ത്രിവത്സര ഹാൻഡ്‌ലൂം ആൻഡ് ടെക്‌സ്റ്റൈൽ ടെക്‌നോളജി ഡിപ്ലോമ കോഴ്‌സിന് അപേക്ഷിക്കാം

ഇന്ത്യൻ ഇൻസ്റ്റിറ്റ്യൂട്ട് ഓഫ് ഹാൻഡ്‌ലൂം ടെക്‌നോളജി വിവിധ കാംപസുകളിൽ നടത്തുന്ന ത്രിവത്സര ഹാൻഡ്‌ലൂം ആൻഡ് ടെക്‌സ്റ്റൈൽ ടെക്‌നോളജി ഡിപ്ലോമ കോഴ്‌സിന് അപേക്ഷിക്കാം.കണ്ണൂർ, സേലം (തമിഴ്‌നാട്), ഗഡക് (കർണാടക), വെങ്കിടഗിരി (ആന്ധ്രാപ്രദേശ്) എന്നീ കാംപസുകളിലാണ് പ്രവേശനം.

 യോഗ്യത: എസ്.എസ്.എൽ.സി. അഥവാ തത്തുല്യപരീക്ഷയിൽ ഇംഗ്ലീഷ് ഒരു വിഷയമായി പഠിച്ച് വിജയിച്ചിരിക്കണം. പ്രായം 2024 ജൂലായ് ഒന്നിന് 15-നും 23-നുമിടയിൽ. പട്ടികജാതി/വർഗക്കാർക്ക് പരമാവധി പ്രായം 25. 20 ശതമാനം സീറ്റുകൾ നെയ്ത്തുവിഭാഗത്തിൽപ്പെട്ടവർക്ക് സംവരണം ചെയ്തിട്ടുണ്ട്.

കേരള ഗവൺമെന്റ് സംവരണതത്ത്വം അനുസരിച്ചുള്ള സംവരണമുണ്ട്. കണ്ണൂരിലെ ആകെയുള്ള 40 സീറ്റിൽ 30 സീറ്റ് കേരളത്തിൽനിന്നുള്ളവർക്കും ബാക്കി മറ്റു സംസ്ഥാനങ്ങളിൽ നിന്നുള്ളവർക്കുമാണ്. കേരളത്തിൽനിന്നുള്ള വിദ്യാർഥികൾക്ക് സേലം-17, വെങ്കിടഗിരി-മൂന്ന്, ഗഡക്-മൂന്ന് എന്നീ അനുപാതത്തിൽ പ്രവേശനം ലഭിക്കും. സർക്കാർ അനുവദിക്കുന്ന നിരക്കിൽ സ്റ്റൈ​പ്പൻഡ്‌ ലഭിക്കും.

അപേക്ഷ നേരിട്ട് ഇൻസ്റ്റിറ്റ്യൂട്ട് ഓഫീസിലും www.iihtkannur.ac.in വഴിയും നൽകാം. അപേക്ഷയുടെ പ്രിന്റൗട്ട് ജൂൺ 26-നുമുൻപ് ഇൻസ്റ്റിറ്റ്യൂട്ടിൽ ലഭിക്കണം. ഫോൺ: 0497 2835390, 0497 2965390.