പൂനെ ഭൂമി കുംഭകോണം: അജിത് പവാറിന്റെ മകൻ പാർത്ഥിന്റെ സ്ഥാപനത്തിന് സ്റ്റാമ്പ് ഡ്യൂട്ടി വകുപ്പ് 43 കോടി രൂപയുടെ നോട്ടീസ് അയച്ചു

മുംബൈ: മഹാരാഷ്ട്ര ഉപമുഖ്യമന്ത്രി അജിത് പവാറിന്റെ മകന്‍ പാര്‍ത്ഥ് പവാര്‍ ഉള്‍പ്പെട്ട 1,800 കോടി രൂപയുടെ പൂനെ ഭൂമി കുംഭകോണത്തില്‍ പുതിയ വഴിത്തിരിവ്.

കുടിശ്ശികയും പിഴയുമായി ഏകദേശം 43 കോടി രൂപ അടയ്ക്കണമെന്ന് ആവശ്യപ്പെട്ട് സംസ്ഥാന സ്റ്റാമ്പ് ഡ്യൂട്ടി വകുപ്പ് പാര്‍ത്ഥുമായി ബന്ധമുള്ള അമേഡിയ എല്‍എല്‍പി എന്ന കമ്പനിക്ക് നോട്ടീസ് നല്‍കി. 

പൂനെയിലെ കൊറേഗാവ് പാര്‍ക്കിലെ സര്‍ക്കാര്‍ ഉടമസ്ഥതയിലുള്ള ഏകദേശം 1,800 കോടി വിലമതിക്കുന്ന 40 ഏക്കര്‍ പ്ലോട്ട് വെറും 300 കോടിക്ക് വിറ്റു എന്ന റിപ്പോര്‍ട്ടുകള്‍ക്ക് പിന്നാലെയാണ് കമ്പനിയുടെ പേര് പുറത്തുവന്നത്. വെറും 500 ന് 21 കോടിയുടെ സ്റ്റാമ്പ് ഡ്യൂട്ടി രേഖപ്പെടുത്തിയതായും ആരോപണമുയര്‍ന്നു, ഇത് കമ്പനി പ്രതിനിധികളും സര്‍ക്കാര്‍ ഉദ്യോഗസ്ഥരും തമ്മിലുള്ള വഞ്ചനയും ഒത്തുകളിയും സംശയത്തിന് കാരണമായി.

വിവാദത്തോട് പ്രതികരിച്ച ഉപമുഖ്യമന്ത്രി അജിത് പവാര്‍, മുഖ്യമന്ത്രി ദേവേന്ദ്ര ഫഡ്നാവിസുമായി നേരിട്ട് സംസാരിച്ചതായും നീതിയുക്തവും സുതാര്യവുമായ അന്വേഷണം ആവശ്യപ്പെട്ടതായും പറഞ്ഞു.

'ഈ കേസില്‍ എന്റെ കുടുംബം ഉള്‍പ്പെട്ടിട്ടുണ്ടെങ്കിലും, നിയമങ്ങള്‍ അനുസരിച്ച് കര്‍ശനമായി പ്രവര്‍ത്തിക്കാന്‍ ഞാന്‍ മുഖ്യമന്ത്രിയോട് പറഞ്ഞു.

വിഷയത്തില്‍ ഞങ്ങള്‍ പൂര്‍ണ്ണമായും സഹകരിക്കും. ആരോപണങ്ങള്‍ ഉന്നയിക്കാന്‍ എളുപ്പമാണ്, പക്ഷേ സത്യം ജനങ്ങളുടെ മുന്നില്‍ പുറത്തുവരണം,' പവാര്‍ പറഞ്ഞു.

പ്രാഥമിക കണ്ടെത്തലുകളില്‍ ഇടപാടില്‍ ഒരു സാമ്പത്തിക ഇടപാടും നടന്നിട്ടില്ലെന്ന് അദ്ദേഹം വ്യക്തമാക്കി. 'ബന്ധപ്പെട്ട എല്ലാ രേഖകളും പിന്നീട് റദ്ദാക്കുകയും ഇടപാടുകള്‍ അസാധുവാക്കുകയും ചെയ്തു' എന്നും അദ്ദേഹം കൂട്ടിച്ചേര്‍ത്തു.