അഡലെയ്ഡില്‍ ഭാര്യയോടൊപ്പം പുറത്തുപോയ ഇന്ത്യന്‍ വിദ്യാര്‍ത്ഥിക്ക് നേരെ വംശീയ ആക്രമണം. ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു

ഡല്‍ഹി: സൗത്ത് ഓസ്ട്രേലിയയിലെ അഡലെയ്ഡില്‍ വംശീയ ആക്രമണത്തെ തുടര്‍ന്ന് ഇന്ത്യന്‍ വിദ്യാര്‍ത്ഥിയായ ചരണ്‍പ്രീത് സിംഗിനെ ആശുപത്രിയില്‍ പ്രവേശിപ്പിച്ചു. ജൂലൈ 19 ശനിയാഴ്ച രാത്രി സെന്‍ട്രല്‍ അഡലെയ്ഡിലെ തിരക്കേറിയ തെരുവായ കിന്റോര്‍ അവന്യൂവിന് സമീപമാണ് സംഭവം. 

പോലീസിന്റെയും മാധ്യമങ്ങളുടെയും റിപ്പോര്‍ട്ടുകള്‍ പ്രകാരം, 23 കാരനായ സിംഗ് ഭാര്യയോടൊപ്പം പുറത്തു പോയപ്പോള്‍ മൂര്‍ച്ചയുള്ള വസ്തുക്കള്‍ ഉപയോഗിച്ച് ആയുധധാരികളായ അഞ്ച് പേരടങ്ങുന്ന ഒരു സംഘം അദ്ദേഹത്തെ ആക്രമിക്കുകയായിരുന്നു.

നഗരത്തിലെ ലൈറ്റ് ഷോകള്‍ കാണാന്‍ സിങ്ങും ഭാര്യയും കാര്‍ പാര്‍ക്ക് ചെയ്തപ്പോഴാണ് സംഘര്‍ഷം ആരംഭിച്ചത്.

പാര്‍ക്കിംഗ് തര്‍ക്കത്തില്‍ നിന്നാണ് ആക്രമണം ഉണ്ടായതെന്ന് അദ്ദേഹം  പറഞ്ഞു, എന്നാല്‍ അത് പെട്ടെന്ന് അക്രമാസക്തമാവുകയും വംശീയമായി അധിക്ഷേപിക്കപ്പെടുകയും ചെയ്തു.

'അവരോട് താന്‍ 'ഇന്ത്യന്‍ആണെന്നും എന്നെ വിട്ടേക്ക്' എന്നും പറഞ്ഞു, അതിനുശേഷം അവര്‍ കുത്താന്‍ തുടങ്ങി,' ആശുപത്രിയില്‍ നിന്ന് സിംഗ് വിവരിച്ചു.