ഡി അഡിക്ഷന്‍ സെന്ററില്‍ ചികിത്സയ്ക്കായി വന്ന യുവാവ് പുഴയില്‍ ചാടി. പറവൂര്‍ സ്വദേശിയാണ് പുഴയില്‍ ചാടിയത്

തൃശ്ശൂര്‍: ഡി അഡിക്ഷന്‍ സെന്ററില്‍ ചികിത്സയ്ക്കായി വന്ന യുവാവ് പുഴയില്‍ ചാടി. തിരൂര്‍ വെട്ടം വിആര്‍സി ഡി അഡിക്ഷന്‍ സെന്ററില്‍ ചികിത്സയ്ക്കായി വന്ന നോര്‍ത്ത് പറവൂര്‍ സ്വദേശിയായ 26കാരനാണ് പുഴയില്‍ ചാടിയത്.

യുവാവിന് സാരമായി പരിക്കേറ്റിട്ടുണ്ട്. നിലവില്‍ തൃശ്ശൂരിലെ സ്വകാര്യ ആശുപത്രിയില്‍ ചികിത്സയിലാണ്. പുഴയില്‍ ചാടിയ യുവാവിനെ സുഹൃത്തുക്കളും നാട്ടുകാരും ചേര്‍ന്ന് അടുത്തുള്ള തോണി ഉപയോഗിച്ച് പുഴയിലിറങ്ങി യുവാവിനെ രക്ഷിക്കുകയായിരുന്നു.

ചികിത്സയ്ക്കായി ഡി അഡിക്ഷന്‍ സെന്ററിലെത്തിച്ച യുവാവ് വഴിയില്‍വെച്ച് മോതിരം വിഴുങ്ങുകയായിരുന്നു. തുടര്‍ന്ന് യുവാവിനെ തിരൂരിലെ സ്വകാര്യ ആശുപത്രിയില്‍ മോതിരം പുറത്തെടുക്കാന്‍ കൊണ്ടുവന്നു. എക്‌സ്‌റേയില്‍ വയറ്റില്‍ മോതിരം കണ്ടെത്തി.

മലവിസര്‍ജ്ജനത്തിനൊപ്പം മോതിരം പുറത്തുവരുമെന്ന് ആശുപത്രി അധികൃതര്‍ പറഞ്ഞ് ചികിത്സ നല്‍കി. തിരിച്ച് വിആര്‍സി ആശുപത്രിയിലേക്ക് കൊണ്ടുപോകുന്നതിനിടെ, യുവാവ് ഏറ്റിരിക്കടവ് പാലത്തിനുമുകളില്‍നിന്ന് തിരൂര്‍ - പൊന്നാനിപുഴയിലേക്ക് ചാടുകയായിരുന്നു.