മുടി വളർച്ചയെ ഉത്തേജിപ്പിക്കുന്ന ഭക്ഷണങ്ങൾ ഏതൊക്കെയാണെന്ന് നോക്കാം..

മുടി കൊഴിച്ചിൽ,  മുടി പൊട്ടൽ, മുടി വളർച്ച കുറയൽ തുടങ്ങിയ സാധാരണ മുടിയുമായി ബന്ധപ്പെട്ട് നിരവധി പ്രശ്‌നങ്ങൾ നമ്മളിൽ മിക്കവരും അനുഭവിക്കുന്നുണ്ട്.  തിളങ്ങുന്നതും ശക്തവും കട്ടിയുള്ളതുമായ മുടി ലഭിക്കുന്നതിന്  നിയന്ത്രിക്കാൻ കഴിയുന്ന ഘടകമാണ് നല്ല പോഷകാഹാരം. മുടിയുടെ ആരോ​ഗ്യത്തിന് ഭക്ഷണക്രമം പ്രധാന പങ്കാണ് വഹിക്കുന്നത്. 

കൊളാജൻ ഉൽപ്പാദനം വർദ്ധിപ്പിക്കുന്ന വിവിധ പ്രോട്ടീനുകൾ മുട്ടയിൽ അടങ്ങിയിട്ടുണ്ട്. കൊളാജൻ സിന്തസിസ് വർദ്ധിക്കുന്നത് മുടിയുടെ ശക്തിയും കനവും മെച്ചപ്പെടുത്തുന്നു. അവയിൽ മുടിയുടെ അവശ്യ ഘടകമായ ബയോട്ടിൻ അടങ്ങിയിട്ടുണ്ട്യ ഇത് കഴിക്കുന്നത് മുടിയുടെ വളർച്ച വർദ്ധിപ്പിക്കുന്നു. രക്തചംക്രമണം മെച്ചപ്പെടുത്തുകയും മുടിക്ക് ബലം നൽകുകയും ചെയ്യുന്ന ഇരുമ്പും മുട്ടയിൽ അടങ്ങിയിട്ടുണ്ട്. സിങ്ക്, വിറ്റാമിൻ എ, വിറ്റാമിൻ ഡി, ല്യൂട്ടിൻ എന്നിവ മുടിക്ക് ഗുണം ചെയ്യുന്ന മുട്ടയിലെ മറ്റ് പ്രധാന പോഷകങ്ങളാണ്. 

പച്ച ഇലക്കറികളിൽ വിറ്റാമിൻ എ, സി, കരോട്ടിൻ, ഫോളേറ്റ്, പൊട്ടാസ്യം എന്നിവ ധാരാളം അടങ്ങിയിട്ടുണ്ട്. പച്ച ഇലക്കറികൾ ശരീരത്തിൽ കെരാറ്റിൻ നൽകുകയും മുടിയെ ശക്തിപ്പെടുത്തുകയും ചെയ്യുന്നു. പച്ച ഇലക്കറികൾ ഇരുമ്പിൻ്റെ സമ്പന്നമായ ഉറവിടമാണ്. ഓക്സിജനും പോഷകങ്ങളും വഹിക്കുന്ന ശരീരത്തിലെ അവശ്യ ധാതുവാണിത്. ഇരുമ്പിൻ്റെ അളവ് കുറവായതിനാൽ മുടിയ്ക്ക് ആവശ്യമായ പോഷകങ്ങൾ ലഭിക്കുന്നില്ല. ഇത് മുടി വളർച്ചയെ തടസ്സപ്പെടുത്തുകയും മുടിയുടെ ഇഴകളെ ദുർബലപ്പെടുത്തുകയും ചെയ്യുന്നു. 

