കുറഞ്ഞ ചെലവിലുള്ള ഇന്ത്യയിലെ ഹോസ്റ്റലുകള്‍ പരിചയപ്പെടാം; ഇത് ബജറ്റ് യാത്രക്കാര്‍ക്കും സോളോ ട്രാവലേഴ്‌സിനും പറ്റിയ ഇടം

യാത്രകള്‍ ഇപ്പോള്‍ പലര്‍ക്കും ഒരു ഹോബിയായി മാറിയിരിക്കുന്നു. റിമോട്ട് വര്‍ക്കിന് (വിദൂരത്തിരുന്നുള്ള ഓണ്‍ലൈന്‍ ജോലികള്‍) സാധ്യതയുള്ളതിനാല്‍ പലരും ഇപ്പോള്‍ യാത്രകള്‍ നടത്തിക്കൊണ്ടാണ് ജോലി ചെയ്യുന്നത്. എങ്കിലും ഒരു ഡിജിറ്റല്‍ നാടോടിയായി മാറാനോ അവധിക്കാല യാത്രകള്‍ നടത്താനോ പലരും മടിക്കുന്നതിനുള്ള ഒരു പ്രധാന കാരണം ടൂറിസ്റ്റ് സ്ഥലങ്ങളിലെ ഭാരിച്ച താമസ ചിലവുകളാണ്.

പോക്കറ്റ്-സൗഹൃദ താമസ സൗകര്യത്തിന് അവസരം ലഭിച്ചാല്‍ നിങ്ങള്‍ യാത്ര ചെയ്യാന്‍ തുടങ്ങുമെങ്കില്‍, കുറഞ്ഞ ചെലവിലുള്ള താമസ സൗകര്യങ്ങളുള്ള ഹോസ്റ്റലുകള്‍ ഇന്ത്യയില്‍ ഒട്ടേറെയുണ്ടന്ന് അറിയുക. ഈ ബജറ്റ് ഫ്രണ്ട്‌ലി ഹോസ്റ്റലുകള്‍ തിരഞ്ഞെടുത്താല്‍ ചെലവ് കുറവ് മാത്രമല്ല, മറ്റ് സഹയാത്രികരുമായി ഡോര്‍മിറ്ററികള്‍ പങ്കിട്ട് പുതിയ സൗഹൃദങ്ങള്‍ വളര്‍ത്തുകയും ചെയ്യാം.

പലപ്പോഴും സമാന ചിന്താഗതിക്കാരായ പുതിയ സുഹൃത്തുക്കളുമായും യാത്രാ സഖാക്കളുമായും യാത്രകള്‍ ആസ്വദിക്കാന്‍ പറ്റുന്നത് പല സോളോ യാത്രികര്‍ക്കും ഒരു അനുഗ്രഹമാണ്. കാരണം പങ്കിടലുകളിലൂടെ ചെലവുകള്‍ കുറയ്ക്കാന്‍ സാധിക്കും. അപരിചിതരുമായി മുറി പങ്കിടാന്‍ വിമുഖത കാണിക്കുന്ന യുവജനങ്ങള്‍ക്കിടയില്‍ ഇപ്പോള്‍ ഹോസ്റ്റല്‍ താമസം എന്ന ആശയം വര്‍ധിക്കുകയും പ്രിയകരമാവുകയും ചെയ്യുന്നുണ്ട്.

യാത്രാ സംസ്‌കാരം വളര്‍ന്നുവരുന്ന സാഹചര്യത്തില്‍, ബജറ്റ് ഫ്രണ്ട്‌ലി താമസ അനുഭവത്തിനായി ഇന്ത്യയിലെ പ്രശസ്തമായ ചില ഹോസ്റ്റലുകളുടെ ഒരു പട്ടിക നിങ്ങള്‍ക്കായി പങ്കുവയ്ക്കുകയാണ്.

യൂത്ത് ഹോസ്റ്റലുകള്‍

യൂത്ത് ഹോസ്റ്റലുകള്‍ വളരെ മുമ്പ് തന്നെയുള്ള യുവാക്കള്‍ക്കുള്ള താമസ കേന്ദ്രങ്ങളാണ്. ഹോസ്റ്റലുകളും ഡോര്‍മിറ്ററികളും എന്ന ആശയം വളര്‍ന്നത് മുതല്‍ യൂത്ത് ഹോസ്റ്റലുകള്‍ സജീവമായി പ്രവര്‍ത്തിക്കുന്നുണ്ട്. പതിറ്റാണ്ടുകളുടെ വിശ്വാസിയതയുള്ള ഈ കേന്ദ്രങ്ങള്‍, യൂത്ത് ഹോസ്റ്റല്‍ അസോസിയേഷന്‍ ഓഫ് ഇന്ത്യയാണ് നടത്തുന്നത്. ഒറ്റയ്ക്ക് പോകുന്ന യുവജനങ്ങള്‍ക്ക് സൗകര്യപ്രദമായ ഈ ഹോസ്റ്റലുകള്‍ സൗകര്യപ്രദവും താങ്ങാനാവുന്ന നിരക്കിലുള്ളുമാണ്. 500 രൂപ മുതല്‍ 2000 രൂപ വരെയാണ് താരിഫുകള്‍.

