023) ലാപ്ടോപ്പിന്റെ 8 ജിബി റാമും 512 ജിബി സ്റ്റോറേജുമുള്ള വേരിയന്റിന് 50,990 രൂപ വിലയുണ്ട്. 16 ജിബി റാമും 512 ജിബി സ്റ്റോറേജുമുള്ള മോഡലിന്റെ വില 53,990 രൂപയാണ്. രണ്ട് ലാപ്‌ടോപ്പ് മോഡലുകളും ആമസോൺ വഴി ലഭ്യമാണ്. ബാങ്ക് ഓഫറുകളും 2,500 രൂപ വരെ കിഴിവുകളും ഇവ വാങ്ങുന്നവർക്ക് ലഭിക്കും.

ഹോണർ മാജിക്ബുക്ക് എക്സ്14, മാജിക്ബുക്ക് എക്സ്16 ലാപ്‌ടോപ്പുകളിൽ 16:10 ആസ്പക്റ്റ് റേഷിയോവും 300 നിറ്റ് വരെ ബ്രൈറ്റ്നസുമുള്ള ഡിസ്പ്ലെയാണുള്ളത്. മാജിക്ബുക്ക് എക്സ്14 (2023) മോഡലിൽ 14-ഇഞ്ച് ഫുൾ എച്ച്ഡി (1920x1080) ഐപിഎസ് സ്‌ക്രീനുണ്ട്. 88 ശതമാനം സ്‌ക്രീൻ-ടു-ബോഡി റേഷിയോയുള്ള ഡിസ്പ്ലെയാണ് ഇത്. ഹോണർ മാജിക്ബുക്ക് എക്സ്16 (2023) മോഡലിൽ 16 ഇഞ്ച് ഫുൾ എച്ച്ഡി (1920x1080) ഐപിഎസ് ഡിസ്‌പ്ലേയാണുള്ളത്. 89 ശതമാനം സ്‌ക്രീൻ-ടു-ബോഡി റേഷിയോയുള്ള ഡിസ്പ്ലെയാണ് ഇത്.