സാൽമണിൽ ഒമേഗ-3 ഫാറ്റി ആസിഡുകൾ, പ്രോട്ടീൻ, വിറ്റാമിൻ ഡി, ആൻ്റിഓക്‌സിഡൻ്റുകൾ എന്നിവ അടങ്ങിയിട്ടുണ്ട്. ഒമേഗ -3 ഫാറ്റി ആസിഡുകൾ തലയോട്ടിയുടെ ആരോഗ്യത്തെ സഹായിക്കുന്നു.സാൽമണിലെ ഒമേഗ 3 ഫാറ്റി ആസിഡുകൾ ഹൃദയാരോഗ്യം മെച്ചപ്പെടുത്തുകയും വീക്കം കുറയ്ക്കുകയും ചെയ്യുന്നു.

മധുരക്കിഴങ്ങിൽ ബീറ്റാ കരോട്ടിൻ അടങ്ങിയിട്ടുണ്ട്. ഇത് ശരീരത്തിൽ വിറ്റാമിൻ എ ആയി പരിവർത്തനം ചെയ്യപ്പെടുന്നു. തലയോട്ടിയെ ആരോഗ്യകരമായി നിലനിർത്തുന്ന എണ്ണമയമുള്ള പദാർത്ഥമായ സെബം ഉൽപ്പാദിപ്പിക്കുന്നതിന് വിറ്റാമിൻ എ സഹായിക്കുന്നു. 

നാരങ്ങ, ഓറഞ്ച്, മുന്തിരി തുടങ്ങിയ സിട്രസ് പഴങ്ങൾ വിറ്റാമിൻ സിയുടെ സമ്പന്നമായ ഉറവിടമാണ്. വിറ്റാമിൻ സി കൊളാജൻ ഉത്പാദനം വർദ്ധിപ്പിക്കുകയും തലയോട്ടിയിലെ രക്തചംക്രമണം മെച്ചപ്പെടുത്തുകയും ചെയ്യുന്നു. ഇരുമ്പ് ആഗിരണം ചെയ്യുന്നതിനും ഇത് സഹായിക്കുന്നു. ഇത് തലയോട്ടിയിലെ രക്തചംക്രമണം മെച്ചപ്പെടുത്തുകയും മുടിയുടെ വളർച്ച മെച്ചപ്പെടുത്തുകയും ഉചിതമായ പോഷകാഹാരം നൽകുകയും ചെയ്യുന്നു. 

ആരോഗ്യകരമായ കൊഴുപ്പുകൾ, വിറ്റാമിൻ ഇ, ആൻ്റിഓക്‌സിഡൻ്റുകൾ എന്നിവയാൽ സമ്പന്നമാണ് അവോക്കാഡോ.  കൊഴുപ്പുകൾ തലയോട്ടിയെ പോഷിപ്പിക്കുകയും മുടി വളർച്ചയെ പ്രോത്സാഹിപ്പിക്കുകയും ചെയ്യുന്നു. 

ബദാം, വാൾനട്ട് എന്നിവ മുടിക്ക് ധാരാളം ആരോഗ്യ ഗുണങ്ങൾ നൽകുന്നു. അവയിൽ ധാരാളം ഒമേഗ -3 ഫാറ്റി ആസിഡുകൾ അടങ്ങിയിട്ടുണ്ട്. ഇത് മുടിയുടെ കനം വർദ്ധിപ്പിക്കുകയും ജലാംശം നിലനിർത്തുകയും ശക്തമാക്കുകയും ചെയ്യുന്നു. ക്യാരറ്റ് വിറ്റാമിൻ എയുടെ സമ്പന്നമായ ഉറവിടമാണ്. ഇത് മുടിക്ക് ധാരാളം ഗുണങ്ങൾ നൽകുന്നു. മുടി ഉൾപ്പെടെയുള്ള ശരീരകോശങ്ങളുടെ വളർച്ചയ്ക്ക് വിറ്റാമിൻ എ അത്യാവശ്യമാണ്. ഇത് വേഗത്തിലുള്ള മുടി വളർച്ചയ്ക്ക് സഹായിക്കുന്നു.