ബാക്ക്പാക്കര്‍ പാണ്ട

ഗോവയില്‍ ആദ്യമായി ആരംഭിച്ച ബാക്ക്പാക്കര്‍ പാണ്ട, ഇന്ന് വിജയകരമായി പോകുന്ന ഒരു ഹോസ്റ്റല്‍ ശൃംഖലയാണ്. ബാക്ക്പാക്കര്‍ പാണ്ടയുടെ ഹോസ്റ്റലുകള്‍ മണാലി, ഉദയ്പൂര്‍, മുംബൈ തുടങ്ങിയ സ്ഥലങ്ങളില്‍ വ്യാപിച്ചു കിടക്കുന്നു. സുഖപ്രദമായ താമസ അന്തരീക്ഷത്തിനും അടുക്കള സേവനങ്ങള്‍ക്കും സുരക്ഷയ്ക്കും പേരുകേട്ട ഈ ഹോസ്റ്റലുകള്‍ രാജ്യത്ത് ജനപ്രീതി നേടിക്കൊണ്ടിരിക്കുകയാണ്. 300 രൂപ മുതല്‍ 800 രൂപ വരെ വളരെ താങ്ങാനാകുന്ന താരിഫുകള്‍ ഇവിടെയുള്ളത്.

സോസ്റ്റല്‍

ബാക്ക്പാക്കര്‍മാര്‍ക്കായി രാജ്യത്ത് അതിവേഗം വളരുന്ന ഹോസ്റ്റലുകളുടെ ശൃംഖലയാണ് സോസ്റ്റല്‍ . അടിസ്ഥാന സൗകര്യങ്ങള്‍, എയര്‍കണ്ടീഷന്‍ ചെയ്ത മുറികള്‍, കോ-ഓപ്പറേറ്റീവ് സ്റ്റാഫ് എന്നിവയോടൊപ്പം, ഡല്‍ഹി, ജോധ്പൂര്‍, വാരണാസി, മുംബൈ, ഊട്ടി, ഗോവ തുടങ്ങിയ സ്ഥലങ്ങളിലെത്തുന്ന വിവിധ യാത്രക്കാര്‍ക്കായി സോസ്റ്റല്‍ തങ്ങളുടെ വാതിലുകള്‍ തുറന്നിരിട്ടിക്കുന്നു. മുറികളുടെ സ്റ്റാര്‍ഡേര്‍ഡ് അനുസരിച്ച് 600 രൂപ മുതല്‍ 2000 രൂപ വരെയാണ് താരിഫ്.

ഗോ സ്റ്റോപ്പ്‌സ്

ഊഷ്മളമായ വര്‍ണ്ണങ്ങളാല്‍ അലങ്കരിച്ച്, മനസ്സ് നിറയ്ക്കുന്ന ഇന്റീരിയറുമൊക്കെയായിട്ടുള്ള ഹോസ്റ്റല്‍ സേവനങ്ങളാണ് ഗോസ്റ്റോപ്പ്‌സ് നല്‍കുന്നത്. വാരാണസി, ഡല്‍ഹൗസി, ഗോവ, മുസ്സൂറി, ഋഷികേശ് എന്നിവിടങ്ങളില്‍ ഗോസ്റ്റോപ്പ്‌സ്, ഹോസ്റ്റല്‍ സേവനങ്ങള്‍ വാഗ്ദാനം ചെയ്യുന്നു. ഫ്രണ്ട്‌ലി സ്റ്റാഫ്, മികച്ച ഇന്‍-ഹൗസ് പ്രവര്‍ത്തനങ്ങള്‍, എളുപ്പമുള്ള കണക്റ്റിവിറ്റി എന്നിവയ്ക്ക് പേരുകേട്ട ഈ ഹോസ്റ്റലുകള്‍ ട്രാവലേഴ്‌സിനിടയില്‍ പ്രിയപ്പെട്ടവയാണ്.

മസ്റ്റാഷ്

നല്ല സാമൂഹിക അന്തരീക്ഷത്തിനും വിചിത്രമായ ഇന്റീരിയറുകള്‍ക്കും പേരുകേട്ട മസ്റ്റാഷ് ഹോസ്റ്റലുകളില്‍ ഒരു ബാക്ക്പാക്കര്‍-മാര്‍ക്ക് ആവശ്യമായതെല്ലാം ഉണ്ട്. ഒരു പൊതു അടുക്കള, ദിവസം മുഴുവനുമുള്ള റൂഫ്ടോപ്പ് കഫേകള്‍, തുണി അലക്കാനുള്ള സേവനങ്ങളും സൗകര്യങ്ങളും, ഒരു പൊതു സ്വീകരണമുറി, ഒറ്റയ്ക്ക് യാത്ര ചെയ്യുന്ന സ്ത്രീകള്‍ക്കും ഈ ഹോസ്റ്റലുകള്‍ അനുയോജ്യമാണ്. ജയ്പൂര്‍, പുഷ്‌കര്‍ തുടങ്ങി 12 വ്യത്യസ്ത നഗരങ്ങളിലാണ് മസ്റ്റാഷ് ഹോസ്റ്റലുകള്‍ സ്ഥിതി ചെയ്യുന്നു.