'വൺപ്ലസ് നോർഡ് 3' എന്ന പുതിയ സ്മാർട്ട്ഫോൺ പുറത്തിറക്കാനൊരുങ്ങി വൺപ്ലസ്

വൺപ്ലസ് പുതിയ സ്മാർട്ട്ഫോൺ പുറത്തിറക്കാനുള്ള ഒരുക്കത്തിലാണ്. വൺപ്ലസ് നോർഡ് 3 (OnePlus Nord 3) എന്നി ഡിവൈസാണ് ഇന്ത്യൻ വിപണിയിൽ അവതരിപ്പിക്കാൻ പോകുന്നത്. ഈ ഡിവൈസ് കമ്പനിയുടെ ഔദ്യോഗിക വെബ്‌സൈറ്റിൽ കണ്ടെത്തിയിട്ടുണ്ട്. ടിപ്‌സ്റ്റർ മുകുൾ ശർമ്മ പുറത്ത് വിട്ട റിപ്പോർട്ട് അനുസരിച്ച് വെബ്‌സൈറ്റിന്റെ സോഴ്‌സ് കോഡിൽ ഫോണിന്റെ പേര് കണ്ടെത്തിയിട്ടുണ്ട്. ഈ സ്‌ക്രീൻഷോട്ട് അദ്ദേഹം ട്വിറ്ററിൽ ഷെയർ ചെയ്തിട്ടുമുണ്ട്.

വെബ്സൈറ്റിൽ ലിസ്റ്റ് ചെയ്യാനുള്ള തയ്യാറെടുപ്പിലാണ് എന്നതിനാൽ തന്നെ വൺപ്ലസ് നോർഡ് 3 സ്മാർട്ട്ഫോൺ വൈകാതെ ലോഞ്ച് ചെയ്യുമെന്ന് പ്രതീക്ഷിക്കുന്നു. ഈ ഹാൻഡ്‌സെറ്റ് ഇതിനകം തന്നെ ബിഐഎസ് സർട്ടിഫിക്കേഷൻ വെബ്‌സൈറ്റിൽ കണ്ടെത്തിയിരുന്നു. വൺപ്ലസ് നോർഡ് 3 6 മുതൽ 8 ആഴ്ചകൾക്കുള്ളിൽ ലോഞ്ച് ചെയ്യുമെന്ന് ടിപ്‌സ്റ്റർ യോഗേഷ് ബ്രാർ അടുത്തിടെ വെളിപ്പെടുത്തിയിരുന്നു. അതുകൊണ്ട് തന്നെ ലോഞ്ച് അധികം വൈകാതെ നടക്കാനാണ് സാധ്യത.

വൺപ്ലസ് നോർഡ് 3യുടെ ഔദ്യോഗിക ലോഞ്ച് തീയതി കമ്പനി ഇതുവരെ സ്ഥിരീകരിച്ചിട്ടില്ല. എങ്കിലും ഫോണിന്റെ സവിശേഷതകൾ എന്തൊക്കെയാണെന്ന് ലീക്ക് റിപ്പോർട്ടുകളിലൂടെ പുറത്ത് വന്നിട്ടുണ്ട്. പുതിയ വൺപ്ലസ് നോർഡ് 3 ഫോണിന് 30,000 രൂപയിൽ താഴെയായിരിക്കും വില എന്നാണ് സൂചനകൾ. ഫോണിൽ പഞ്ച്-ഹോൾ ഡിസ്പ്ലേ ഡിസൈനായിരിക്കും ഉണ്ടായിരിക്കുക. ഫോണിന്റെ പിൻഭാഗത്ത് ട്രിപ്പിൾ ക്യാമറ സെറ്റപ്പാണുള്ളത്. ഇതൊരു മിഡ്റേഞ്ച് 5ജി സ്മാർട്ട്ഫോൺ ആയിരിക്കും.

വൺപ്ലസ് നോർഡ് 3 സ്മാർട്ട്ഫോണിൽ 6.7 ഇഞ്ച് ഡിസ്‌പ്ലേയാണുള്ളത്. ഈ ഡിസ്പ്ലെ ഫുൾ എച്ച്ഡി+ റെസല്യൂഷനിലാണ് പ്രവർത്തിക്കുന്നത്. നോർഡ് സീരീസിലെ ഏറ്റവും ഉയർന്ന നിലവാരമുള്ള ഫോണായിരിക്കും ഇത്. അതുകൊണ്ട് തന്നെ ഡിസ്പ്ലെയ്ക്ക് ഉയർന്ന റിഫ്രഷ് റേറ്റ് ഉണ്ടായിരിക്കും. പാനലിന് 120Hz റിഫ്രഷ് റേറ്റ് വരെയാണ് പ്രതീക്ഷിക്കുന്നത്. ലീക്ക് റിപ്പോർട്ടുകൾ അനുസരിച്ച് പുറത്തിറങ്ങാനിരിക്കുന്ന വൺപ്ലസ് ഫോൺ മീഡിയടെക് ഡൈമൻസിറ്റി 9000 ചിപ്‌സെറ്റിന്റെ കരുത്തി ആയിരിക്കും പ്രവർത്തിക്കുന്നത്.