സ്തനാർബുദം വരാനുള്ള സാധ്യത കുറയ്ക്കാൻ ചെയ്യേണ്ട കാര്യങ്ങൾ എന്തൊക്കെയാണെന്ന് നോക്കാം.

സ്ത്രീകളെ ബാധിക്കുന്ന അര്‍ബുദങ്ങളില്‍ ഏറ്റവും പ്രധാനപ്പെട്ട ഒന്നാണ് സ്തനാര്‍ബുദം. ലോകമെമ്പാടും ഓരോ വർഷവും ദശലക്ഷക്കണക്കിന് പുതിയ കേസുകൾ കണ്ടെത്തുന്നു എന്നാണ് പഠനങ്ങള്‍ പറയുന്നത്. അനാരോഗ്യ ഭക്ഷണരീതി, ജനിതകപരമായ കാരണങ്ങള്‍, പ്രായം, അമിത വണ്ണം, ജീവിതശൈലി എന്നിവയെല്ലാം സ്തനാര്‍ബുദത്തിലേക്ക് നയിക്കാവുന്ന ഘടകങ്ങളാണ്. 

 ആരോഗ്യകരമായ ശരീര ഭാരം നിലനിർത്തുന്നത് സ്തനാർബുദ സാധ്യത കുറയ്ക്കുന്നതിൽ നിർണായകമാണ്. അമിതമായ ശരീരഭാരം, പ്രത്യേകിച്ച് ആർത്തവവിരാമത്തിന് ശേഷം, സ്തനാർബുദം ഉണ്ടാകാനുള്ള സാധ്യതയുമായി ബന്ധപ്പെട്ടിരിക്കുന്നു. ആരോഗ്യമുള്ള സ്ത്രീകളെ അപേക്ഷിച്ച്, അമിതവണ്ണം ഉള്ള ആർത്തവവിരാമം കഴിഞ്ഞ സ്ത്രീകൾക്ക് സ്തനാർബുദ സാധ്യത 30-60% കൂടുതലാണ്. 

സ്ഥിരമായ ശാരീരിക പ്രവർത്തനങ്ങൾ സ്തനാർബുദ സാധ്യത കുറയ്ക്കുമെന്നാണ് പഠനങ്ങള്‍ പറയുന്നത്.  ബ്രിട്ടീഷ് ജേണൽ ഓഫ് ക്യാൻസറിൽ പ്രസിദ്ധീകരിച്ച ഒരു പഠനത്തിൽ സ്ഥിരമായി ശാരീരിക പ്രവർത്തനങ്ങളിൽ ഏർപ്പെടുന്ന സ്ത്രീകൾക്ക് സ്തനാർബുദ സാധ്യത 20% കുറയ്ക്കുന്നതായി കണ്ടെത്തി. വ്യായാമം ചെയ്യുന്നത് ശരീരത്തിന്‍റെ മൊത്തം ആരോഗ്യത്തിനും നല്ലതാണ്

മുലയൂട്ടൽ സ്തനാർബുദ സാധ്യത കുറയ്ക്കുമെന്ന് തെളിയിക്കപ്പെട്ടിട്ടുണ്ട്.  അന്നൽസ് ഓഫ് ഓങ്കോളജിയിൽ പ്രസിദ്ധീകരിച്ച ഒരു മെറ്റാ അനാലിസിസില്‍ പറയുന്നത്,  ഒരിക്കലും മുലയൂട്ടാത്ത സ്ത്രീകളെ അപേക്ഷിച്ച് 12 മാസത്തിൽ കൂടുതലുള്ള മുലയൂട്ടൽ സ്തനാർബുദ സാധ്യത 26% വരെ കുറയ്ക്കുമെന്നാണ്. 

ആരോഗ്യകരമായ ഭക്ഷണക്രമം സ്തനാർബുദ സാധ്യത കുറയ്ക്കാൻ സഹായിക്കും. ഇതിനായി പഴങ്ങൾ, പച്ചക്കറികൾ, ധാന്യങ്ങൾ, പ്രോട്ടീനുകൾ എന്നിവ ഡയറ്റില്‍ ഉള്‍പ്പെടുത്തുക. അതുപോലെ സംസ്കരിച്ചതും ഉയർന്ന കൊഴുപ്പുള്ളതുമായ ഭക്ഷണങ്ങൾ പരിമിതപ്പെടുത്തുക. ഇത് അമിത വണ്ണം, കൊളസ്ട്രോള്‍ എന്നിവയെ തടയാനും സഹായിക്കും. 

മാമോഗ്രാം, ക്ലിനിക്കൽ ബ്രെസ്റ്റ് എക്സാമുകൾ, സെൽഫ് എക്സാമുകൾ എന്നിവയുൾപ്പെടെയുള്ള പതിവ് സ്ക്രീനിംഗുകൾ ഉറപ്പാക്കുക. അമേരിക്കൻ ക്യാൻസർ സൊസൈറ്റിയുടെ അഭിപ്രായത്തിൽ, സ്തനാർബുദം ഏറ്റവും ചികിത്സിക്കാവുന്ന സമയത്തുതന്നെ കണ്ടുപിടിക്കാൻ സാധാരണ മാമോഗ്രാം സഹായിക്കുമെന്നാണ്. അതിനാല്‍ കൃത്യസമയത്ത് പരിശോധനകള്‍ ചെയ്യുക. കണ്ണാടിക്ക് മുമ്പില്‍ നിന്നു കൊണ്ട് ഇരു മാറുകളും പരിശോധിച്ചാല്‍ തന്നെ സ്തനാര്‍ബുദ്ദത്തിന്‍റെ ആരംഭ ലക്ഷണങ്ങളെ സ്ത്രീകള്‍ക്ക്  തിരിച്ചറിയാം.