കോടതികളിൽ നിന്ന് ബിആർ അംബേദ്കറുടെ ഛായാചിത്രങ്ങൾ നീക്കം ചെയ്യുന്നതിനെ എതിർത്ത് തമിഴ്‌നാട്‌ സർക്കാർ

ചെന്നൈ: തമിഴ്നാട്ടിലെ കോടതികളില്‍ നിന്ന് ബിആര്‍ അംബേദ്കറുടെ ഛായാചിത്രങ്ങള്‍ നീക്കം ചെയ്യരുതെന്ന നിലപാടില്‍ ഉറച്ച് സംസ്ഥാന സര്‍ക്കാര്‍. വിഷയത്തില്‍ തമിഴ്നാട് നിയമമന്ത്രി എസ് രഘുപതി മദ്രാസ് ഹൈക്കോടതി ചീഫ് ജസ്റ്റിസ് സഞ്ജയ് വിജയകുമാര്‍ ഗംഗാപൂര്‍വാലയുമായി കൂടിക്കാഴ്ച നടത്തി.

 അംബേദ്കറുടെ ഛായാചിത്രം നീക്കം ചെയ്യേണ്ടതില്ലെന്ന തമിഴ്നാട് സര്‍ക്കാരിന്റെ നിലപാട് നിയമമന്ത്രി സിജെയെ കത്തിലൂടെ അറിയിച്ചതായി ഔദ്യോഗിക പ്രസ്താവനയില്‍ പറഞ്ഞു.

തിരുവള്ളുവരുടെയും മഹാത്മാഗാന്ധിയുടെയും ഛായാചിത്രങ്ങള്‍ മാത്രം കോടതിയില്‍ അനുവദിക്കാനുള്ള നീക്കത്തിനെതിരെ ഒരു വിഭാഗം അഭിഭാഷകര്‍ നേരത്തെ പ്രതിഷേധവുമായി രംഗത്തെത്തിയിരുന്നു. വിഷയത്തില്‍ ചില രാഷ്ട്രീയ പാര്‍ട്ടികളും ആശങ്ക പ്രകടിപ്പിച്ചിരുന്നു. അതേസമയം ഒരു നേതാവിന്റെയും ഛായാചിത്രങ്ങള്‍ നീക്കം ചെയ്യാന്‍ ഉത്തരവിട്ടിട്ടില്ലെന്നും തത്സ്ഥിതി തുടരുമെന്നും ചീഫ് ജസ്റ്റിസ് പറഞ്ഞു.