ധർമ്മശാലയിൽ പിക്കപ്പ് വാഹനം കുഴിയിലേക്ക് മറിഞ്ഞ് നാല് പേർ മരിച്ചു

ധര്‍മ്മശാല: ധര്‍മ്മശാലയ്ക്ക് സമീപമുള്ള യോള്‍ പോലീസ് സ്റ്റേഷന് കീഴിലുള്ള ജദ്രംഗലിനടുത്തുള്ള ഇക്കു ഖാഡ് ടേണില്‍ യാത്രാ വാഹനം നിയന്ത്രണം വിട്ട് കുഴിയിലേക്ക് മറിഞ്ഞ് നാലു മരണം.

അപകടം വളരെ ഗുരുതരമായിരുന്നതിനാല്‍ വാഹനത്തിന് സാരമായ കേടുപാടുകള്‍ സംഭവിച്ചു. അപകടത്തെത്തുടര്‍ന്ന് നാട്ടുകാരും സമീപത്തുള്ള ഡ്രൈവര്‍മാരും ഉടന്‍ തന്നെ സ്ഥലത്തെത്തി ദുരിതാശ്വാസ, രക്ഷാപ്രവര്‍ത്തനങ്ങള്‍ ആരംഭിച്ചു. അല്‍പ്പസമയത്തിനുള്ളില്‍, പോലീസ് സംഘവും സ്ഥലത്തെത്തി.

വാഹനത്തില്‍ 20 മുതല്‍ 25 വരെ യാത്രക്കാര്‍ ഉണ്ടായിരുന്നു. അപകടത്തില്‍ ഒരു സ്ത്രീ സംഭവസ്ഥലത്ത് തന്നെ മരിച്ചു.

ഗുരുതരമായി പരിക്കേറ്റ മറ്റ് മൂന്ന് പേര്‍ ആശുപത്രിയിലേക്ക് കൊണ്ടുപോകുന്നതിനിടെ മരിച്ചു. മരിച്ചവരില്‍ രണ്ട് സ്ത്രീകളും രണ്ട് പുരുഷന്മാരും ഉള്‍പ്പെടുന്നു.

പരിക്കേറ്റ എല്ലാവരെയും ടാണ്ടയിലെ ഡോ. രാജേന്ദ്ര പ്രസാദ് മെഡിക്കല്‍ കോളേജില്‍ പ്രവേശിപ്പിച്ചതായും അവരില്‍ ചിലരുടെ നില ഗുരുതരമാണെന്നും സദര്‍ താന പോലീസ് ഇന്‍ചാര്‍ജ് ധര്‍മ്മശാല നാരായണ്‍ സിംഗ് പറഞ്ഞു.