അശ്ലീല സന്ദേശമയച്ചു: എ.ഐ.എ.ഡി.എം.കെ. നേതാവിനെ ചൂലും ചെരുപ്പും കൊണ്ട് മര്‍ദിച്ച് കൈകാര്യം ചെയ്ത് യുവതികള്‍; വീഡിയോ വൈറല്‍

ചെന്നൈ: അശ്ലീല സന്ദേശമയച്ച എ.ഐ.എ.ഡി.എം.കെ. നേതാവിനെ യുവതികള്‍ മര്‍ദ്ദിച്ചു. പ്രാദേശിക പ്രവര്‍ത്തകനായ എം. പൊന്നമ്പല(60)ത്തെയാണ് യുവതികള്‍ ചൂലും ചെരുപ്പും കൊണ്ട് മര്‍ദിച്ചത്. തുടര്‍ന്ന് ഇയാളെ പോലീസില്‍ ഏല്‍പ്പിച്ചു. 

സംഭവത്തിന്റെ വീഡിയോ സാമൂഹിക മാധ്യമങ്ങളില്‍ വ്യാപകമാണ്.  കാഞ്ചീപുരം ജില്ലയിലെ മണിമംഗലത്തിനടുത്തുള്ള പടപ്പായിയിലാണ് സംഭവം. 

കുന്ദ്രത്തൂര്‍ വെസ്റ്റ് യൂണിയന്‍ എം.ജി.ആര്‍. അസോസിയേഷന്‍ ജോയിന്റ് സെക്രട്ടറിയാണ് എം. പൊന്നമ്പലം. ഐ.ടി. കമ്പനിയിലാണ് യുവതികള്‍ ജോലി ചെയ്യുന്നത്. ഇയാളുടെ വീട്ടിലായിരുന്നു ഇവര്‍ മുമ്പ് വാടകയ്ക്ക് താമസിച്ചിരുന്നത്. ഇയാള്‍ അപമര്യാദയായി പെരുമാറുകയും ലൈംഗികമായി ഉപദ്രവിക്കാന്‍ ശ്രമിക്കുകയും ചെയ്തതോടെ യുവതികള്‍ മറ്റൊരു വീട്ടിലേക്ക് താമസം മാറി.

എന്നാല്‍, വീടിന്റെ അഡ്വാന്‍സ് തിരിച്ചുതരാമെന്ന് പറഞ്ഞ് പൊന്നമ്പലം ഒരു യുവതിയെ വിളിച്ച് തന്റെ വീട്ടിലേക്ക് വരാന്‍ ആവശ്യപ്പെട്ടു. അവിടെ ചെന്നപ്പോള്‍ പൊന്നമ്പലം വാതിലടച്ച് ഇവരോട് അപമര്യാദയായി പെരുമാറുകയായിരുന്നു.

വീണ്ടും അശ്ലീല സന്ദേശം അയച്ച് ശല്യം ചെയ്യാന്‍ തുടങ്ങിയതോടെ യുവതികളിലൊരാള്‍ ഇയാളെ വീട്ടിലേക്ക് വിളിച്ചുവരുത്തി. തുടര്‍ന്ന് ചൂലുകളും ചെരുപ്പുകളുമെല്ലാം ഉപയോഗിച്ച് ഇയാളെ മര്‍ദ്ദിക്കുകയായിരുന്നു.