ജീവിക്കാന്‍ അമ്മയുടെ പെന്‍ഷന്‍;മരിച്ച അമ്മയുടെ മൃതദേഹം സൂക്ഷിച്ച് വെച്ച് യുവാവ്

ഗുവാഹത്തി:മരിച്ച അമ്മയുടെ മൃതദേഹം സൂക്ഷിച്ച് വെച്ച് യുവാവ്. ഗുവാഹത്തിയിലെ ജ്യോതികുച്ചി മേഖലയിലാണ് സംഭവം. ജയദീപ് ദേവ് എന്നയാള്‍ മരിച്ച അമ്മ പൂര്‍ണിമ ദേവിന്റെ മൃതദേഹം അവരുടെ വീട്ടില്‍ സൂക്ഷിച്ചിരുന്നു. 

അമ്മ മരിച്ചിട്ടും ജയദീപ് എല്ലാ ദിവസവും ഭക്ഷണം കൊണ്ടുവരുന്നത് തുടര്‍ന്നു. അമ്മ ജീവിച്ചിരിപ്പുണ്ടെന്ന മട്ടില്‍ പെരുമാറി. പണം പിന്‍വലിക്കാന്‍ സ്ഥിരമായി ബാങ്കിലെത്തുന്നത് പോലും സമീപവാസികള്‍ക്കിടയില്‍ സംശയം ജനിപ്പിച്ചിരുന്നു.

ഏറെ നാളായി പൂര്‍ണിമയെ കാണാത്തതിനെ തുടര്‍ന്ന് സമീപവാസികള്‍ ആശങ്കയിലായി. വീടിനുചുറ്റും പെരുകുന്ന മാലിന്യക്കൂമ്പാരവും ഏറെ നാളായി പൂട്ടിക്കിടക്കുന്ന അവസ്ഥയും ഇവരുടെ സംശയങ്ങള്‍ക്ക് ആക്കം കൂട്ടി. ജയദീപിനെ ചോദ്യം ചെയ്തപ്പോള്‍, തന്റെ മാതാപിതാക്കള്‍ രണ്ടുപേരും മരിച്ചുവെന്ന് പറഞ്ഞെങ്കിലും ആരെങ്കിലും സഹായിക്കുന്നതുവരെ വീട് വൃത്തിയാക്കില്ല.

ഇയാളുടെ പെരുമാറ്റത്തില്‍ അസ്വാഭാവികത കണ്ട അയല്‍വാസികള്‍ പോലീസില്‍ വിവരമറിയിച്ചു. ജയദീപിന്റെ വീട്ടില്‍ നടത്തിയ അന്വേഷണത്തില്‍ കട്ടിലില്‍ ഒരു സ്ത്രീയുടെ അസ്ഥികൂടം കണ്ടെത്തി. ആ മൃതദേഹം അമ്മ പൂര്‍ണിമ ദേവിന്റെ അസ്ഥികൂടമാണെന്ന് പൊലീസ് കണ്ടെത്തി. 

ജയദീപിന് മാനസിക പ്രശ്നങ്ങളുണ്ടാകാമെന്നും അമ്മയെ ഏറെ നാളായി വീട്ടില്‍ പാര്‍പ്പിച്ചിരിക്കുകയായിരുന്നെന്നും അന്വേഷണത്തില്‍ സൂചനയുണ്ട്.  ജയദീപിന് ജോലിയില്ലാത്തതിനാല്‍ സാമ്പത്തിക സഹായത്തിനായി അമ്മയുടെ പെന്‍ഷനാണ് ആശ്രയിച്ചിരുന്നത്.

കൂടുതല്‍ അന്വേഷണത്തില്‍ ജയദീപ് പതിവായി 'ഓം നമഃ ശിവായ' മന്ത്രം ജപിക്കാറുണ്ടെന്ന് കണ്ടെത്തി. അവശിഷ്ടങ്ങള്‍ക്ക് അടുത്തായി, ശിവന്റെ ചിത്രം,  വിളക്ക്, വഴിപാടുകള്‍ തുടങ്ങിയതെല്ലാം പൊലീസ് കണ്ടെത്തി. അമ്മയെ ജീവിതത്തിലേക്ക് തിരികെ കൊണ്ടുവരാനുള്ള മന്ത്രത്തിന്റെ ശക്തിയില്‍ ജയദീപ് വിശ്വസിച്ചിരിക്കാമെന്നാണ് അധികൃതര്‍ സംശയിക്കുന്നത്.