ഹിമാചല്‍പ്രദേശില്‍ കുളത്തിന് സമീപം നഗ്നമായ നിലയില്‍ ദമ്പതികളുടെ മൃതദേഹങ്ങള്‍; മരിച്ചവരെ തിരിച്ചറിഞ്ഞില്ല, ദുരൂഹത

മണാലി: ഹിമാചല്‍പ്രദേശിലെ കുളുവില്‍ കുളത്തിന് സമീപത്ത് ദമ്പതികളെ മരിച്ച നിലയില്‍ കണ്ടെത്തി. മണികരനിലെ കുളത്തില്‍ വ്യാഴാഴ്ച്ചയാണ് സംഭവം. നഗ്നമായ നിലയിലായിരുന്നു മൃതദേഹങ്ങള്‍. മരിച്ചവരെ തിരിച്ചറിഞ്ഞില്ല. റഷ്യക്കാരാണെന്നാണ് പ്രാഥമിക നിഗമനമെന്ന് പോലീസ് അറിയിച്ചു.

ഇരുവരുടെയും കൈകളില്‍ മുറിവേറ്റ പാടുകളുണ്ട്. സമീപത്തു നിന്നും ലഭിച്ച ബാഗിലെ വസ്തുക്കളില്‍ നിന്നാണ് ഇരുവരും റഷ്യന്‍ സ്വദേശികളെന്ന നിഗമനത്തില്‍ എത്തിയതെന്നും പോലീസ് പറഞ്ഞു.

യുവാവിന്റെ മൃതദേഹം കുളത്തിന്റെ കരയില്‍ നിന്നും യുവതിയുടേത് കുളത്തില്‍ നിന്നുമാണ് കണ്ടെത്തിയത്. ബാഗ്, ബ്ലേഡ്, മൊബൈല്‍ ഫോണ്‍, ചരസ് എന്നിവയും മൃതദേഹത്തിന്റെ സമീപത്ത് നിന്ന് ലഭിച്ചിട്ടുണ്ട്. 

മൃതദേഹങ്ങള്‍ കുളുവിലെ ആശുപത്രിയിലേക്ക് മാറ്റി.  പോസ്റ്റുമോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ മരണ കാരണം വ്യക്തമാകൂയെന്ന് പോലീസ് അറിയിച്ചു. സംഭവത്തില്‍ വിശദമായ അന്വേഷണം നടക്കുകയാണെന്ന് എ.എസ്.പി സഞ്ജീവ് ചൗഹാന്‍ അറിയിച്ചു.