മാതാപിതാക്കളില്ലാത്ത പ്രായപൂര്‍ത്തിയാകാത്ത പെണ്‍കുട്ടിയുടെ വിവാഹം നടത്തി; ബന്ധുക്കള്‍ക്കെതിരേ കേസ്

മഹാരാഷ്ട്ര: പ്രായപൂര്‍ത്തിയാകാത്ത പെണ്‍കുട്ടിയെ വിവാഹം കഴിപ്പിച്ചതിന് ബന്ധുക്കള്‍ക്കെതിരെ കേസെടുത്ത് പോലീസ്. 14കാരിയായ പെണ്‍കുട്ടിയും 25കാരനും തമ്മിലുള്ള വിവാഹമാണ് നടത്തിയത്. 

ജനുവരി ഒന്നിന് അഹല്യനഗര്‍ ജില്ലയില്‍ ഷെവ്ഗാവില്‍ വച്ചാണ് വിവാഹം നടന്നത്. പെണ്‍കുട്ടി ദേവ്ലായ് പ്രദേശത്തുള്ള ഭര്‍തൃവീട്ടില്‍ താമസിക്കാന്‍ വിസമ്മതിക്കുകയും പോലീസില്‍ പരാതി നല്‍കുകയുമായിരുന്നു. സംസ്ഥാന സാമൂഹിക നീതി വകുപ്പിന്റെ ശിശുക്ഷേമ സമിതിയുടെ സഹായത്തോടെയാണ് കുട്ടിയുടെ മൊഴി രേഖപ്പെടുത്തിയത്. 

തനിക്ക് മാതാപിതാക്കളില്ലെന്നും ബന്ധുക്കളാണ് യുവാവുമായി വിവാഹം നടത്തിയതെന്നും കുട്ടി മൊഴി നല്‍കി. ബന്ധുക്കള്‍ക്കെതിരെ ശൈശവ വിവാഹ നിരോധന നിയമപ്രകാരവും ഭര്‍ത്താവിനെതിരെ ലൈംഗിക കുറ്റകൃത്യങ്ങളില്‍ നിന്നും കുട്ടികളെ സംരക്ഷിക്കല്‍ നിയമപ്രകാരവും പ്രകാരവും കേസെടുത്തിട്ടുണ്ടെന്നും പോലീസ് പറഞ്ഞു.