'മകള്‍ ജോലി കഴിഞ്ഞു നേരേ താമസസ്ഥലത്തേക്കാണ് പോകുന്നത്. കഴിഞ്ഞ ദിവസവും അങ്ങനെയാണ് പറഞ്ഞത്'. മകളുടെ മരണം സംബന്ധിച്ച് വിശദമായ അന്വേഷണം ആവശ്യപ്പെട്ട് പിതാവ് മധുസൂധനന്‍

തിരുവനന്തപുരം: ഐ ബി ഉദ്യോഗസ്ഥ മേഘയുടെ മരണത്തില്‍ ദുരൂഹത ആരോപിച്ച് പിതാവ് മധുസൂധനന്‍. മകള്‍ ജോലി കഴിഞ്ഞു നേരേ താമസസ്ഥലത്തേക്കാണ് പോകുന്നത്. 

കഴിഞ്ഞ ദിവസവും അങ്ങനെയാണ് പറഞ്ഞതെന്ന് മധുസൂധനന്‍ പറഞ്ഞു. താമസസ്ഥലത്തേക്ക് പോകുന്ന വഴി റെയില്‍വേ പാത ഇല്ല. റെയില്‍വേ പാത ഉള്ള സ്ഥലത്തേക്ക് പോകണമെങ്കില്‍ അതിനു പിന്നില്‍ എന്തോ ഉണ്ട്, അതാണ് ദുരൂഹത എന്ന് പറയുന്നതെന്ന് അദ്ദേഹം പറയുന്നു.

റെയില്‍വേ ട്രാക്കിലൂടെ ഫോണില്‍ സംസാരിച്ച് നടന്നു എന്നാണ് ദൃസാക്ഷികള്‍ പറഞ്ഞത്. അന്വേഷിച്ചാല്‍ ഫോണ്‍ വിളിച്ചത് ആരെന്ന് കണ്ടെത്താനാകുമെന്നും അദ്ദേഹം കൂട്ടിച്ചേര്‍ത്തു. ജോലിസ്ഥലത്ത് പ്രശ്‌നമുള്ളതായി അറിവില്ലെന്ന് വ്യക്തമാക്കിയ അദ്ദേഹം മകളുടെ മരണം സംബന്ധിച്ച് വിശദമായ അന്വേഷണം ആവശ്യപ്പെട്ടു.

മരണം സംഭവിക്കുന്ന തലേ ദിവസം നൈറ്റ് ഡ്യൂട്ടി കഴിഞ്ഞ് വിമാനത്താവളത്തില്‍ നിന്ന് ഇറങ്ങിയതായിരുന്നു മേഘ. തിരുവനന്തപുരത്തേക്ക് വരികയായിരുന്ന ജയന്തി ജനത എക്‌സ്പ്രസാണ് മേഘയെ ഇടിച്ചത്.

 തിരുവനന്തപുരം ചാക്ക റെയില്‍വേ ട്രാക്കില്‍ ആണ് രാവിലെ മേഘയുടെ മൃതദേഹം കണ്ടെത്തിയത്. ഐബിയിലെ ഉദ്യോഗസ്ഥനായ മലപ്പുറം സ്വദേശിയുമായി പെണ്‍കുട്ടിക്ക് അടുപ്പം ഉണ്ടായിരുന്നു എന്നാണ് ബന്ധുക്കള്‍ പറയുന്നത്. ഇത് മരണവുമായി ബന്ധപ്പെട്ടിട്ടുണ്ടോ എന്ന് പൊലീസ് പരിശോധിക്കും.