ഹ്യുണ്ടായ് ഇന്ത്യ ആഭ്യന്തര വിപണിയിൽ പുതിയ മോഡലുകൾ അവതരിപ്പിക്കുന്നു

ഹ്യുണ്ടായ് ഇന്ത്യ ആഭ്യന്തര വിപണിയിൽ നിരവധി പുതിയ മോഡലുകൾ അവതരിപ്പിക്കാൻ ഒരുങ്ങുന്നു. ഈ ശ്രേണിയിൽ, ഹ്യുണ്ടായ് ക്രെറ്റ ഫെയ്‌സ്‌ലിഫ്റ്റിൻ്റെ വൻ വിജയത്തിന് ശേഷം, കമ്പനി ഇപ്പോൾ അതിൻ്റെ ജനപ്രിയ എസ്‌യുവി അൽകാസറിൻ്റെ അപ്‌ഡേറ്റ് ചെയ്‍ത പതിപ്പ് വിപണിയിൽ അവതരിപ്പിക്കാൻ പോകുന്നു.

ഹ്യുണ്ടായ് അൽകാസർ ഫെയ്‌സ്‌ലിഫ്റ്റിന് എക്സ്റ്റീരിയറിലും ഇൻ്റീരിയറിലും വലിയ മാറ്റങ്ങൾ വരാൻ സാധ്യതയുണ്ട്. വരാനിരിക്കുന്ന എസ്‌യുവി 6, 7 സീറ്റർ കോൺഫിഗറേഷനുകളിൽ കമ്പനി വാഗ്ദാനം ചെയ്യുന്നത് തുടരും. ഫെസ്റ്റിവൽ സീസണിൽ അതായത് സെപ്തംബർ അല്ലെങ്കിൽ ഒക്ടോബറിൽ കമ്പനി വരാനിരിക്കുന്ന അൽകാസർ ഫെയ്‌സ്‌ലിഫ്റ്റ് അവതരിപ്പിക്കുമെന്നാണ് റിപ്പോര്‍ട്ടുകൾ.

ഹ്യുണ്ടായ് അൽകാസർ ഫെയ്‌സ്‌ലിഫ്റ്റിൻ്റെ സാധ്യമായ സവിശേഷതകൾ, പവർട്രെയിൻ, വില എന്നിവയെക്കുറിച്ച് വിശദമായി അറിയാം. ഹ്യുണ്ടായ് അൽകാസർ ഫെയ്‌സ്‌ലിഫ്റ്റിൻ്റെ ഇൻ്റീരിയറിൽ 10.25 ഇഞ്ച് സ്‌ക്രീൻ, ലെവൽ-2 ADAS, ഡ്യുവൽ സോൺ ക്ലൈമറ്റ് കൺട്രോൾ, പനോരമിക് സൺറൂഫ്, വെൻ്റിലേറ്റഡ് സീറ്റുകൾ എന്നിവ ഉൾപ്പെട്ടേക്കാം. അതേസമയം പരിഷ്‍കരിച്ച അൽകാസറിൻ്റെ പവർട്രെയിനിൽ മാറ്റങ്ങളൊന്നും പ്രതീക്ഷിക്കുന്നില്ല.

കാറിന് 1.5 ലിറ്റർ ടർബോ-പെട്രോൾ എഞ്ചിൻ ലഭിക്കാൻ സാധ്യതയുണ്ട്. ഈ എഞ്ചിൻ പരമാവധി 160 ബിഎച്ച്പി കരുത്തും 253 എൻഎം പരമാവധി ടോർക്കും സൃഷ്ടിക്കാൻ പ്രാപ്തമാണ്. 116 bhp കരുത്തും 250 Nm ടോർക്കും പരമാവധി സൃഷ്‍ടിക്കുന്ന 1.5 ലിറ്റർ ഡീസൽ എഞ്ചിനും കാറിന് നൽകും. കാറിൻ്റെ എഞ്ചിൻ മാനുവൽ, ഓട്ടോമാറ്റിക് ഗിയർബോക്‌സുകളുമായി ഘടിപ്പിക്കും.