ഉണ്ണി മുകുന്ദനെ നായകനാക്കി രഞ്ജിത്ത് ശങ്കർ സംവിധാനം ചെയ്യുന്ന 'ജയ് ഗണേഷ്' എന്ന ചിത്രത്തിന്റെ ഫസ്റ്റ്ലുക്ക് പോസ്റ്റർ പുറത്തിറങ്ങി. വീൽ ചെയറിലിരിക്കുന്ന നായകനേയാണ് പോസ്റ്ററിൽ അവതരിപ്പിച്ചിരിക്കുന്നത്. ഗണപതിയായാണ് ഉണ്ണി മുകുന്ദൻ എത്തുക എന്ന ഊഹാപോഹങ്ങളെ കാറ്റിൽപ്പറത്തിയാണ് ജയ് ഗണേഷിന്റെ ഫസ്റ്റ്ലുക്ക് എത്തിയിരിക്കുന്നത്.
ഫോർ ഇയേഴ്സ് എന്ന ചിത്രത്തിനുശേഷം രഞ്ജിത് ശങ്കർ തിരക്കഥയെഴുതി സംവിധാനം ചെയ്യുന്ന ചിത്രമാണ് ജയ് ഗണേഷ്. മഹിമ നമ്പ്യാരാണ് നായികയാവുന്നത്. നീണ്ട ഇടവേളയ്ക്ക് ശേഷം ജോമോൾ മലയാളസിനിമയിലേക്ക് തിരിച്ചുവരുന്ന ചിത്രം കൂടിയാണ് ജയ് ഗണേഷ്. ഒരു അഭിഭാഷകയുടെ വേഷത്തിലാണ് ജോമോളെത്തുന്നത്. ചിത്രത്തിലൂടെ പ്രശസ്ത തമിഴ്, തെലുങ്ക് താരം രവീന്ദ്ര വിജയ് മലയാളത്തിൽ അരങ്ങേറ്റംകുറിക്കുകയാണ്. അശോകൻ, ഹരീഷ് പേരടി എന്നിവരും താരനിരയിലുണ്ട്.
ശങ്കർ ശർമയാണ് ജയ് ഗണേഷിനായി പാട്ടുകളൊരുക്കുന്നത്. ചന്ദ്രു സെൽവരാജ് ഛായാഗ്രഹണവും സംഗീത് പ്രതാപ് എഡിറ്റിങ്ങും തപസ് നായക് സൗണ്ട് ഡിസൈനും നിർവഹിക്കുന്നു. സൂരജ് കുറവിലങ്ങാട് ആണ് പ്രൊഡക്ഷൻ ഡിസൈനർ. മേക്കപ്പ് -റോണക്സ് സേവ്യർ, കോസ്റ്റ്യൂംസ് -വിപിൻദാസ്, പ്രൊഡക്ഷൻ കൺട്രോളർ -സജീവ് ചന്ദിരൂർ, അസോ.ഡയറക്ടർ -അനൂപ് മോഹൻ, ഡി.ഐ -ലിജു പ്രഭാകർ, വി.എഫ്.എക്സ് -ഡി.ടി.എം, സബ്ടൈറ്റിൽസ് -ഫിൽ ഇൻ ദ ബ്ലാങ്ക്സ്, പ്രൊമോഷൻ കൺസൾട്ടന്റ് -വിപിൻ കുമാർ, 10ജി മീഡിയ, സ്റ്റിൽസ് -നവീൻ മുരളി, പബ്ലിസിറ്റി ഡിസൈനർ -ആന്റണി സ്റ്റീഫൻ.
നവംബർ 11-നാണ് സിനിമയുടെ ചിത്രീകരണം ആരംഭിച്ചത്. രഞ്ജിത് ശങ്കറും ഉണ്ണി മുകുന്ദനും ചേർന്നാണ് ചിത്രം നിർമിക്കുന്നത്. വിഷ്ണു ശശിശങ്കർ സംവിധാനം ചെയ്ത മാളികപ്പുറമാണ് ഒടുവിലായി തിയേറ്ററുകളിലെത്തിയ ഉണ്ണി മുകുന്ദൻ ചിത്രം. ഗന്ധർവ ജൂനിയർ, മാർക്കോ എന്നീ ചിത്രങ്ങളാണ് താരത്തിന്റേതായി അണിയറയിൽ ഒരുങ്ങുന്നത്.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/zHWt1GnoZI1wTV6lehz7.jpg)