'അപ്രഖ്യാപിത അടിയന്തരാവസ്ഥ': അഖിലേഷ് യാദവിന്റെ ഫേസ്ബുക്ക് അക്കൗണ്ട് സസ്‌പെൻഡ് ചെയ്തു; ബിജെപിക്കെതിരെ ആഞ്ഞടിച്ച് സമാജ്‌വാദി പാർട്ടി

ലഖ്നൗ: ഉത്തര്‍പ്രദേശില്‍ സമാജ്വാദി പാര്‍ട്ടി പ്രസിഡന്റ് അഖിലേഷ് യാദവിന്റെ ഔദ്യോഗിക ഫേസ്ബുക്ക് അക്കൗണ്ട് വെള്ളിയാഴ്ച വൈകുന്നേരം സസ്പെന്‍ഡ് ചെയ്തു. 

ഏകദേശം എട്ട് ദശലക്ഷം ഫോളോവേഴ്സ് ഉണ്ടായിരുന്ന ഫേസ്ബുക്ക് അക്കൗണ്ട് വെള്ളിയാഴ്ച വൈകുന്നേരം 6 മണിയോടെ 'ഒരു മുന്നറിയിപ്പുമില്ലാതെ' സസ്പെന്‍ഡ് ചെയ്തതായി പാര്‍ട്ടി ആരോപിച്ചു.

മുന്‍ ഉത്തര്‍പ്രദേശ് മുഖ്യമന്ത്രിയുടെ ഫേസ്ബുക്ക് അക്കൗണ്ട് സസ്‌പെന്‍ഡ് ചെയ്തത് എന്തുകൊണ്ടാണെന്ന് അറിയില്ല, ഫേസ്ബുക്ക് ഇതുവരെ ഒരു പ്രസ്താവനയും ഇറക്കിയിട്ടില്ല. 

ബിജെപി രാജ്യത്ത് 'അപ്രഖ്യാപിത അടിയന്തരാവസ്ഥ' ഏര്‍പ്പെടുത്തിയിരിക്കുകയാണെന്നും 'എതിര്‍ക്കുന്ന എല്ലാ ശബ്ദങ്ങളെയും' അടിച്ചമര്‍ത്തുകയാണെന്നും പാര്‍ട്ടി നേതാവ് ഫക്രുല്‍ ഹസന്‍ ചാന്ദ് ആരോപിച്ചു.

എസ്പി ബിജെപിക്ക് മുന്നില്‍ മുട്ടുകുത്തില്ലെന്നും അവരുടെ ജനവിരുദ്ധ നയങ്ങളെ എതിര്‍ക്കുന്നത് തുടരുമെന്നും ചാന്ദ് പറഞ്ഞു.

'രാജ്യത്തെ മൂന്നാമത്തെ വലിയ പാര്‍ട്ടിയുടെ ദേശീയ അധ്യക്ഷനായ ബഹുമാന്യനായ അഖിലേഷ് യാദവ് ജിയുടെ ഫേസ്ബുക്ക് അക്കൗണ്ട് സസ്പെന്‍ഡ് ചെയ്തത് ജനാധിപത്യത്തിനെതിരായ ആക്രമണമാണ്,' അദ്ദേഹം എക്സില്‍ പോസ്റ്റ് ചെയ്തു.