ഇന്ത്യാ സഖ്യത്തില്‍ വിള്ളലുകള്‍? കോണ്‍ഗ്രസിന് പകരം അഖിലേഷ് യാദവ് പ്രതിപക്ഷ സഖ്യത്തിന് നേതൃത്വം നല്‍കണമെന്ന് എസ്പി നേതാവ്

ഡല്‍ഹി: 2025 ലെ ബീഹാര്‍ നിയമസഭാ തെരഞ്ഞെടുപ്പില്‍ കോണ്‍ഗ്രസിനേറ്റ കനത്ത പരാജയത്തിന് ശേഷം ഇന്ത്യാ സഖ്യത്തില്‍ വിള്ളലുകളെന്ന് റിപ്പോര്‍ട്ട്.

സമാജ്വാദി പാര്‍ട്ടി നേതാക്കളില്‍ ഒരു വിഭാഗം പാര്‍ട്ടി മേധാവി അഖിലേഷ് യാദവ് പ്രതിപക്ഷ സഖ്യത്തിന് നേതൃത്വം നല്‍കണമെന്ന് വിശ്വസിക്കുന്നു. 37 എംപിമാരുള്ള ലോക്സഭയിലെ മൂന്നാമത്തെ വലിയ പാര്‍ട്ടിയാണ് സമാജ്വാദി പാര്‍ട്ടിയെന്നും അതിനാല്‍ ഇന്ത്യാ സഖ്യത്തെ നയിക്കണമെന്നും ലഖ്നൗ സെന്‍ട്രലില്‍ നിന്നുള്ള എസ്പി എംഎല്‍എ രവിദാസ് മെഹ്റോത്ര പറഞ്ഞു.

'ഞങ്ങളുടെ പാര്‍ട്ടിയിലെ എല്ലാ ഭാരവാഹികളും, എംഎല്‍എമാരും, എംപിമാരും അഖിലേഷ് ജി ഇന്ത്യാ സഖ്യത്തെ നയിക്കണമെന്ന് ആഗ്രഹിക്കുന്നു. സമാജ്വാദി പാര്‍ട്ടിയാണ് (ലോക്‌സഭയിലെ) മൂന്നാമത്തെ വലിയ പാര്‍ട്ടി, എല്ലാവരും പൂര്‍ണ്ണമായ അഭിപ്രായ ഐക്യത്തോടെയാണ് ഈ അഭിപ്രായം പ്രകടിപ്പിച്ചത്,' അദ്ദേഹം പറഞ്ഞു. 

2027ല്‍ ഉത്തര്‍പ്രദേശില്‍ നടക്കാനിരിക്കുന്ന നിയമസഭാ തെരഞ്ഞെടുപ്പില്‍ സമാജ്വാദി പാര്‍ട്ടി കുറഞ്ഞത് 350 സീറ്റുകളിലെങ്കിലും മത്സരിക്കുമെന്നും മെഹ്റോത്ര പറഞ്ഞു. പാര്‍ട്ടിയുടെ സഖ്യത്തെക്കുറിച്ച് ചോദിച്ചപ്പോള്‍, പാര്‍ട്ടിയുടെ ദേശീയ നേതൃത്വം ഇക്കാര്യത്തില്‍ തീരുമാനമെടുക്കുമെന്ന് എംഎല്‍എ പറഞ്ഞു. 

99 എംപിമാരുമായി കോണ്‍ഗ്രസ് ലോക്‌സഭയിലെ രണ്ടാമത്തെ വലിയ പാര്‍ട്ടിയാണ്, നിലവില്‍ ഇന്ത്യ സഖ്യത്തെ നയിക്കുന്നു. എന്നാല്‍ ബീഹാര്‍ തിരഞ്ഞെടുപ്പില്‍ 61 സീറ്റുകളില്‍ മത്സരിച്ച പാര്‍ട്ടിക്ക് ആറ് സീറ്റുകള്‍ മാത്രം നേടാനായതോടെ പ്രതിപക്ഷ സഖ്യത്തില്‍ നേതൃമാറ്റം സംബന്ധിച്ച മുറുമുറുപ്പുകള്‍ ഉയര്‍ന്നുവന്നിട്ടുണ്ട്.

ഇന്ത്യ സഖ്യത്തിന് നേതൃമാറ്റം ആവശ്യമാണെന്നും അതിന്റെ അധ്യക്ഷ മമത ബാനര്‍ജി നേതൃത്വം നല്‍കണമെന്നും തൃണമൂല്‍ കോണ്‍ഗ്രസ് (ടിഎംസി) നിര്‍ദ്ദേശിച്ചിരുന്നു.