വാഹന പരിശോധനയ്ക്കിടെ ബൈക്കിന് കൈ കാണിച്ചു. 2 പൊലീസുകാരെ വെട്ടിച്ച് നീങ്ങി മറ്റൊരാളെ ഇടിച്ചിട്ട് രക്ഷപ്പെട്ടു

തിരുവനന്തപുരം:  വാഹന പരിശോധനയ്ക്കിടെ സിവില്‍ പൊലീസ് ഓഫിസറെ ബൈക്കിടിച്ച് വീഴ്ത്തി. വിഴിഞ്ഞം സ്റ്റേഷനിലെ സിവില്‍ പൊലീസ് ഓഫീസര്‍ രാകേഷിനാണ് അപകടത്തില്‍ ഗുരുതര പരുക്കേറ്റത്. കഴിഞ്ഞ ദിവസം  വിഴിഞ്ഞം സ്റ്റേഷന്‍ ഹൗസ് ഓഫീസറുടെ നേതൃത്വത്തില്‍ കല്ലുവെട്ടാന്‍കുഴി ഭാഗത്ത് വാഹന പരിശോധന നടത്തുന്നതിനിടെയായിരുന്നു സംഭവം. 

മറ്റൊരു വാഹനം പരിശോധിക്കുന്നതിനിടയില്‍ എത്തിയ ബൈക്കിന് കൈ കാണിച്ചുവെങ്കിലും രണ്ടു പൊലീസുകാരെ വെട്ടിച്ച് അമിത വേഗതയിലെത്തിയ ബൈക്ക് രാകേഷിനെ ഇടിച്ചു തെറിപ്പിച്ച് കടന്നു കളഞ്ഞു. ഇടിയുടെ ആഘാതത്തില്‍ ഇടുപ്പ് ഭാഗത്ത് ഗുരുതര പരിക്കേല്‍ക്കുകയും കൈയില്‍ മുറിവേല്‍ക്കുകയും ചെയ്തു. 

ഉടന്‍ തന്നെ എസ്എച്ച്ഒയുടെ നേതൃത്വത്തില്‍ പൊലീസുകാര്‍ വിഴിഞ്ഞം സാമൂഹികാരോഗ്യ കേന്ദ്രത്തിലെത്തിച്ച് പ്രാഥമിക ശുശ്രൂഷ നല്‍കിയ ശേഷം നഗരത്തിലെ സ്വകാര്യ ആശുപത്രിയിലേക്ക് മാറ്റി. ഇടിച്ചിട്ട വാഹനം തിരിച്ചറിയാനായി പ്രദേശത്തെ സിസിടിവി ക്യാമറകള്‍ കേന്ദ്രീകരിച്ച് അന്വേഷണം ഊര്‍ജിതമാക്കിയതായി പൊലീസ് പറഞ്ഞു.