ആവേശം നിറച്ച് പാലക്കാട് പ്രവാസി സെന്‍റര്‍ വോളിബാൾ ടൂർണമെൻറ്

ദുബായ്:പാലക്കാട് പ്രവാസി സെന്ററിന്റെ ആഭിമുഖ്യത്തിൽ നടന്ന ഒന്നാമത് ഇൻഡോർ വോളിബാൾ ടൂർണമെന്റ് കളിക്കാരുടെയും കണികളുടെയും പങ്കാളിത്തംകൊണ്ട് ആവേശഭരിതമായി. അൽ ഖിസൈസിലുള്ള സയൻസ് ആൻഡ് ടെക്നോളജി ഇൻഡോർ ഗ്രൗണ്ടിൽ അരങ്ങേറിയ മത്സരത്തിൽ സംഘടനയുടെ ഭാഗമായ വിവിധ യൂണിറ്റുകളെ പ്രതിനിധീകരിച്ചു.

ആറ് ടീമുകൾ പങ്കെടുത്തു. മത്സരത്തിൽ മാസ്റ്റേഴ്സ് ടീം ഒന്നാം സ്ഥാനക്കാർക്കുള്ള ട്രോഫി നേടി. ടീം ഫൈറ്റേഴ്സ് റണ്ണറപ്പും, സ്ട്രൈക്കേഴ്‌സും റോക്കർസും യഥാക്രമം രണ്ടും മൂന്നും റണ്ണറപ്പുമായി. മികച്ച കളിക്കാരനുള്ള സമ്മാനം റഷീദ് നേടി. മറ്റു സമ്മാനാർഹർ - അറ്റാക്കർ - സജീർ, ആൾ റൗണ്ടർ ഫയാസ്, സെറ്റ്ലെർ - വിനോദ്, ലിബറോ - ജിനീഷ്.

മുൻകാല വോളിബാൾ താരങ്ങളായ ശിവകുമാർ മേനോൻ, സുദർശൻ, മുരളി കാവശ്ശേരി എന്നിവരുടെ സംഘടനാ നേതൃത്വത്തിലാണ് ടൂർണമെന്റ് അരങ്ങേറിയത്.

കുട്ടികൾക്കും മുതിർന്നവർക്കുമുള്ള വിവിധ ഗെയിമുകളിലെ സമാന മത്സരങ്ങൾ യു എ ഇയുടെ വിവിധ ഭാഗങ്ങളിൽ സംഘടിപ്പിക്കുവാൻ പാലക്കാട് പ്രവാസി സെൻറർ തീരുമാനിച്ചിട്ടുണ്ടെന്ന് സെന്റർ പ്രസിഡണ്ട് പ്രദീപ് കുമാർ അബുദാബി, സെക്രട്ടറി പ്രദീപ് നെന്മാറ, വൈസ് പ്രസിഡന്റ് ശശികുമാർ ചിറ്റൂർ എന്നിവർ അറിയിച്ചു.

കളിക്കാർക്കും കാണികൾക്കും ആവേശം പകരുന്നതിന് മത്സരത്തിലുടനീളം ചെണ്ടമേളവും അരങ്ങേറി.